Read Roman Urdu Geo nohā 4 Bible Online

nohā 4 - Roman Urdu Geo bible

nohā 4

¹hāy, sone kī āb-o-tāb na rahī, ḳhālis sonā bhī māṅd paṛ gayā hai. maqdis ke jawāhir tamām galiyoṅ meṅ bikhre paṛe haiṅ.

²pahle to siyyūn ke girāṅqadar farzand ḳhālis sone jaise qīmtī the, lekin ab wuh goyā miṭṭī ke bartan samjhe jāte haiṅ jo ām kumhār ne banāe haiṅ.

³go gīdaṛ bhī apne bachchoṅ ko dūdh pilāte haiṅ, lekin merī qaum registān meṅ rahne wāle uqābī ullū jaisī zālim ho gaī hai.

⁴shīrḳhwār bachche kī zabān pyās ke māre tālū se chipak gaī hai. chhoṭe bachche bhūk ke māre roṭī māṅgte haiṅ, lekin khilāne wālā koī nahīṅ hai.

⁵jo pahle lazīz khānā khāte the wuh ab galiyoṅ meṅ tabāh ho rahe haiṅ. jo pahle arġhawānī rang ke shāndār kapṛe pahante the wuh ab kūṛe-karkaṭ meṅ loṭ-poṭ ho rahe haiṅ.

⁶merī qaum se sadūm kī nisbat kahīṅ zyādā sangīn gunāh sarzad huā hai. aur sadūm kā qusūr itnā sangīn thā ki wuh ek hī lamhe meṅ tabāh huā. kisī ne bhī mudāḳhalat na kī.

⁷siyyūn ke raīs kitne shāndār the! jild barf jaisī nikhrī, dūdh jaisī safed thī. ruḳhsār mūṅge kī tarah gulābī, shakl-o-sūrat sang-e-lājaward [1] jaisī chamakdār thī.

⁸lekin ab wuh koele jaise kāle nazar āte haiṅ. jab galiyoṅ meṅ ghūmte haiṅ to unheṅ pahchānā nahīṅ jātā. un kī haḍḍiyoṅ par kī jild sukaṛ kar lakaṛī kī tarah sūkhī huī hai.

⁹jo talwār se halāk hue un kā hāl un se behtar thā jo bhūke mar gae. kyūṅki khetoṅ se ḳhurāk na milne par wuh ghul ghul kar mar gae.

¹⁰jab merī qaum tabāh huī to itnā saḳht kāl paṛ gayā ki narmdil māoṅ ne bhī apne bachchoṅ ko pakā kar khā liyā.

¹¹rab ne apnā pūrā ġhazab siyyūn par nāzil kiyā, use apne shadīd qahr kā nishānā banāyā. us ne yarūshalam meṅ itnī zabardast āg lagāī ki wuh bunyādoṅ tak bhasm ho gayā.

¹²ab dushman yarūshalam ke darwāzoṅ meṅ dāḳhil hue haiṅ, hālāṅki duniyā ke tamām bādshāh balki sab log samajhte the ki yih mumkin hī nahīṅ.

¹³lekin yih sab kuchh us ke nabiyoṅ aur imāmoṅ ke sabab se huā jinhoṅ ne shahr hī meṅ rāstbāzoṅ kī ḳhūṅrezī kī.

¹⁴ab yihī log andhoṅ kī tarah galiyoṅ meṅ ṭaṭol ṭaṭol kar phirte haiṅ. wuh ḳhūn se itne ālūdā haiṅ ki sab log un ke kapṛoṅ se lagne se gurez karte haiṅ.

¹⁵unheṅ dekh kar log garajte haiṅ, “haṭo, tum nāpāk ho! bhāg jāo, dafā ho jāo, hameṅ hāth mat lagānā!” phir jab wuh dīgar aqwām meṅ jā kar idhar udhar phirne lagte haiṅ to wahāṅ ke log bhī kahte haiṅ ki yih mazīd yahāṅ na ṭhahreṅ.

¹⁶rab ne ḳhud unheṅ muntashir kar diyā, ab se wuh un kā ḳhayāl nahīṅ karegā. ab na imāmoṅ kī izzat hotī hai, na buzurgoṅ par mehrbānī kī jātī hai.

¹⁷ham chāroṅ taraf āṅkh dauṛāte rahe, lekin befāidā, koī madad na milī. deḳhte deḳhte hamārī nazar dhundlā gaī. kyūṅki ham apne burjoṅ par khaṛe ek aisī qaum ke intizār meṅ rahe jo hamārī madad kar hī nahīṅ saktī thī.

¹⁸ham apne chaukoṅ meṅ jā na sake, kyūṅki wahāṅ dushman hamārī tāk meṅ baiṭhā thā. hamārā ḳhātmā qarīb āyā, hamārā muqarrarā waqt iḳhtitāmpazīr huā, hamārā anjām ā pahuṅchā.

¹⁹jis tarah āsmān par manḍlāne wālā uqāb ek dam shikār par jhapaṭ paṛtā hai usī tarah hamārā tāqqub karne wāle ham par ṭūṭ paṛe, aur wuh bhī kahīṅ zyādā tezī se. wuh pahāṛoṅ par hamāre pīchhe pīchhe bhāge aur registān meṅ hamārī ghāt meṅ rahe.

²⁰hamārā bādshāh bhī un ke gaṛhoṅ meṅ phaṅs gayā. jo hamārī jān thā aur jise rab ne masah karke chun liyā thā use bhī pakaṛ liyā gayā, go ham ne sochā thā ki us ke sāy meṅ bas kar aqwām ke darmiyān mahfūz raheṅge.

²¹ai adom beṭī, beshak shādiyānā bajā! beshak mulk-e-ūz meṅ rah kar ḳhushī manā! lekin ḳhabardār, allāh ke ġhazab kā pyālā tujhe bhī pilāyā jāegā. tab tū use pī pī kar mast ho jāegī aur nashe meṅ apne kapṛe utār kar barahnā phiregī.

²²ai siyyūn beṭī, terī sazā kā waqt pūrā ho gayā hai. ab se rab tujhe qaidī banā kar jilāwatan nahīṅ karegā. lekin ai adom beṭī, wuh tujhe tere qusūr kā pūrā ajr degā, wuh tere gunāhoṅ par se pardā uṭhā legā.