Read Roman Urdu Geo yarmiyāh 51 Bible Online

yarmiyāh 51 - Roman Urdu Geo bible

yarmiyāh 51

¹rab farmātā hai, “maiṅ bābal aur us ke bāshindoṅ ke ḳhilāf mohlak āṅdhī chalāūṅgā.

²maiṅ mulk-e-bābal meṅ ġhairmulkī bhejūṅgā tāki wuh use anāj kī tarah phaṭak kar tabāh kareṅ. āfat ke din wuh pūre mulk ko ghere rakheṅge.

³tīrandāz ko tīr chalāne se roko! faujī ko zirābaktar pahan kar laṛne ke lie khaṛe hone na do! un ke naujawānoṅ ko zindā mat chhoṛnā balki fauj ko sarāsar nest-o-nābūd kar denā!

⁴tab mulk-e-bābal meṅ har taraf lāsheṅ nazar āeṅgī, talwār ke chire hue us kī galiyoṅ meṅ paṛe raheṅge.

⁵kyūṅki rabb-ul-afwāj ne isrāīl aur yahūdāh ko akelā [29] nahīṅ chhoṛā, un ke ḳhudā ne unheṅ tark nahīṅ kiyā. mulk-e-bābal kā qusūr nihāyat sangīn hai, us ne isrāīl ke quddūs kā gunāh kiyā hai.

⁶bābal se bhāg niklo! dauṛ kar apnī jān bachāo, warnā tumheṅ bhī bābal ke qusūr kā ajr milegā. kyūṅki rab ke intiqām kā waqt ā pahuṅchā hai, ab bābal ko munāsib sazā milegī.

⁷bābal rab ke hāth meṅ sone kā pyālā thā jise us ne pūrī duniyā ko pilā diyā. aqwām us kī mai pī pī kar matwālī ho gaīṅ, is lie wuh dīwānī ho gaī haiṅ.

⁸lekin ab yih pyālā achānak gir kar ṭūṭ gayā hai. chunāṅche bābal par āh-o-zārī karo! us ke dard aur taqlīf ko dūr karne ke lie balsān le āo, shāyad use shifā mile.

⁹lekin log kaheṅge, ‘ham bābal kī madad karnā chāhte the, lekin us ke zaḳhm bhar nahīṅ sakte. is lie āo, ham use chhoṛ deṅ aur har ek apne apne mulk meṅ jā base. kyūṅki us kī saḳht adālat ho rahī hai, jitnā āsmān aur bādal buland haiṅ utnī hī saḳht us kī sazā hai.’

¹⁰rab kī qaum bole, ‘rab hamārī rāstī raushnī meṅ lāyā hai. āo, ham siyyūn meṅ wuh kuchh sunāeṅ jo rab hamāre ḳhudā ne kiyā hai.’

¹¹tīroṅ ko tez karo! apnā tarkash un se bhar lo! rab mādī bādshāhoṅ ko harkat meṅ lāyā hai, kyūṅki wuh bābal ko tabāh karne kā irādā rakhtā hai. rab intiqām legā, apne ghar kī tabāhī kā badlā legā.

¹²bābal kī fasīl ke ḳhilāf jang kā jhanḍā gāṛ do! shahr ke irdgird pahrādārī kā band-o-bast mazbūt karo, hāṅ mazīd santrī khaṛe karo. kyūṅki rab ne bābal ke bāshindoṅ ke ḳhilāf mansūbā bāndh kar us kā elān kiyā hai, aur ab wuh use pūrā karegā.

¹³ai bābal beṭī, tū gahre pānī ke pās bastī aur nihāyat daulatmand ho gaī hai. lekin ḳhabardār! terā anjām qarīb hī hai, terī zindagī kā dhāgā kaṭ gayā hai.

¹⁴rabb-ul-afwāj ne apne nām kī qasam khā kar farmāyā hai ki maiṅ tujhe dushmanoṅ se bhar dūṅgā, aur wuh ṭiḍḍiyoṅ ke ġhol kī tarah pūre shahr ko ḍhāṅp leṅge. har jagah wuh tujh par fath ke nāre lagāeṅge.

¹⁵dekho, allāh hī ne apnī qudrat se zamīn ko ḳhalaq kiyā, usī ne apnī hikmat se duniyā kī bunyād rakhī, aur usī ne apnī samajh ke mutābiq āsmān ko ḳhaime kī tarah tān liyā.

¹⁶us ke hukm par āsmān par pānī ke zaḳhīre garajne lagte haiṅ. wuh duniyā kī intihā se bādal chaṛhnī detā, bārish ke sāth bijlī kaṛakne detā aur apne godāmoṅ se hawā nikalne detā hai.

