Read Roman Urdu Geo hizqī'el 11 Bible Online

hizqī'el 11 - Roman Urdu Geo bible

hizqī'el 11

¹tab rūh mujhe uṭhā kar rab ke ghar ke mashriqī darwāze ke pās le gayā. wahāṅ darwāze par 25 mard khaṛe the. maiṅ ne dekhā ki qaum ke do buzurg yāzaniyāh bin azzūr aur falatiyāh bin bināyāh bhī un meṅ shāmil haiṅ.

²rab ne farmāyā, “ai ādamzād, yih wuhī mard haiṅ jo sharīr mansūbe bāndh rahe aur yarūshalam meṅ bure mashware de rahe haiṅ.

³yih kahte haiṅ, ‘āne wāle dinoṅ meṅ ghar tāmīr karne kī zarūrat nahīṅ. hamārā shahr to deg hai jabki ham us meṅ pakne wālā behtarīn gosht haiṅ.’

⁴ādamzād, chūṅki wuh aisī bāteṅ karte haiṅ is lie nabuwwat kar! un ke ḳhilāf nabuwwat kar!”

⁵tab rab kā rūh mujh par ā ṭhahrā, aur us ne mujhe yih pesh karne ko kahā, “rab farmātā hai, ‘ai isrāīlī qaum, tum is qism kī bāteṅ karte ho. maiṅ to un ḳhayālāt se ḳhūb wāqif hūṅ jo tumhāre diloṅ se ubharte rahte haiṅ.

⁶tum ne is shahr meṅ muta'addid logoṅ ko qatl karke us kī galiyoṅ ko lāshoṅ se bhar diyā hai.’

⁷chunāṅche rab qādir-e-mutlaq farmātā hai, ‘beshak shahr deg hai, lekin tum us meṅ pakne wālā achchhā gosht nahīṅ hoge balki wuhī jin ko tum ne us ke darmiyān qatl kiyā hai. tumheṅ maiṅ is shahr se nikāl dūṅgā.

⁸jis talwār se tum ḍarte ho, usī ko maiṅ tum par nāzil karūṅga.’ yih rab qādir-e-mutlaq kā farmān hai.

⁹‘maiṅ tumheṅ shahr se nikālūṅgā aur pardesiyoṅ ke hawāle karke tumhārī adālat karūṅga.

¹⁰tum talwār kī zad meṅ ā kar mar jāoge. isrāīl kī hudūd par hī maiṅ tumhārī adālat karūṅga. tab tum jān loge ki maiṅ hī rab hūṅ.

¹¹chunāṅche na yarūshalam shahr tumhāre lie deg hogā, na tum us meṅ behtarīn gosht hoge balki maiṅ isrāīl kī hudūd hī par tumhārī adālat karūṅga.

¹²tab tum jān loge ki maiṅ hī rab hūṅ, jis ke ahkām ke mutābiq tum ne zindagī nahīṅ guzārī. kyūṅki tum ne mere usūloṅ kī pairawī nahīṅ kī balki apnī paṛosī qaumoṅ ke usūloṅ kī’.”

¹³maiṅ abhī is peshgoī kā elān kar rahā thā ki falatiyāh bin bināyāh faut huā. yih dekh kar maiṅ muṅh ke bal gir gayā aur buland āwāz se chīḳh uṭhā, “hāy, hāy! ai rab qādir-e-mutlaq, kyā tū isrāīl ke bache-khuche hisse ko sarāsar miṭānā chāhtā hai?”

¹⁴rab mujh se hamkalām huā,

¹⁵“ai ādamzād, yarūshalam ke bāshinde tere bhāiyoṅ, tere rishtedāroṅ aur bābal meṅ jilāwatan hue tamām isrāīliyoṅ ke bāre meṅ kah rahe haiṅ, ‘yih log rab se kahīṅ dūr ho gae haiṅ, ab isrāīl hamāre hī qabze meṅ hai.’

¹⁶jo is qism kī bāteṅ karte haiṅ unheṅ jawāb de, rab qādir-e-mutlaq farmātā hai ki jī hāṅ, maiṅ ne unheṅ dūr dūr bhagā diyā, aur ab wuh dīgar qaumoṅ ke darmiyān hī rahte haiṅ. maiṅ ne ḳhud unheṅ muḳhtalif mamālik meṅ muntashir kar diyā, aise ilāqoṅ meṅ jahāṅ unheṅ maqdis meṅ mere huzūr āne kā mauqā thoṛā hī miltā hai.

¹⁷lekin rab qādir-e-mutlaq yih bhī farmātā hai, ‘maiṅ tumheṅ dīgar qaumoṅ meṅ se nikāl lūṅgā, tumheṅ un mulkoṅ se jamā karūṅga jahāṅ maiṅ ne tumheṅ muntashir kar diyā thā. tab maiṅ tumheṅ mulk-e-isrāīl dubārā atā karūṅga.’

¹⁸phir wuh yahāṅ ā kar tamām makrūh but aur ghinaunī chīzeṅ dūr kareṅge.

¹⁹us waqt maiṅ unheṅ nayā dil baḳhsh kar un meṅ naī rūh ḍālūṅgā. maiṅ un kā sangīn dil nikāl kar unheṅ gosht-post kā narm dil atā karūṅga.

²⁰tab wuh mere ahkām ke mutābiq zindagī guzāreṅge aur dhyān se merī hidāyāt par amal kareṅge. wuh merī qaum hoṅge, aur maiṅ un kā ḳhudā hūṅgā.

²¹lekin jin logoṅ ke dil un ke ghinaune butoṅ se lipṭe rahte haiṅ un ke sar par maiṅ un ke ġhalat kām kā munāsib ajr lāūṅgā. yih rab qādir-e-mutlaq kā farmān hai.”

²²phir karūbī farishtoṅ ne apne paroṅ ko phailāyā, un ke pahie harkat meṅ ā gae aur ḳhudā-e-isrāīl kā jalāl jo un ke ūpar thā

²³uṭh kar shahr se nikal gayā. chalte chalte wuh yarūshalam ke mashriq meṅ wāqe pahāṛ par ṭhahar gayā.

²⁴allāh ke rūh kī atākardā is royā meṅ rūh mujhe uṭhā kar mulk-e-bābal ke jilāwatanoṅ ke pās wāpas le gayā. phir royā ḳhatm huī,

²⁵aur maiṅ ne jilāwatanoṅ ko sab kuchh sunāyā jo rab ne mujhe dikhāyā thā.