Read Roman Urdu Geo hizqī'el 23 Bible Online

hizqī'el 23 - Roman Urdu Geo bible

hizqī'el 23

²“ai ādamzād, do auratoṅ kī kahānī sun le. donoṅ ek hī māṅ kī beṭiyāṅ thīṅ.

³wuh abhī jawān hī thīṅ jab misr meṅ kasbī ban gaīṅ. wahīṅ mard donoṅ kuṅwāriyoṅ kī chhātiyāṅ sahlā kar apnā dil bahlāte the.

⁴baṛī kā nām aholā aur chhoṭī kā nām aholībā thā. aholā sāmariyya aur aholībā yarūshalam hai. maiṅ donoṅ kā mālik ban gayā, aur donoṅ ke beṭe-beṭiyāṅ paidā hue.

⁵go maiṅ aholā kā mālik thā to bhī wuh zinā karne lagī. shahwat se bhar kar wuh jangjū asūriyoṅ ke pīchhe paṛ gaī, aur yihī us ke āshiq ban gae.

⁶shāndār kapṛoṅ se mulabbas yih gawarnar aur faujī afsar use baṛe pyāre lage. sab ḳhūbsūrat jawān aur achchhe ghuṛsawār the.

⁷asūr ke chīdā chīdā beṭoṅ se us ne zinā kiyā. jis kī bhī use shahwat thī us se aur us ke butoṅ se wuh nāpāk huī.

⁸lekin us ne jawānī meṅ misriyoṅ ke sāth jo zinākārī shurū huī wuh bhī na chhoṛī. wuhī log the jo us ke sāth us waqt hambistar hue the jab wuh abhī kuṅwārī thī, jinhoṅ ne us kī chhātiyāṅ sahlā kar apnī gandī ḳhwāhishāt us se pūrī kī thīṅ.

⁹yih dekh kar maiṅ ne use us ke asūrī āshiqoṅ ke hawāle kar diyā, un hī ke hawāle jin kī shadīd shahwat use thī.

¹⁰un hī se aholā kī adālat huī. unhoṅ ne us ke kapṛe utār kar use barahnā kar diyā aur us ke beṭe-beṭiyoṅ ko us se chhīn liyā. use ḳhud unhoṅ ne talwār se mār ḍālā. yūṅ wuh dīgar auratoṅ ke lie ibratangez misāl ban gaī.

¹¹go us kī bahan aholībā ne yih sab kuchh dekhā to bhī wuh shahwat aur zinākārī ke lihāz se apnī bahan se kahīṅ zyādā āge baṛhaī.

¹²wuh bhī shahwat ke māre asūriyoṅ ke pīchhe paṛ gaī. yih ḳhūbsūrat jawān sab use pyāre the, ḳhwāh asūrī gawarnar yā afsar, ḳhwāh shāndār kapṛoṅ se mulabbas faujī yā achchhe ghuṛsawār the.

¹³maiṅ ne dekhā ki us ne bhī apne āp ko nāpāk kar diyā. is meṅ donoṅ beṭiyāṅ ek jaisī thīṅ.

¹⁴lekin aholībā kī zinākārānā harkateṅ kahīṅ zyādā burī thīṅ. ek din us ne dīwār par bābal ke mardoṅ kī taswīr dekhī. taswīr lāl rang se khaiṅchī huī thī.

¹⁵mardoṅ kī kamr meṅ paṭkā aur sar par pagaṛī bandhī huī thī. wuh bābal ke un afsaroṅ kī mānind lagte the jo rathoṅ par sawār laṛte haiṅ.

¹⁶mardoṅ kī taswīr deḳhte hī aholībā ke dil meṅ un ke lie shadīd ārzū paidā huī. chunāṅche us ne apne qāsidoṅ ko bābal bhej kar unheṅ āne kī dāwat dī.

¹⁷tab bābal ke mard us ke pās āe aur us se hambistar hue. apnī zinākārī se unhoṅ ne use nāpāk kar diyā. lekin un se nāpāk hone ke bād us ne tang ā kar apnā muṅh un se pher liyā.