¹⁷tamām insān ahmaq aur samajh se ḳhālī haiṅ. har sunār apne butoṅ ke bāis sharmindā huā hai. us ke but dhokā hī haiṅ, un meṅ dam nahīṅ.

¹⁸wuh fuzūl aur mazhakāḳhez haiṅ. adālat ke waqt wuh nest ho jāeṅge.

¹⁹allāh jo yāqūb kā maurūsī hissā hai in kī mānind nahīṅ hai. wuh sab kā ḳhāliq hai, aur isrāīlī qaum us kā maurūsī hissā hai. rabb-ul-afwāj hī us kā nām hai.

²⁰ai bābal, tū merā hathoṛā, merā jangī hathiyār thā. tere hī zarī'e maiṅ ne qaumoṅ ko pāsh pāsh kar diyā, saltanatoṅ ko ḳhāk meṅ milā diyā.

²¹tere hī zarī'e maiṅ ne ghoṛoṅ ko sawāroṅ samet aur rathoṅ ko rathbānoṅ samet pāsh pāsh kar diyā.

²²tere hī zarī'e maiṅ ne mardoṅ aur auratoṅ, buzurgoṅ aur bachchoṅ, naujawānoṅ aur kuṅwāriyoṅ ko pārā pārā kar diyā.

²³tere hī zarī'e maiṅ ne gallābān aur us ke rewaṛ, kisān aur us ke bailoṅ, gawarnaroṅ aur sarkārī mulāzimoṅ ko rezā rezā kar diyā.

²⁴lekin ab maiṅ bābal aur us ke tamām bāshindoṅ ko un kī siyyūn ke sāth badsulūkī kā pūrā ajr dūṅgā. tum apnī āṅkhoṅ se is ke gawāh hoge.” yih rab kā farmān hai.

²⁵rab farmātā hai, “ai bābal, pahle tū mohlak pahāṛ thā jis ne tamām duniyā kā satyānās kar diyā. lekin ab maiṅ tujh se nipaṭ letā hūṅ. maiṅ apnā hāth tere ḳhilāf baṛhā kar tujhe ūṅchī ūṅchī chaṭānoṅ se paṭaḳh dūṅgā. āḳhirkār malbe kā jhulsā huā ḍher hī bāqī rahegā.

²⁶tū itnā tabāh ho jāegā ki tere patthar na kisī makān ke konoṅ ke lie, na kisī bunyād ke lie istemāl ho sakeṅge.” yih rab kā farmān hai.

²⁷“āo, mulk meṅ jang kā jhanḍā gāṛ do! aqwām meṅ narsingā phūṅk phūṅk kar unheṅ bābal ke ḳhilāf laṛne ke lie maḳhsūs karo! us se laṛne ke lie arārāt, minnī aur ashkanāz kī saltanatoṅ ko bulāo! bābal se laṛne ke lie kamānḍar muqarrar karo. ghoṛe bhej do jo ṭiḍḍiyoṅ ke haulnāk ġhol kī tarah us par ṭūṭ paṛeṅ.

²⁸aqwām ko bābal se laṛne ke lie maḳhsūs karo! mādī bādshāh apne gawarnaroṅ, afsaroṅ aur tamām mutī mamālik samet tayyār ho jāeṅ.

²⁹zamīn laraztī aur thartharātī hai, kyūṅki rab kā mansūbā aṭal hai, wuh mulk-e-bābal ko yūṅ tabāh karnā chāhtā hai ki āindā us meṅ koī na rahe.

³⁰bābal ke jangāzmūdā faujī laṛne se bāz ā kar apne qiloṅ meṅ chhup gae haiṅ. un kī tāqat jātī rahī hai, wuh auratoṅ kī mānind ho gae haiṅ. ab bābal ke gharoṅ ko āg lag gaī hai, fasīl ke darwāzoṅ ke kunḍe ṭūṭ gae haiṅ.

³¹yake bād dīgare qāsid dauṛ kar shāh-e-bābal ko ittilā dete haiṅ, ‘shahr chāroṅ taraf se dushman ke qabze meṅ hai!

³²daryā ko pār karne ke tamām rāste us ke hāth meṅ haiṅ, sarkanḍe kā daldalī ilāqā jal rahā hai, aur faujī ḳhauf ke māre behiss-o-harkat ho gae haiṅ’.”

