Read Roman Urdu Geo nohā 3 Bible Online

nohā 3 - Roman Urdu Geo bible

nohā 3

¹hāy, mujhe kitnā dukh uṭhānā paṛā! aur yih sab kuchh is lie ho rahā hai ki rab kā ġhazab mujh par nāzil huā hai, usī kī lāṭhī mujhe tarbiyat de rahī hai.

²us ne mujhe hāṅk hāṅk kar tārīkī meṅ chalne diyā, kahīṅ bhī raushnī nazar nahīṅ āī.

³rozānā wuh bār bār apnā hāth mere ḳhilāf uṭhātā rahtā hai.

⁴us ne mere jism aur jild ko saṛne diyā, merī haḍḍiyoṅ ko toṛ ḍālā.

⁵mujhe gher kar us ne zahr aur saḳht musībat kī dīwār mere irdgird khaṛī kar dī.

⁶us ne mujhe tārīkī meṅ basāyā. ab maiṅ un kī mānind hūṅ jo baṛī der se qabr meṅ paṛe haiṅ.

⁷us ne mujhe pītal kī bhārī zanjīroṅ meṅ jakaṛ kar mere irdgird aisī dīwāreṅ khaṛī kīṅ jin se maiṅ nikal nahīṅ saktā.

⁸ḳhwāh maiṅ madad ke lie kitnī chīḳheṅ kyūṅ na mārūṅ wuh merī iltijāeṅ apne huzūr pahuṅchne nahīṅ detā.

⁹jahāṅ bhī maiṅ chalnā chāhūṅ wahāṅ us ne tarāshe pattharoṅ kī mazbūt dīwār se mujhe rok liyā. mere tamām rāste bhūlbhulayyāṅ ban gae haiṅ.

¹⁰allāh rīchh kī tarah merī ghāt meṅ baiṭh gayā, sherbabar kī tarah merī tāk lagāe chhup gayā.

¹¹us ne mujhe sahīh rāste se bhaṭkā diyā, phir mujhe phāṛ kar besahārā chhoṛ diyā.

¹²apnī kamān ko tān kar us ne mujhe apne tīroṅ kā nishānā banāyā.

¹³us ke tīroṅ ne mere gurdoṅ ko chīr ḍālā.

¹⁴maiṅ apnī pūrī qaum ke lie mazāq kā nishānā ban gayā hūṅ. wuh pūre din apne gītoṅ meṅ mujhe lān-tān karte haiṅ.

¹⁵allāh ne mujhe kaṛwe zahr se ser kiyā, mujhe nāgawār talḳhī kā pyālā pilāyā.

¹⁶us ne mere dāṅtoṅ ko bajrī chabāne dī, mujhe kuchal kar ḳhāk meṅ milā diyā.

¹⁷merī jān se sukūn chhīn liyā gayā, ab maiṅ ḳhushhālī kā mazā bhūl hī gayā hūṅ.

¹⁸chunāṅche maiṅ bolā, “merī shān aur rab par se merī ummīd jātī rahī hai.”

¹⁹merī taqlīfdih aur bewatan hālat kā ḳhayāl kaṛwe zahr kī mānind hai.

²⁰to bhī merī jān ko us kī yād ātī rahtī hai, sochte sochte wuh mere andar dab jātī hai.

²¹lekin mujhe ek bāt kī ummīd rahī hai, aur yihī maiṅ bār bār zahan meṅ lātā hūṅ,

²²rab kī mehrbānī hai ki ham nest-o-nābūd nahīṅ hue. kyūṅki us kī shafqat kabhī ḳhatm nahīṅ hotī

²³balki har subh az sar-e-nau ham par chamak uṭhtī hai. ai mere āqā, terī wafādārī azīm hai.

²⁴merī jān kahtī hai, “rab merā maurūsī hissā hai, is lie maiṅ us ke intizār meṅ rahūṅgī.”

²⁵kyūṅki rab un par mehrbān hai jo us par ummīd rakh kar us ke tālib rahte haiṅ.

²⁶chunāṅche achchhā hai ki ham ḳhāmoshī se rab kī najāt ke intizār meṅ raheṅ.

²⁷achchhā hai ki insān jawānī meṅ allāh kā jūā uṭhāe phire.

²⁸jab jūā us kī gardan par rakhā jāe to wuh chupke se tanhāī meṅ baiṭh jāe.

²⁹wuh ḳhāk meṅ aundhe muṅh ho jāe, shāyad abhī tak ummīd ho.

³⁰wuh mārne wāle ko apnā gāl pesh kare, chupke se har tarah kī ruswāī bardāsht kare.

³¹kyūṅki rab insān ko hameshā tak radd nahīṅ kartā.

³²us kī shafqat itnī azīm hai ki go wuh kabhī insān ko dukh pahuṅchāe to bhī wuh āḳhirkār us par dubārā rahm kartā hai.