¹⁸jab us ne khule taur par un se zinā karke apnī barahnagī sab par zāhir kī to maiṅ ne tang ā kar apnā muṅh us se pher liyā, bilkul usī tarah jis tarah maiṅ ne apnā muṅh us kī bahan se bhī pher liyā thā.

¹⁹lekin yih bhī us ke lie kāfī na thā balki us ne apnī zinākārī meṅ mazīd izāfā kiyā. use jawānī ke din yād āe jab wuh misr meṅ kasbī thī.

²⁰wuh shahwat ke māre pahle āshiqoṅ kī ārzū karne lagī, un se jo gadhoṅ aur ghoṛoṅ kī sī jinsī tāqat rakhte the.

²¹kyūṅki tū apnī jawānī kī zinākārī dohrāne kī mutamannī thī. tū ek bār phir un se hambistar honā chāhtī thī jo misr meṅ terī chhātiyāṅ sahlā kar apnā dil bahlāte the.

²²chunāṅche rab qādir-e-mutlaq farmātā hai, ‘ai aholībā, maiṅ tere āshiqoṅ ko tere ḳhilāf khaṛā karūṅga. jin se tū ne tang ā kar apnā muṅh pher liyā thā unheṅ maiṅ chāroṅ taraf se tere ḳhilāf lāūṅgā.

²³bābal, kasdiyoṅ, fiqod, shoa aur qoa ke faujī mil kar tujh par ṭūṭ paṛeṅge. ghuṛsawār asūrī bhī un meṅ shāmil hoṅge, aise ḳhūbsūrat jawān jo sab gawarnar, afsar, rathsawār faujī aur ūṅche tabqe ke afrād hoṅge.

²⁴shimāl se wuh rathoṅ aur muḳhtalif qaumoṅ ke muta'addid faujiyoṅ samet tujh par hamlā kareṅge. wuh tujhe yūṅ gher leṅge ki har taraf chhoṭī aur baṛī ḍhāleṅ, har taraf ḳhod nazar āeṅge. maiṅ tujhe un ke hawāle kar dūṅgā tāki wuh tujhe sazā de kar apne qawānīn ke mutābiq terī adālat kareṅ.

²⁵tū merī ġhairat kā tajribā karegī, kyūṅki yih log ġhusse meṅ tujh se nipaṭ leṅge. wuh terī nāk aur kānoṅ ko kāṭ ḍāleṅge aur bache huoṅ ko talwār se maut ke ghāṭ utāreṅge. tere beṭe-beṭiyoṅ ko wuh le jāeṅge, aur jo kuchh un ke pīchhe rah jāe wuh bhasm ho jāegā.

²⁶wuh tere libās aur tere zewarāt ko tujh par se utāreṅge.

²⁷yūṅ maiṅ terī wuh fahhāshī aur zinākārī rok dūṅgā jis kā silsilā tū ne misr meṅ shurū kiyā thā. tab na tū ārzūmand nazaroṅ se in chīzoṅ kī taraf dekhegī, na misr ko yād karegī.

²⁸kyūṅki rab qādir-e-mutlaq farmātā hai ki maiṅ tujhe un ke hawāle karne ko hūṅ jo tujh se nafrat karte haiṅ, un ke hawāle jin se tū ne tang ā kar apnā muṅh pher liyā thā.

²⁹wuh baṛī nafrat se tere sāth pesh āeṅge. jo kuchh tū ne mehnat se kamāyā use wuh chhīn kar tujhe nangī aur barahnā chhoṛeṅge. tab terī zinākārī kā sharmnāk anjām aur terī fahhāshī sab par zāhir ho jāegī.

³⁰tab tujhe is kā ajr milegā ki tū qaumoṅ ke pīchhe paṛ kar zinā kartī rahī, ki tū ne un ke butoṅ kī pūjā karke apne āp ko nāpāk kar diyā hai.

³¹tū apnī bahan ke namūne par chal paṛī, is lie maiṅ tujhe wuhī pyālā pilāūṅgā jo use pīnā paṛā.

³²rab qādir-e-mutlaq farmātā hai ki tujhe apnī bahan kā pyālā pīnā paṛegā jo baṛā aur gahrā hai. aur tū us waqt tak use pītī rahegī jab tak mazāq aur lān-tān kā nishānā na ban gaī ho.