³³kyūṅki rabb-ul-afwāj jo isrāīl kā ḳhudā hai farmātā hai, “fasal kī kaṭāī se pahle pahle gāhne kī jagah ke farsh ko dabā dabā kar mazbūt kiyā jātā hai. yihī bābal beṭī kī hālat hai. fasal kī kaṭāī qarīb ā gaī hai, aur thoṛī der ke bād bābal ko pāoṅ tale ḳhūb dabāyā jāegā.

³⁴siyyūn beṭī rotī hai, ‘shāh-e-bābal nabūkadnazzar ne mujhe haṛap kar liyā, chūs liyā, ḳhālī bartan kī tarah ek taraf rakh diyā hai. us ne azhdahe kī tarah mujhe nigal liyā, apne peṭ ko merī lazīz chīzoṅ se bhar liyā hai. phir us ne mujhe watan se nikāl diyā.’

³⁵lekin ab siyyūn kī rahne wālī kahe, ‘jo ziyādatī mere sāth huī wuh bābal ke sāth kī jāe. jo qatl-o-ġhārat mujh meṅ huī wuh bābal ke bāshindoṅ meṅ mach jāe’!”

³⁶rab yarūshalam se farmātā hai, “dekh, maiṅ ḳhud tere haq meṅ laṛūṅgā, maiṅ ḳhud terā badlā lūṅgā. tab us kā samundar ḳhushk ho jāegā, us ke chashme band ho jāeṅge.

³⁷bābal malbe kā ḍher ban jāegā. gīdaṛ hī us meṅ apnā ghar banā leṅge. use dekh kar guzarne wāloṅ ke roṅgṭe khaṛe ho jāeṅge, aur wuh ‘taubā taubā’ kah kar āge nikleṅge. koī bhī wahāṅ nahīṅ basegā.

³⁸is waqt bābal ke bāshinde sherbabar kī tarah dahāṛ rahe haiṅ, wuh sher ke bachchoṅ kī tarah ġhurrā rahe haiṅ.

³⁹lekin rab farmātā hai ki wuh abhī mast hoṅge ki maiṅ un ke lie ziyāfat tayyār karūṅga, ek aisī ziyāfat jis meṅ wuh matwāle ho kar ḳhushī ke nāre māreṅge, phir abadī nīnd so jāeṅge. us nīnd se wuh kabhī nahīṅ uṭheṅge.

⁴⁰maiṅ unheṅ bheṛ ke bachchoṅ, menḍhoṅ aur bakroṅ kī tarah qasāī ke pās le jāūṅgā.

⁴¹hāy, bābal dushman ke qabze meṅ ā gayā hai! jis kī tārīf pūrī duniyā kartī thī wuh chhīn liyā gayā hai! ab use dekh kar qaumoṅ ke roṅgṭe khaṛe ho jāte haiṅ.

⁴²samundar bābal par chaṛh āyā hai, us kī garajtī lahroṅ ne use ḍhāṅp liyā hai.

⁴³us ke shahr registān ban gae haiṅ, ab chāroṅ taraf ḳhushk aur wīrān bayābān hī nazar ātā hai. na koī us meṅ rahtā, na us meṅ se guzartā hai.

⁴⁴maiṅ bābal ke dewatā bel ko sazā de kar us ke muṅh se wuh kuchh nikāl dūṅgā jo us ne haṛap kar liyā thā. ab se dīgar aqwām jauq-dar-jauq us ke pās nahīṅ āeṅgī, kyūṅki bābal kī fasīl bhī gir gaī hai.

⁴⁵ai merī qaum, bābal se nikal ā! har ek apnī jān bachāne ke lie wahāṅ se bhāg jāe, kyūṅki rab kā shadīd ġhazab us par nāzil hone ko hai.

⁴⁶jab afwāheṅ mulk meṅ phail jāeṅ to himmat mat hārnā, na ḳhauf khānā. kyūṅki har sāl koī aur afwāh phailegī, zulm par zulm aur hukmrān par hukmrān ātā rahegā.

⁴⁷kyūṅki wuh waqt qarīb hī hai jab maiṅ bābal ke butoṅ ko sazā dūṅgā. tab pūre mulk kī behurmatī ho jāegī, aur us ke maqtūl us ke bīch meṅ gir kar paṛe raheṅge.

⁴⁸tab āsmān-o-zamīn aur jo kuchh un meṅ hai bābal par shādiyānā bajāeṅge. kyūṅki tabāhkun dushman shimāl se us par hamlā karne ā rahā hai.” yih rab kā farmān hai.

⁴⁹“bābal ne pūrī duniyā meṅ beshumār logoṅ ko qatl kiyā hai, lekin ab wuh ḳhud halāk ho jāegā, is lie ki us ne itne isrāīliyoṅ ko qatl kiyā hai.

