Read Roman Urdu Geo hizqī'el 47 Bible Online

hizqī'el 47 - Roman Urdu Geo bible

hizqī'el 47

¹is ke bād merā rāhnumā mujhe ek bār phir rab ke ghar ke darwāze ke pās le gayā. yih darwāzā mashriq meṅ thā, kyūṅki rab ke ghar kā ruḳh hī mashriq kī taraf thā. maiṅ ne dekhā ki dahlīz ke nīche se pānī nikal rahā hai. darwāze se nikal kar wuh pahle rab ke ghar kī junūbī dīwār ke sāth sāth bahtā thā, phir qurbāngāh ke junūb meṅ se guzar kar mashriq kī taraf bah niklā.

²merā rāhnumā mere sāth bairūnī sahan ke shimālī darwāze meṅ se niklā. bāhar chārdīwārī ke sāth sāth chalte chalte ham bairūnī sahan ke mashriqī darwāze ke pās pahuṅch gae. maiṅ ne dekhā ki pānī is darwāze ke junūbī hisse meṅ se nikal rahā hai.

³ham pānī ke kināre kināre chal paṛe. mere rāhnumā ne apne fīte ke sāth ādhā kilomīṭar kā fāsilā nāpā. phir us ne mujhe pānī meṅ se guzarne ko kahā. yahāṅ pānī ṭaḳhnoṅ tak pahuṅchtā thā.

⁴us ne mazīd ādhe kilomīṭar kā fāsilā nāpā, phir mujhe dubārā pānī meṅ se guzarne ko kahā. ab pānī ghuṭnoṅ tak pahuṅchā. jab us ne tīsrī martabā ādhā kilomīṭar kā fāsilā nāp kar mujhe us meṅ se guzarne diyā to pānī kamr tak pahuṅchā.

⁵ek āḳhirī dafā us ne ādhe kilomīṭar kā fāsilā nāpā. ab maiṅ pānī meṅ se guzar na sakā. pānī itnā gahrā thā ki us meṅ se guzarne ke lie tairne kī zarūrat thī.

⁶us ne mujh se pūchhā, “ai ādamzād, kyā tū ne ġhaur kiyā hai?” phir wuh mujhe daryā ke kināre tak wāpas lāyā.

⁷jab wāpas āyā to maiṅ ne dekhā ki daryā ke donoṅ kināroṅ par muta'addid daraḳht lage haiṅ.

⁸wuh bolā, “yih pānī mashriq kī taraf bah kar wādī-e-yardan meṅ pahuṅchtā hai. use pār karke wuh bahīrā-e-murdār meṅ ā jātā hai. us ke asar se bahīrā-e-murdār kā namkīn pānī pīne ke qābil ho jāegā.

⁹jahāṅ bhī daryā bahegā wahāṅ ke beshumār jāndār jīte raheṅge. bahut machhliyāṅ hoṅgī, aur daryā bahīrā-e-murdār kā namkīn pānī pīne ke qābil banāegā. jahāṅ se bhī guzaregā wahāṅ sab kuchh phaltā phūltā rahegā.

¹⁰ain-jadī se le kar ain-ajlaim tak us ke kināroṅ par machhere khaṛe hoṅge. har taraf un ke jāl sūkhne ke lie phailāe hue nazar āeṅge. daryā meṅ har qism kī machhliyāṅ hoṅgī, utnī jitnī bahīrā-e-rūm meṅ pāī jātī haiṅ.

¹¹sirf bahīrā-e-murdār ke irdgird kī daldalī jaghoṅ aur johaṛoṅ kā pānī namkīn rahegā, kyūṅki wuh namak hāsil karne ke lie istemāl hogā.

¹²daryā ke donoṅ kināroṅ par har qism ke phaldār daraḳht ugeṅge. in daraḳhtoṅ ke patte na kabhī murjhāeṅge, na kabhī un kā phal ḳhatm hogā. wuh har mahīne phal lāeṅge, is lie ki maqdis kā pānī un kī ābpāshī kartā rahegā. un kā phal logoṅ kī ḳhurāk banegā, aur un ke patte shifā deṅge.”

¹³phir rab qādir-e-mutlaq ne farmāyā, “maiṅ tujhe us mulk kī sarhaddeṅ batātā hūṅ jo bārah qabīloṅ meṅ taqsīm karnā hai. yūsuf ko do hisse dene haiṅ, bāqī qabīloṅ ko ek ek hissā.

¹⁴maiṅ ne apnā hāth uṭhā kar qasam khāī thī ki maiṅ yih mulk tumhāre bāpdādā ko atā karūṅga, is lie tum yih mulk mīrās meṅ pāoge. ab use āpas meṅ barābar taqsīm kar lo.

¹⁵shimālī sarhad bahīrā-e-rūm se shurū ho kar mashriq kī taraf hatlūn, labo-hamāt aur sidād ke pās se guzartī hai.

¹⁶wahāṅ se wuh berotā aur sibraim ke pās pahuṅchtī hai (sibraim mulk-e-damishq aur mulk-e-hamāt ke darmiyān wāqe hai). phir sarhad hasar-enān shahr tak āge nikaltī hai jo haurān kī sarhad par wāqe hai.

¹⁷ġharz shimālī sarhad bahīrā-e-rūm se le kar hasar-enān tak pahuṅchtī hai. damishq aur hamāt kī sarhaddeṅ us ke shimāl meṅ haiṅ.

¹⁸mulk kī mashriqī sarhad wahāṅ shurū hotī hai jahāṅ damishq kā ilāqā haurān ke pahāṛī ilāqe se miltā hai. wahāṅ se sarhad daryā-e-yardan ke sāth sāth chaltī huī junūb meṅ bahīrā-e-rūm ke pās tamr shahr tak pahuṅchtī hai. yūṅ daryā-e-yardan mulk-e-isrāīl kī mashriqī sarhad aur mulk-e-jiliād kī maġhribī sarhad hai.

¹⁹junūbī sarhad tamr se shurū ho kar junūb-maġhrib kī taraf chaltī chaltī marībā-qādis ke chashmoṅ tak pahuṅchtī hai. phir wuh shimāl-maġhrib kī taraf ruḳh karke misr kī sarhad yānī wādī-e-misr ke sāth sāth bahīrā-e-rūm tak pahuṅchtī hai.

²⁰maġhribī sarhad bahīrā-e-rūm hai jo shimāl meṅ labo-hamāt ke muqābil ḳhatm hotī hai.

²¹mulk ko apne qabīloṅ meṅ taqsīm karo!

²²yih tumhārī maurūsī zamīn hogī. jab tum qur'ā ḍāl kar use āpas meṅ taqsīm karo to un ġhairmulkiyoṅ ko bhī zamīn milnī hai jo tumhāre darmiyān rahte aur jin ke bachche yahāṅ paidā hue haiṅ. tumhārā un ke sāth waisā sulūk ho jaisā isrāīliyoṅ ke sāth. qur'ā ḍālte waqt unheṅ isrāīlī qabīloṅ ke sāth zamīn milnī hai.

²³rab qādir-e-mutlaq farmātā hai ki jis qabīle meṅ bhī pardesī ābād hoṅ wahāṅ tumheṅ unheṅ maurūsī zamīn denī hai.