Read Roman Urdu Geo hizqī'el 22 Bible Online

hizqī'el 22 - Roman Urdu Geo bible

hizqī'el 22

¹rab kā kalām mujh par nāzil huā,

²“ai ādamzād, kyā tū yarūshalam kī adālat karne ke lie tayyār hai? kyā tū is qātil shahr par faislā karne ke lie musta'id hai? phir us par us kī makrūh harkateṅ zāhir kar.

³use batā, ‘rab qādir-e-mutlaq farmātā hai ki ai yarūshalam beṭī, terā anjām qarīb hī hai, aur yih terā apnā qusūr hai. kyūṅki tū ne apne darmiyān māsūmoṅ kā ḳhūn bahāyā aur apne lie but banā kar apne āp ko nāpāk kar diyā hai.

⁴apnī ḳhūṅrezī se tū mujrim ban gaī hai, apnī butparastī se nāpāk ho gaī hai. tū ḳhud apnī adālat kā din qarīb lāī hai. isī wajah se terā anjām qarīb ā gayā hai, isī lie maiṅ tujhe dīgar aqwām kī lān-tān aur tamām mamālik ke mazāq kā nishānā banā dūṅgā.

⁵sab tujh par ṭhaṭṭhā māreṅge, ḳhwāh wuh qarīb hoṅ yā dūr. tere nām par dāġh lag gayā hai, tujh meṅ fasād had se zyādā baṛh gayā hai.

⁶isrāīl kā jo bhī buzurg tujh meṅ rahtā hai wuh apnī pūrī tāqat se ḳhūn bahāne kī koshish kartā hai.

⁷tere bāshinde apne māṅ-bāp ko haqīr jānte haiṅ. wuh pardesī par saḳhtī karke yatīmoṅ aur bewāoṅ par zulm karte haiṅ.

⁸jo mujhe muqaddas hai use tū pāoṅ tale kuchal detī hai. tū mere sabat ke dinoṅ kī behurmatī bhī kartī hai.

⁹tujh meṅ aise tohmat lagāne wāle haiṅ jo ḳhūṅrezī par tule hue haiṅ. tere bāshinde pahāṛoṅ kī nājāiz qurbāngāhoṅ ke pās qurbāniyāṅ khāte aur tere darmiyān sharmnāk harkateṅ karte haiṅ.

¹⁰beṭā māṅ se hambistar ho kar bāp kī behurmatī kartā hai, shauhar māhwārī ke daurān bīwī se sohbat karke us se ziyādatī kartā hai.

¹¹ek apne paṛosī kī bīwī se zinā kartā hai jabki dūsrā apnī bahū kī behurmatī aur tīsrā apnī sagī bahan kī ismatdarī kartā hai.

¹²tujh meṅ aise log haiṅ jo rishwat ke iwaz qatl karte haiṅ. sūd qābil-e-qabūl hai, aur log ek dūsre par zulm karke nājāiz nafā kamāte haiṅ. rab qādir-e-mutlaq farmātā hai ki ai yarūshalam, tū mujhe sarāsar bhūl gaī hai!

¹³terā nājāiz nafā aur tere bīch meṅ ḳhūṅrezī dekh kar maiṅ ġhusse meṅ tālī bajātā hūṅ.

¹⁴soch le! jis din maiṅ tujh se nipṭūṅgā to kyā terā hauslā qāim aur tere hāth mazbūt raheṅge? yih merā, rab kā farmān hai, aur maiṅ yih karūṅga bhī.

¹⁵maiṅ tujhe dīgar aqwām-o-mamālik meṅ muntashir karke terī nāpākī dūr karūṅga.

¹⁶phir jab dīgar qaumoṅ ke deḳhte deḳhte terī behurmatī ho jāegī tab tū jān legī ki maiṅ hī rab hūṅ’.”

¹⁷rab mazīd mujh se hamkalām huā,

¹⁸“ai ādamzād, isrāīlī qaum mere nazdīk us mail kī mānind ban gaī hai jo chāṅdī ko ḳhālis karne ke bād bhaṭṭī meṅ bāqī rah jātā hai. sab ke sab us tāṅbe, ṭīn, lohe aur sīse kī mānind haiṅ jo bhaṭṭī meṅ rah jātā hai. wuh kachrā hī haiṅ.