³³kyūṅki wuh insān ko dabāne aur ġham pahuṅchāne meṅ ḳhushī mahsūs nahīṅ kartā.

³⁴mulk meṅ tamām qaidiyoṅ ko pāoṅ tale kuchlā jā rahā hai.

³⁵allāh t'ālā ke deḳhte deḳhte insān kī haqtalfī kī jā rahī hai,

³⁶adālat meṅ logoṅ kā haq mārā jā rahā hai. lekin rab ko yih sab kuchh nazar ātā hai.

³⁷kaun kuchh karwā saktā hai agar rab ne is kā hukm na diyā ho?

³⁸āfateṅ aur achchhī chīzeṅ donoṅ allāh t'ālā ke farmān par wujūd meṅ ātī haiṅ.

³⁹to phir insānoṅ meṅ se kaun apne gunāhoṅ kī sazā pāne par shikāyat kare?

⁴⁰āo, ham apne chāl-chalan kā jāizā leṅ, use achchhī tarah jāṅch kar rab ke pās wāpas āeṅ.

⁴¹ham apne dil ko hāthoṅ samet āsmān kī taraf māil kareṅ jahāṅ allāh hai.

⁴²ham iqrār kareṅ, “ham bewafā ho kar sarkash ho gae haiṅ, aur tū ne hameṅ muāf nahīṅ kiyā.

⁴³tū apne qahr ke parde ke pīchhe chhup kar hamārā tāqqub karne lagā, berahmī se hameṅ mārtā gayā.

⁴⁴tū bādal meṅ yūṅ chhup gayā hai ki koī bhī duā tujh tak nahīṅ pahuṅch saktī.

⁴⁵tū ne hameṅ aqwām ke darmiyān kūṛā-karkaṭ banā diyā.

⁴⁶hamāre tamām dushman hameṅ tāne dete haiṅ.

⁴⁷dahshat aur gaṛhe hamāre nasīb meṅ haiṅ, ham dhaṛām se gir kar tabāh ho gae haiṅ.”

⁴⁸āṅsū merī āṅkhoṅ se ṭapak ṭapak kar nadiyāṅ ban gae haiṅ, maiṅ is lie ro rahā hūṅ ki merī qaum tabāh ho gaī hai.

⁴⁹mere āṅsū ruk nahīṅ sakte balki us waqt tak jārī raheṅge

⁵⁰jab tak rab āsmān se jhāṅk kar mujh par dhyān na de.

⁵¹apne shahr kī auratoṅ se dushman kā sulūk dekh kar merā dil chhalnī ho rahā hai.

⁵²jo bilāwajah mere dushman haiṅ unhoṅ ne parinde kī tarah merā shikār kiyā.

⁵³unhoṅ ne mujhe jān se mārne ke lie gaṛhe meṅ ḍāl kar mujh par patthar phaiṅk die.

⁵⁴sailāb mujh par āyā, aur merā sar pānī meṅ ḍūb gayā. maiṅ bolā, “merī zindagī kā dhāgā kaṭ gayā hai.”

⁵⁵ai rab, jab maiṅ gaṛhe kī gahrāiyoṅ meṅ thā to maiṅ ne tere nām ko pukārā.

⁵⁶maiṅ ne iltijā kī, “apnā kān band na rakh balki merī āheṅ aur chīḳheṅ sun!” aur tū ne merī sunī.

⁵⁷jab maiṅ ne tujhe pukārā to tū ne qarīb ā kar farmāyā, “ḳhauf na khā.”

⁵⁸ai rab, tū adālat meṅ mere haq meṅ muqaddamā laṛā, balki tū ne merī jān kā iwazānā bhī diyā.

⁵⁹ai rab, jo zulm mujh par huā wuh tujhe sāf nazar ātā hai. ab merā insāf kar!

⁶⁰tū ne un kī tamām kīnāparwarī par tawajjuh dī hai. jitnī bhī sāzisheṅ unhoṅ ne mere ḳhilāf kī haiṅ un se tū wāqif hai.

⁶¹ai rab, un kī lān-tān, un ke mere ḳhilāf tamām mansūbe tere kān tak pahuṅch gae haiṅ.

⁶²jo kuchh mere muḳhālif pūrā din mere ḳhilāf phusphusāte aur buṛbuṛāte haiṅ us se tū ḳhūb āshnā hai.

⁶³dekh ki yih kyā karte haiṅ! ḳhwāh baiṭhe yā khaṛe hoṅ, har waqt wuh apne gītoṅ meṅ mujhe apne mazāq kā nishānā banāte haiṅ.

⁶⁴ai rab, unheṅ un kī harkatoṅ kā munāsib ajr de!

⁶⁵un ke zahnoṅ ko kund kar, terī lānat un par ā paṛe!

⁶⁶un par apnā pūrā ġhazab nāzil kar! jab tak wuh tere āsmān ke nīche se ġhāib na ho jāeṅ un kā tāqqub kartā rah!