³³dahshat aur tabāhī kā pyālā pī pī kar tū madhoshī aur dukh se bhar jāegī. tū apnī bahan sāmariyya kā yih pyālā

³⁴āḳhirī qatre tak pī legī, phir pyāle ko pāsh pāsh karke us ke ṭukṛe chabā legī aur apne sīne ko phāṛ legī.’ yih rab qādir-e-mutlaq kā farmān hai.

³⁵rab qādir-e-mutlaq farmātā hai, ‘tū ne mujhe bhūl kar apnā muṅh mujh se pher liyā hai. ab tujhe apnī fahhāshī aur zinākārī kā natījā bhugatnā paṛegā’.”

³⁶rab mazīd mujh se hamkalām huā, “ai ādamzād, kyā tū aholā aur aholībā kī adālat karne ke lie tayyār hai? phir un par un kī makrūh harkateṅ zāhir kar.

³⁷un se do jurm sarzad hue haiṅ, zinā aur qatl. unhoṅ ne butoṅ se zinā kiyā aur apne bachchoṅ ko jalā kar unheṅ khilāyā, un bachchoṅ ko jo unhoṅ ne mere hāṅ janm die the.

³⁸lekin yih un ke lie kāfī nahīṅ thā. sāth sāth unhoṅ ne merā maqdis nāpāk aur mere sabat ke dinoṅ kī behurmatī kī.

³⁹kyūṅki jab kabhī wuh apne bachchoṅ ko apne butoṅ ke huzūr qurbān kartī thīṅ usī din wuh mere ghar meṅ ā kar us kī behurmatī kartī thīṅ. mere hī ghar meṅ wuh aisī harkateṅ kartī thīṅ.

⁴⁰yih bhī in do bahnoṅ ke lie kāfī nahīṅ thā balki ādmiyoṅ kī talāsh meṅ unhoṅ ne apne qāsidoṅ ko dūr dūr tak bhej diyā. jab mard pahuṅche to tū ne un ke lie nahā kar apnī āṅkhoṅ meṅ surmā lagāyā aur apne zewarāt pahan lie.

⁴¹phir tū shāndār sofe par baiṭh gaī. tere sāmne mez thī jis par tū ne mere lie maḳhsūs baḳhūr aur tel rakhā thā.

⁴²registān se sibā ke muta'addid ādmī lāe gae to shahr meṅ shor mach gayā, aur logoṅ ne sukūn kā sāṅs liyā. ādmiyoṅ ne donoṅ bahnoṅ ke bāzū'oṅ meṅ kaṛe pahnāe aur un ke saroṅ par shāndār tāj rakhe.

⁴³tab maiṅ ne zinākārī se ghisī phaṭī aurat ke bāre meṅ kahā, ‘ab wuh us ke sāth zinā kareṅ, kyūṅki wuh zinākār hī hai.’

⁴⁴aisā hī huā. mard un behayā bahnoṅ aholā aur aholībā se yūṅ hambistar hue jis tarah kasbiyoṅ se.

⁴⁵lekin rāstbāz ādmī un kī adālat karke unheṅ zinā aur qatl ke mujrim ṭhahrāeṅge. kyūṅki donoṅ bahneṅ zinākār aur qātil hī haiṅ.

⁴⁶rab qādir-e-mutlaq farmātā hai ki un ke ḳhilāf julūs nikāl kar unheṅ dahshat aur lūṭ-mār ke hawāle karo.

⁴⁷log unheṅ sangsār karke talwār se ṭukṛe ṭukṛe kareṅ, wuh un ke beṭe-beṭiyoṅ ko mār ḍāleṅ aur un ke gharoṅ ko nazar-e-ātish kareṅ.

⁴⁸yūṅ maiṅ mulk meṅ zinākārī ḳhatm karūṅga. is se tamām auratoṅ ko tambīh milegī ki wuh tumhāre sharmnāk namūne par na chaleṅ.

⁴⁹tumheṅ zinākārī aur butparastī kī munāsib sazā milegī. tab tum jān logī ki maiṅ rab qādir-e-mutlaq hūṅ.”