Read Roman Urdu Geo nohā 5 Bible Online

nohā 5 - Roman Urdu Geo bible

nohā 5

¹ai rab, yād kar ki hamāre sāth kyā kuchh huā! ġhaur kar ki hamārī kaisī ruswāī huī hai.

²hamārī maurūsī milkiyat pardesiyoṅ ke hawāle kī gaī, hamāre ghar ajnabiyoṅ ke hāth meṅ ā gae haiṅ.

³ham wālidoṅ se mahrūm ho kar yatīm ho gae haiṅ, hamārī māeṅ bewāoṅ kī tarah ġhairmahfūz haiṅ.

⁴ḳhwāh pīne kā pānī ho yā lakaṛī, har chīz kī pūrī qīmat adā karnī paṛtī hai, hālāṅki yih hamārī apnī hī chīzeṅ thīṅ.

⁵hamārā tāqqub karne wāle hamāre sar par chaṛh āe haiṅ, aur ham thak gae haiṅ. kahīṅ bhī sukūn nahīṅ miltā.

⁶ham ne apne āp ko misr aur asūr ke hawāle kar diyā tāki roṭī mil jāe aur bhūke na mareṅ.

⁷hamāre bāpdādā ne gunāh kiyā, lekin wuh kūch kar gae haiṅ. ab ham hī un kī sazā bhugat rahe haiṅ.

⁸ġhulām ham par hukūmat karte haiṅ, aur koī nahīṅ hai jo hameṅ un ke hāth se bachāe.

⁹ham apnī jān ko ḳhatre meṅ ḍāl kar rozī kamāte haiṅ, kyūṅki bayābān meṅ talwār hamārī tāk meṅ baiṭhī rahtī hai.

¹⁰bhūk ke māre hamārī jild tanūr jaisī garm ho kar churmur ho gaī hai.

¹¹siyyūn meṅ auratoṅ kī ismatdarī, yahūdāh ke shahroṅ meṅ kuṅwāriyoṅ kī behurmatī huī hai.

¹²dushman ne raīsoṅ ko phāṅsī de kar buzurgoṅ kī be'izzatī kī hai.

¹³naujawānoṅ ko chakkī kā pāṭ uṭhāe phirnā hai, laṛke lakaṛī ke bojh tale ḍagmagā kar gir jāte haiṅ.

¹⁴ab buzurg shahr ke darwāze se aur jawān apne sāzoṅ se bāz rahte haiṅ.

¹⁵ḳhushī hamāre diloṅ se jātī rahī hai, hamārā loknāch āh-o-zārī meṅ badal gayā hai.

¹⁶tāj hamāre sar par se gir gayā hai. ham par afsos, ham se gunāh sarzad huā hai.

¹⁷isī lie hamārā dil niḍhāl ho gayā, hamārī nazar dhundlā gaī hai.

¹⁸kyūṅki koh-e-siyyūn tabāh huā hai, lomṛiyāṅ us kī galiyoṅ meṅ phirtī haiṅ.

¹⁹ai rab, terā rāj abadī hai, terā taḳht pusht-dar-pusht qāim rahtā hai.

²⁰tū hameṅ hameshā tak kyūṅ bhūlnā chāhtā hai? tū ne hameṅ itnī der tak kyūṅ tark kie rakhā hai?

²¹ai rab, hameṅ apne pās wāpas lā tāki ham wāpas ā sakeṅ. hameṅ bahāl kar tāki hamārā hāl pahle kī tarah ho.

²²yā kyā tū ne hameṅ hatmī taur par mustarad kar diyā hai? kyā terā ham par ġhussā had se zyādā baṛh gayā hai?.