Read Roman Urdu Geo hizqī'el 48 Bible Online

hizqī'el 48 - Roman Urdu Geo bible

hizqī'el 48

¹isrāīl kī shimālī sarhad bahīrā-e-rūm se shurū ho kar mashriq kī taraf hatlūn, labo-hamāt aur hasar-enān ke pās se guzartī hai. damishq aur hamāt sarhad ke shimāl meṅ haiṅ. har qabīle ko mulk kā ek hissā milegā. har ḳhitte kā ek sirā mulk kī mashriqī sarhad aur dūsrā sirā maġhribī sarhad hogā. shimāl se le kar junūb tak qabāilī ilāqoṅ kī yih tartīb hogī: dān, āshar, naftālī, manassī, ifrāīm, rūbin aur yahūdāh.

⁸yahūdāh ke junūb meṅ wuh ilāqā hogā jo tumheṅ mere lie alag karnā hai. qabāilī ilāqoṅ kī tarah us kā bhī ek sirā mulk kī mashriqī sarhad aur dūsrā sirā maġhribī sarhad hogā. shimāl se junūb tak kā fāsilā sāṛhe 12 kilomīṭar hai. us ke bīch meṅ maqdis hai.

⁹is ilāqe ke darmiyān ek ḳhās ḳhittā hogā. mashriq se maġhrib tak us kā fāsilā sāṛhe 12 kilomīṭar hogā jabki shimāl se junūb tak fāsilā 10 kilomīṭar hogā. rab ke lie maḳhsūs is ḳhitte

¹⁰kā ek hissā imāmoṅ ke lie maḳhsūs hogā. is hisse kā fāsilā mashriq se maġhrib tak sāṛhe 12 kilomīṭar aur shimāl se junūb tak 5 kilomīṭar hogā. is ke bīch meṅ hī rab kā maqdis hogā.

¹¹yih muqaddas ilāqā lāwī ke ḳhāndān sadoq ke maḳhsūs-o-muqaddas kie gae imāmoṅ ko diyā jāegā. kyūṅki jab isrāīlī mujh se bargashtā hue to bāqī lāwī un ke sāth bhaṭak gae. lekin sadoq kā ḳhāndān wafādārī se merī ḳhidmat kartā rahā.

¹²is lie unheṅ mere lie maḳhsūs ilāqe kā muqaddastarīn hissā milegā. yih lāwiyoṅ ke ḳhitte ke shimāl meṅ hogā.

¹³imāmoṅ ke junūb meṅ bāqī lāwiyoṅ kā ḳhittā hogā. mashriq se maġhrib tak us kā fāsilā sāṛhe 12 kilomīṭar aur shimāl se junūb tak 5 kilomīṭar hogā.

¹⁴rab ke lie maḳhsūs yih ilāqā pūre mulk kā behtarīn hissā hai. us kā koī bhī plāṭ kisī dūsre ke hāth meṅ dene kī ijāzat nahīṅ. use na bechā jāe, na kisī dūsre ko kisī plāṭ ke iwaz meṅ diyā jāe. kyūṅki yih ilāqā rab ke lie maḳhsūs-o-muqaddas hai.

¹⁵rab ke maqdis ke is ḳhās ilāqe ke junūb meṅ ek aur ḳhittā hogā jis kī lambāī sāṛhe 12 kilomīṭar aur chauṛāī aṛhāī kilomīṭar hai. wuh muqaddas nahīṅ hai balki ām logoṅ kī rihāish ke lie hogā. is ke bīch meṅ shahr hogā, jis ke irdgird charāgāheṅ hoṅgī.

¹⁶yih shahr murabbā shakl kā hogā. lambāī aur chauṛāī donoṅ sawā do do kilomīṭar hogī.

¹⁷shahr ke chāroṅ taraf jānwaroṅ ko charāne kī khulī jagah hogī jis kī chauṛāī 133 mīṭar hogī.