¹⁹chunāṅche rab qādir-e-mutlaq farmātā hai ki chūṅki tum bhaṭṭī meṅ bachā huā mail ho is lie maiṅ tumheṅ yarūshalam meṅ ikaṭṭhā karke

²⁰bhaṭṭī meṅ phaiṅk dūṅgā. jis tarah chāṅdī, tāṅbe, lohe, sīse aur ṭīn kī āmezish ko taptī bhaṭṭī meṅ phaiṅkā jātā hai tāki pighal jāe usī tarah maiṅ tumheṅ ġhusse meṅ ikaṭṭhā karūṅga aur bhaṭṭī meṅ phaiṅk kar pighlā dūṅgā.

²¹maiṅ tumheṅ jamā karke āg meṅ phaiṅk dūṅgā aur baṛe ġhusse se hawā de kar tumheṅ pighlā dūṅgā.

²²jis tarah chāṅdī bhaṭṭī meṅ pighal jātī hai usī tarah tum yarūshalam meṅ pighal jāoge. tab tum jān loge ki maiṅ rab ne apnā ġhazab tum par nāzil kiyā hai.”

²³rab mujh se hamkalām huā,

²⁴“ai ādamzād, mulk-e-isrāīl ko batā, ‘ġhazab ke din tujh par meṅh nahīṅ barsegā balki tū bārish se mahrūm rahegā.’

²⁵mulk ke bīch meṅ sāzish karne wāle rāhnumā sherbabar kī mānind haiṅ jo dahāṛte dahāṛte apnā shikār phāṛ lete haiṅ. wuh logoṅ ko haṛap karke un ke ḳhazāne aur qīmtī chīzeṅ chhīn lete aur mulk ke darmiyān hī muta'addid auratoṅ ko bewāeṅ banā dete haiṅ.

²⁶mulk ke imām merī sharīat se ziyādatī karke un chīzoṅ kī behurmatī karte haiṅ jo mujhe muqaddas haiṅ. na wuh muqaddas aur ām chīzoṅ meṅ imtiyāz karte, na pāk aur nāpāk ashyā kā farq sikhāte haiṅ. nīz, wuh mere sabat ke din apnī āṅkhoṅ ko band rakhte haiṅ tāki us kī behurmatī nazar na āe. yūṅ un ke darmiyān hī merī behurmatī kī jātī hai.

²⁷mulk ke darmiyān ke buzurg bheṛiyoṅ kī mānind haiṅ jo apne shikār ko phāṛ phāṛ kar ḳhūn bahāte aur logoṅ ko maut ke ghāṭ utārte haiṅ tāki nārawā nafā kamāeṅ.

²⁸mulk ke nabī farebdih royāeṅ aur jhūṭe paiġhāmāt sunā kar logoṅ ke bure kāmoṅ par safedī pher dete haiṅ tāki un kī ġhaltiyāṅ nazar na āeṅ. wuh kahte haiṅ, ‘rab qādir-e-mutlaq farmātā hai’ hālāṅki rab ne un par kuchh nāzil nahīṅ kiyā hotā.

²⁹mulk ke ām log bhī ek dūsre kā istehsāl karte haiṅ. wuh ḍakait ban kar ġharīboṅ aur zarūratmandoṅ par zulm karte aur pardesiyoṅ se badsulūkī karke un kā haq mārte haiṅ.

³⁰isrāīl meṅ maiṅ aise ādmī kī talāsh meṅ rahā jo mulk ke lie hifāzatī chārdīwārī tāmīr kare, jo mere huzūr ā kar dīwār ke raḳhne meṅ khaṛā ho jāe tāki maiṅ mulk ko tabāh na karūṅ. lekin mujhe ek bhī na milā jo is qābil ho.

³¹chunāṅche maiṅ apnā ġhazab un par nāzil karūṅga aur unheṅ apne saḳht qahr se bhasm karūṅga. tab un ke ġhalat kāmoṅ kā natījā un ke apne saroṅ par āegā. yih rab qādir-e-mutlaq kā farmān hai.”