Read Roman Urdu Geo hizqī'el 38 Bible Online

hizqī'el 38 - Roman Urdu Geo bible

hizqī'el 38

¹rab mujh se hamkalām huā,

²“ai ādamzād, mulk-e-mājūj ke hukmrān jūj kī taraf ruḳh kar jo masak aur tūbal kā ālā raīs hai. us ke ḳhilāf nabuwwat karke

³kah, ‘rab qādir-e-mutlaq farmātā hai ki ai masak aur tūbal ke ālā raīs jūj, ab maiṅ tujh se nipaṭ lūṅgā.

⁴maiṅ tere muṅh ko pher dūṅgā, tere muṅh meṅ kāṅṭe ḍāl kar tujhe pūrī fauj samet nikāl dūṅgā. shāndār wardiyoṅ se ārāstā tere tamām ghuṛsawār aur faujī apne ghoṛoṅ samet nikal āeṅge, go terī baṛī fauj ke mard chhoṭī aur baṛī ḍhāleṅ uṭhāe phireṅge, aur har ek talwār se les hogā.

⁵fāras, ethūpiyā aur libiyā ke mard bhī fauj meṅ shāmil hoṅge. har ek baṛī ḍhāl aur ḳhod se musallah hogā.

⁶jumar aur shimāl ke dūrdarāz ilāqe bait-tujarmā ke tamām daste bhī sāth hoṅge. ġharz us waqt bahut sī qaumeṅ tere sāth nikleṅgī.

⁷chunāṅche musta'id ho jā! jitne lashkar tere irdgird jamā ho gae haiṅ un ke sāth mil kar ḳhūb tayyāriyāṅ kar! un ke lie pahrādārī kar.

⁸muta'addid dinoṅ ke bād tujhe mulk-e-isrāīl par hamlā karne ke lie bulāyā jāegā jise abhī jang se chhuṭkārā milā hogā aur jis ke jilāwatan dīgar bahut sī qaumoṅ meṅ se wāpas ā gae hoṅge. go isrāīl kā pahāṛī ilāqā baṛī der se barbād huā hogā, lekin us waqt us ke bāshinde jilāwatanī se wāpas ā kar amn-o-amān se us meṅ baseṅge.

⁹tab tū tūfān kī tarah āge baṛhegā, tere daste bādal kī tarah pūre mulk par chhā jāeṅge. tere sāth bahut sī qaumeṅ hoṅgī.

¹⁰rab qādir-e-mutlaq farmātā hai ki us waqt tere zahan meṅ bure ḳhayālāt ubhar āeṅge aur tū sharīr mansūbe bāndhegā.

¹¹tū kahegā, “yih mulk khulā hai, aur us ke bāshinde ārām aur sukūn ke sāth rah rahe haiṅ. āo, maiṅ un par hamlā karūṅ, kyūṅki wuh apnī hifāzat nahīṅ kar sakte. na un kī chārdīwārī hai, na darwāzā yā kunḍā.

¹²maiṅ isrāīliyoṅ ko lūṭ lūṅgā. jo shahr pahle khanḍarāt the lekin ab nae sire se ābād hue haiṅ un par maiṅ ṭūṭ paṛūṅgā. jo jilāwatan dīgar aqwām se wāpas ā gae haiṅ un kī daulat maiṅ chhīn lūṅgā. kyūṅki unheṅ kāfī māl-maweshī hāsil hue haiṅ, aur ab wuh duniyā ke markaz meṅ ā base haiṅ.”

¹³sabā, dadān aur tarsīs ke tājir aur buzurg pūchheṅge ki kyā tū ne wāqaī apne faujiyoṅ ko lūṭ-mār ke lie ikaṭṭhā kar liyā hai? kyā tū wāqaī sonā-chāṅdī, māl-maweshī aur bāqī bahut sī daulat chhīnanā chāhtā hai?’

¹⁴ai ādamzād, nabuwwat karke jūj ko batā, ‘rab qādir-e-mutlaq farmātā hai ki us waqt tujhe patā chalegā ki merī qaum isrāīl sukūn se zindagī guzār rahī hai,

¹⁵aur tū dūrdarāz shimāl ke apne mulk se niklegā. terī wasī aur tāqatwar fauj meṅ muta'addid qaumeṅ shāmil hoṅgī, aur sab ghoṛoṅ par sawār

¹⁶merī qaum isrāīl par dhāwā bol deṅge. wuh us par bādal kī tarah chhā jāeṅge. ai jūj, un āḳhirī dinoṅ meṅ maiṅ ḳhud tujhe apne mulk par hamlā karne dūṅgā tāki dīgar aqwām mujhe jān leṅ. kyūṅki jo kuchh maiṅ un ke deḳhte deḳhte tere sāth karūṅga us se merā muqaddas kirdār un par zāhir ho jāegā.

¹⁷rab qādir-e-mutlaq farmātā hai ki tū wuhī hai jis kā zikr maiṅ ne māzī meṅ kiyā thā. kyūṅki māzī meṅ mere ḳhādim yānī isrāīl ke nabī kāfī sāloṅ se peshgoī karte rahe ki maiṅ tujhe isrāīl ke ḳhilāf bhejūṅgā.

¹⁸rab qādir-e-mutlaq farmātā hai ki jis din jūj mulk-e-isrāīl par hamlā karegā us din maiṅ āg-bagūlā ho jāūṅgā.

¹⁹maiṅ farmātā hūṅ ki us din merī ġhairat aur shadīd qahr yūṅ bhaṛak uṭhegā ki yaqīnan mulk-e-isrāīl meṅ zabardast zalzalā āegā.

²⁰sab mere sāmne thartharā uṭheṅge, ḳhwāh machhliyāṅ hoṅ yā parinde, ḳhwāh zamīn par chalne aur reṅgne wāle jānwar hoṅ yā insān. pahāṛ un kī guzargāhoṅ samet ḳhāk meṅ milāe jāeṅge, aur har dīwār gir jāegī.

²¹rab qādir-e-mutlaq farmātā hai ki maiṅ apne tamām pahāṛī ilāqe meṅ jūj ke ḳhilāf talwār bhejūṅgā. tab sab āpas meṅ laṛne lageṅge.

²²maiṅ un meṅ mohlak bīmāriyāṅ aur qatl-o-ġhārat phailā kar un kī adālat karūṅga. sāth sāth maiṅ mūslādhār bārish, ole, āg aur gandhak jūj aur us kī bain-ul-aqwāmī fauj par barsā dūṅgā.

²³yūṅ maiṅ apnā azīm aur muqaddas kirdār muta'addid qaumoṅ par zāhir karūṅga, un ke deḳhte deḳhte apne āp kā izhār karūṅga. tab wuh jān leṅgī ki maiṅ hī rab hūṅ.’