¹⁸chūṅki shahr apne ḳhitte ke bīch meṅ hogā is lie mazkūrā khulī jagah ke mashriq meṅ ek ḳhittā bāqī rah jāegā jis kā mashriq se shahr tak fāsilā 5 kilomīṭar aur shimāl se junūb tak fāsilā aṛhāī kilomīṭar hogā. shahr ke maġhrib meṅ bhī itnā hī baṛā ḳhittā hogā. in do ḳhittoṅ meṅ khetībāṛī kī jāegī jis kī paidāwār shahr meṅ kām karne wāloṅ kī ḳhurāk hogī.

¹⁹shahr meṅ kām karne wāle tamām qabīloṅ ke hoṅge. wuhī in khetoṅ kī khetībāṛī kareṅge.

²⁰chunāṅche mere lie alag kiyā gayā yih pūrā ilāqā murabbā shakl kā hai. us kī lambāī aur chauṛāī sāṛhe bārah bārah kilomīṭar hai. is meṅ shahr bhī shāmil hai.

²¹mazkūrā muqaddas ḳhitte meṅ maqdis, imāmoṅ aur bāqī lāwiyoṅ kī zamīneṅ haiṅ. us ke mashriq aur maġhrib meṅ bāqīmāndā zamīn hukmrān kī milkiyat hai. muqaddas ḳhitte ke mashriq meṅ hukmrān kī zamīn mulk kī mashriqī sarhad tak hogī aur muqaddas ḳhitte ke maġhrib meṅ wuh samundar tak hogī. shimāl se junūb tak wuh muqaddas ḳhitte jitnī chauṛī yānī sāṛhe 12 kilomīṭar hogī. shimāl meṅ yahūdāh kā qabāilī ilāqā hogā aur junūb meṅ binyamīn kā.

²³mulk ke is ḳhās darmiyānī hisse ke junūb meṅ bāqī qabīloṅ ko ek ek ilāqā milegā. har ilāqe kā ek sirā mulk kī mashriqī sarhad aur dūsrā sirā bahīrā-e-rūm hogā. shimāl se le kar junūb tak qabāilī ilāqoṅ kī yih tartīb hogī: binyamīn, shamāūn, ishkār, zabūlūn aur jad.

²⁸jad ke qabīle kī junūbī sarhad mulk kī sarhad bhī hai. wuh tamr se junūb-maġhrib meṅ marībā-qādis ke chashmoṅ tak chaltī hai, phir misr kī sarhad yānī wādī-e-misr ke sāth sāth shimāl-maġhrib kā ruḳh karke bahīrā-e-rūm tak pahuṅchtī hai.

²⁹rab qādir-e-mutlaq farmātā hai ki yihī tumhārā mulk hogā! use isrāīlī qabīloṅ meṅ taqsīm karo. jo kuchh bhī unheṅ qur'ā ḍāl kar mile wuh un kī maurūsī zamīn hogī.

³⁰yarūshalam shahr ke 12 darwāze hoṅge. fasīl kī chāroṅ dīwāreṅ sawā do do kilomīṭar lambī hoṅgī. har dīwār ke tīn darwāze hoṅge, ġharz kul bārah darwāze hoṅge. har ek kā nām kisī qabīle kā nām hogā. chunāṅche shimāl meṅ rūbin kā darwāzā, yahūdāh kā darwāzā aur lāwī kā darwāzā hogā, mashriq meṅ yūsuf kā darwāzā, binyamīn kā darwāzā aur dān kā darwāzā hogā, junūb meṅ shamāūn kā darwāzā, ishkār kā darwāzā aur zabūlūn kā darwāzā hogā, aur maġhrib meṅ jad kā darwāzā, āshar kā darwāzā aur naftālī kā darwāzā hogā.

³⁵fasīl kī pūrī lambāī 9 kilomīṭar hai. tab shahr ‘yahāṅ rab hai’ kahlāegā.!”