Read Roman Urdu Geo yarmiyāh 9 Bible Online

yarmiyāh 9 - Roman Urdu Geo bible

yarmiyāh 9

¹kāsh merā sar pānī kā mambā aur merī āṅkheṅ āṅsū'oṅ kā chashmā hoṅ tāki maiṅ din rāt apnī qaum ke maqtūloṅ par āh-o-zārī kar sakūṅ.

²kāsh registān meṅ kahīṅ musāfiroṅ ke lie sarāy ho tāki maiṅ apnī qaum ko chhoṛ kar wahāṅ chalā jāūṅ. kyūṅki sab zinākār, sab ġhaddāroṅ kā jaththā haiṅ.

³rab farmātā hai, “wuh apnī zabān se jhūṭ ke tīr chalāte haiṅ, aur mulk meṅ un kī tāqat diyānatdārī par mabnī nahīṅ hotī. nīz, wuh badtar hote jā rahe haiṅ. mujhe to wuh jānte hī nahīṅ.

⁴har ek apne paṛosī se ḳhabardār rahe, aur apne kisī bhī bhāī par bharosā mat rakhnā. kyūṅki har bhāī chālākī karne meṅ māhir hai, aur har paṛosī tohmat lagāne par tulā rahtā hai.

⁵har ek apne paṛosī ko dhokā detā hai, koī bhī sach nahīṅ boltā. unhoṅ ne apnī zabān ko jhūṭ bolnā sikhāyā hai, aur ab wuh ġhalat kām karte karte thak gae haiṅ.

⁶ai yarmiyāh, tū fareb se ghirā rahtā hai, aur yih log fareb ke bāis hī mujhe jānane se inkār karte haiṅ.”

⁷is lie rabb-ul-afwāj farmātā hai, “dekho, maiṅ unheṅ ḳhām chāṅdī kī tarah pighlā kar āzmāūṅgā, kyūṅki maiṅ apnī qaum, apnī beṭī ke sāth aur kyā kar saktā hūṅ?

⁸un kī zabāneṅ mohlak tīr haiṅ. un ke muṅh paṛosī se sulah-salāmatī kī bāteṅ karte haiṅ jabki andar hī andar wuh us kī tāk meṅ baiṭhe haiṅ.”

⁹rab farmātā hai, “kyā mujhe unheṅ is kī sazā nahīṅ denī chāhie? kyā mujhe aisī qaum se badlā nahīṅ lenā chāhie?”

¹⁰maiṅ pahāṛoṅ ke bāre meṅ āh-o-zārī karūṅga, bayābān kī charāgāhoṅ par mātam kā gīt gāūṅgā. kyūṅki wuh yūṅ tabāh ho gae haiṅ ki na koī un meṅ se guzartā, na rewaṛoṅ kī āwāzeṅ un meṅ sunāī detī haiṅ. parinde aur jānwar sab bhāg kar chale gae haiṅ.

¹¹“yarūshalam ko maiṅ malbe kā ḍher banā dūṅgā, aur āindā gīdaṛ us meṅ jā baseṅge. yahūdāh ke shahroṅ ko maiṅ wīrān-o-sunsān kar dūṅgā. ek bhī un meṅ nahīṅ basegā.”

¹²kaun itnā dānishmand hai ki yih samajh sake? kis ko rab se itnī hidāyat milī hai ki wuh bayān kar sake ki mulk kyūṅ barbād ho gayā hai? wuh kyūṅ registān jaisā ban gayā hai, itnā wīrān ki us meṅ se koī nahīṅ guzartā?

¹³rab ne farmāyā, “wajah yih hai ki unhoṅ ne merī sharīat ko tark kiyā, wuh hidāyat jo maiṅ ne ḳhud unheṅ dī thī. na unhoṅ ne merī sunī, na merī sharīat kī pairawī kī.

¹⁴is ke bajāe wuh apne ziddī diloṅ kī pairawī karke bāl dewatāoṅ ke pīchhe lag gae haiṅ. unhoṅ ne wuhī kuchh kiyā jo un ke bāpdādā ne unheṅ sikhāyā thā.”

¹⁵is lie rabb-ul-afwāj jo isrāīl kā ḳhudā hai farmātā hai, “dekho, maiṅ is qaum ko kaṛwā khānā khilā kar zahrīlā pānī pilā dūṅgā.

¹⁶maiṅ unheṅ aisī qaumoṅ meṅ muntashir kar dūṅgā jin se na wuh aur na un ke bāpdādā wāqif the. merī talwār us waqt tak un ke pīchhe paṛī rahegī jab tak halāk na ho jāeṅ.”

¹⁷rabb-ul-afwāj farmātā hai, “dhyān de kar giryā karne wālī auratoṅ ko bulāo. jo janāzoṅ par wāwailā kartī haiṅ un meṅ se sab se māhir auratoṅ ko bulāo.

¹⁸wuh jald ā kar ham par āh-o-zārī kareṅ tāki hamārī āṅkhoṅ se āṅsū bah nikleṅ, hamārī palakoṅ se pānī ḳhūb ṭapakne lage.

¹⁹kyūṅki siyyūn se giryā kī āwāzeṅ buland ho rahī haiṅ, ‘hāy, hamāre sāth kaisī ziyādatī huī hai, hamārī kaisī ruswāī huī hai! ham mulk ko chhoṛne par majbūr haiṅ, kyūṅki dushman ne hamāre gharoṅ ko ḍhā diyā hai’.”

²⁰ai aurato, rab kā paiġhām suno. apne kānoṅ ko us kī har bāt par dharo! apnī beṭiyoṅ ko nohā karne kī tālīm do, ek dūsrī ko mātam kā yih gīt sikhāo,

²¹“maut phalāṅg kar hamārī khiṛkiyoṅ meṅ se ghus āī aur hamāre qiloṅ meṅ dāḳhil huī hai. ab wuh bachchoṅ ko galiyoṅ meṅ se aur naujawānoṅ ko chaukoṅ meṅ se miṭā ḍālne jā rahī hai.”

²²rab farmātā hai, “nāsheṅ khetoṅ meṅ gobar kī tarah idhar udhar bikhrī paṛī raheṅgī. jis tarah kaṭā huā gandum fasal kāṭne wāle ke pīchhe idhar udhar paṛā rahtā hai usī tarah lāsheṅ idhar udhar paṛī raheṅgī. lekin unheṅ ikaṭṭhā karne wālā koī nahīṅ hogā.”

²³rab farmātā hai, “na dānishmand apnī hikmat par faḳhr kare, na zor-āwar apne zor par yā amīr apnī daulat par.

²⁴faḳhr karne wālā faḳhr kare ki use samajh hāsil hai, ki wuh rab ko jāntā hai aur ki maiṅ rab hūṅ jo duniyā meṅ mehrbānī, insāf aur rāstī ko amal meṅ lātā hūṅ. kyūṅki yihī chīzeṅ mujhe pasand haiṅ.”

²⁵rab farmātā hai, “aisā waqt ā rahā hai jab maiṅ un sab ko sazā dūṅgā jin kā sirf jismānī ḳhatnā huā hai.

²⁶in meṅ misr, yahūdāh, adom, ammon, moāb aur wuh shāmil haiṅ jo registān ke kināre kināre rahte haiṅ. kyūṅki go yih tamām aqwām zāhirī taur par ḳhatnā kī rasm adā kartī haiṅ, lekin un kā ḳhatnā bātinī taur par nahīṅ huā. dhyān do ki isrāīl kī bhī yihī hālat hai.”