⁵⁰ai talwār se bache hue isrāīliyo, ruke na raho balki rawānā ho jāo! dūrdarāz mulk meṅ rab ko yād karo, yarūshalam kā bhī ḳhayāl karo!

⁵¹beshak tum kahte ho, ‘ham sharmindā haiṅ, hamārī saḳht ruswāī huī hai, sharm ke māre ham ne apne muṅh ko ḍhāṅp liyā hai. kyūṅki pardesī rab ke ghar kī muqaddastarīn jaghoṅ meṅ ghus āe haiṅ.’

⁵²lekin rab farmātā hai ki wuh waqt āne wālā hai jab maiṅ bābal ke butoṅ ko sazā dūṅgā. tab us ke pūre mulk meṅ maut ke ghāṭ utarne wāloṅ kī āheṅ sunāī deṅgī.

⁵³ḳhwāh bābal kī tāqat āsmān tak ūṅchī kyūṅ na ho, ḳhwāh wuh apne buland qile ko kitnā mazbūt kyūṅ na kare to bhī wuh gir jāegā. maiṅ tabāh karne wāle faujī us par chaṛhā lāūṅgā.” yih rab kā farmān hai.

⁵⁴“suno! bābal meṅ chīḳheṅ buland ho rahī haiṅ, mulk-e-bābal dhaṛām se gir paṛā hai.

⁵⁵kyūṅki rab bābal ko barbād kar rahā, wuh us kā shor-sharābā band kar rahā hai. dushman kī lahreṅ mutalātim samundar kī tarah us par chaṛh rahī haiṅ, un kī garajtī āwāz fizā meṅ gūṅj rahī hai.

⁵⁶kyūṅki tabāhkun dushman bābal par hamlā karne ā rahā hai. tab us ke sūrmāoṅ ko pakaṛā jāegā aur un kī kamāneṅ ṭūṭ jāeṅgī. kyūṅki rab intiqām kā ḳhudā hai, wuh har insān ko us kā munāsib ajr degā.”

⁵⁷duniyā kā bādshāh jis kā nām rabb-ul-afwāj hai farmātā hai, “maiṅ bābal ke baṛoṅ ko matwālā karūṅga, ḳhwāh wuh buzurg, dānishmand, gawarnar, sarkārī afsar yā faujī kyūṅ na hoṅ. tab wuh abadī nīnd so jāeṅge aur dubārā kabhī nahīṅ uṭheṅge.”

⁵⁸rab farmātā hai, “bābal kī moṭī moṭī fasīl ko ḳhāk meṅ milāyā jāegā, aur us ke ūṅche ūṅche darwāze rākh ho jāeṅge. tab yih kahāwat bābal par sādiq āegī, ‘aqwām kī mehnat-mashaqqat befāidā rahī, jo kuchh unhoṅ ne baṛī mushkil se banāyā wuh nazar-e-ātish ho gayā hai’.”

⁵⁹yahūdāh ke bādshāh sidqiyāh ke chauthe sāl meṅ yarmiyāh nabī ne yih kalām sirāyāh bin nairiyāh bin mahsiyāh ke sapurd kar diyā jo us waqt bādshāh ke sāth bābal ke lie rawānā huā. safar kā pūrā band-o-bast sirāyāh ke hāth meṅ thā.

⁶⁰yarmiyāh ne tūmār meṅ bābal par nāzil hone wālī āfat kī pūrī tafsīl likh dī thī. us ke bābal ke bāre meṅ tamām paiġhāmāt us meṅ qalamband the.

⁶¹us ne sirāyāh se kahā, “bābal pahuṅch kar dhyān se tūmār kī tamām bātoṅ kī tilāwat kareṅ.

⁶²tab duā kareṅ, ‘ai rab, tū ne elān kiyā hai ki maiṅ bābal ko yūṅ tabāh karūṅga ki āindā na insān, na haiwān us meṅ basegā. shahr abad tak wīrān-o-sunsān rahegā.’

⁶³pūrī kitāb kī tilāwat ke iḳhtitām par use patthar ke sāth bāndh leṅ, phir daryā-e-furāt meṅ phaiṅk kar

⁶⁴boleṅ, ‘bābal kā beṛā is patthar kī tarah ġharq ho jāegā. jo āfat maiṅ us par nāzil karūṅga us se use yūṅ ḳhāk meṅ milāyā jāegā ki dubārā kabhī nahīṅ uṭhegā. wuh sarāsar ḳhatm ho jāegā’.” yarmiyāh ke paiġhāmāt yahāṅ iḳhtitām par pahuṅch gae haiṅ.