Read Roman Urdu Geo hizqī'el 19 Bible Online

hizqī'el 19 - Roman Urdu Geo bible

hizqī'el 19

¹ai nabī, isrāīl ke raīsoṅ par mātamī gīt gā,

²‘terī māṅ kitnī zabardast shernī thī. jawān sherbabaroṅ ke darmiyān hī apnā ghar banā kar us ne apne bachchoṅ ko pāl liyā.

³ek bachche ko us ne ḳhās tarbiyat dī. jab baṛā huā to jānwaroṅ ko phāṛnā sīkh liyā, balki insān bhī us kī ḳhurāk ban gae.

⁴is kī ḳhabar dīgar aqwām tak pahuṅchī to unhoṅ ne use apne gaṛhe meṅ pakaṛ liyā. wuh us kī nāk meṅ kāṅṭe ḍāl kar use misr meṅ ghasīṭ le gae.

⁵jab shernī ke is bachche par se ummīd jātī rahī to us ne dīgar bachchoṅ meṅ se ek ko chun kar use ḳhās tarbiyat dī.

⁶yih bhī tāqatwar ho kar dīgar sheroṅ meṅ ghūmne phirne lagā. us ne jānwaroṅ ko phāṛnā sīkh liyā, balki insān bhī us kī ḳhurāk ban gae.

⁷un ke qiloṅ ko girā kar us ne un ke shahroṅ ko ḳhāk meṅ milā diyā. us kī dahāṛtī āwāz se mulk bāshindoṅ samet ḳhaufzadā ho gayā.

⁸tab irdgird ke sūboṅ meṅ basne wālī aqwām us se laṛne āīṅ. unhoṅ ne apnā jāl us par ḍāl diyā, use apne gaṛhe meṅ pakaṛ liyā.

⁹wuh us kī gardan meṅ paṭṭā aur nāk meṅ kāṅṭe ḍāl kar use shāh-e-bābal ke pās ghasīṭ le gae. wahāṅ use qaid meṅ ḍālā gayā tāki āindā isrāīl ke pahāṛoṅ par us kī garajtī āwāz sunāī na de.

¹⁰terī māṅ pānī ke kināre lagāī gaī angūr kī sī bel thī. bel kasrat ke pānī ke bāis phaldār aur shāḳhdār thī.

¹¹us kī shāḳheṅ itnī mazbūt thīṅ ki un se shāhī asā ban sakte the. wuh bāqī paudoṅ se kahīṅ zyādā ūṅchī thī balki us kī shāḳheṅ dūr dūr tak nazar ātī thīṅ.

¹²lekin āḳhirkār logoṅ ne taish meṅ ā kar use ukhāṛ kar phaiṅk diyā. mashriqī lū ne us kā phal murjhāne diyā. sab kuchh utārā gayā, lihāzā wuh sūkh gayā aur us kā mazbūt tanā nazar-e-ātish huā.

¹³ab bel ko registān meṅ lagāyā gayā hai, wahāṅ jahāṅ ḳhushk aur pyāsī zamīn hotī hai.

¹⁴us ke tane kī ek ṭahnī se āg ne nikal kar us kā phal bhasm kar diyā. ab koī mazbūt shāḳh nahīṅ rahī jis se shāhī asā ban sake’.” darj-e-bālā gīt mātamī hai aur āh-o-zārī karne ke lie istemāl huā hai.