Read Roman Urdu Geo hizqī'el 6 Bible Online

hizqī'el 6 - Roman Urdu Geo bible

hizqī'el 6

¹rab mujh se hamkalām huā,

²“ai ādamzād, isrāīl ke pahāṛoṅ kī taraf ruḳh karke un ke ḳhilāf nabuwwat kar.

³un se kah, ‘ai isrāīl ke pahāṛo, rab qādir-e-mutlaq kā kalām suno! wuh pahāṛoṅ, pahāṛiyoṅ, ghāṭiyoṅ aur wādiyoṅ ke bāre meṅ farmātā hai ki maiṅ tumhāre ḳhilāf talwār chalā kar tumhārī ūṅchī jaghoṅ ke mandiroṅ ko tabāh kar dūṅgā.

⁴jin qurbāngāhoṅ par tum apne jānwar aur baḳhūr jalāte ho wuh ḍhā dūṅgā. maiṅ tere maqtūloṅ ko tere butoṅ ke sāmne hī phaiṅk chhoṛūṅgā.

⁵maiṅ isrāīliyoṅ kī lāshoṅ ko un ke butoṅ ke sāmne ḍāl kar tumhārī haḍḍiyoṅ ko tumhārī qurbāngāhoṅ ke irdgird bikher dūṅgā.

⁶jahāṅ bhī tum ābād ho wahāṅ tumhāre shahr khanḍarāt ban jāeṅge aur ūṅchī jaghoṅ ke mandir mismār ho jāeṅge. kyūṅki lāzim hai ki jin qurbāngāhoṅ par tum apne jānwar aur baḳhūr jalāte ho wuh ḳhāk meṅ milāī jāeṅ, ki tumhāre butoṅ ko pāsh pāsh kiyā jāe, ki tumhārī butparastī kī chīzeṅ nest-o-nābūd ho jāeṅ.

⁷maqtūl tumhāre darmiyān gir kar paṛe raheṅge. tab tum jān loge ki maiṅ hī rab hūṅ.

⁸lekin maiṅ chand ek ko zindā chhoṛūṅgā. kyūṅki jab tumheṅ dīgar mamālik aur aqwām meṅ muntashir kiyā jāegā to kuchh talwār se bache raheṅge.

⁹jab yih log qaidī ban kar muḳhtalif mamālik meṅ lāe jāeṅge to unheṅ merā ḳhayāl āegā. unheṅ yād āegā ki mujhe kitnā ġham khānā paṛā jab un ke zinākār dil mujh se dūr hue aur un kī āṅkheṅ apne butoṅ se zinā kartī rahīṅ. tab wuh yih soch kar ki ham ne kitnā burā kām kiyā aur kitnī makrūh harkateṅ kī haiṅ apne āp se ghin khāeṅge.

¹⁰us waqt wuh jān leṅge ki maiṅ rab hūṅ, ki un par yih āfat lāne kā elān karte waqt maiṅ ḳhālī bāteṅ nahīṅ kar rahā thā’.”

¹¹phir rab qādir-e-mutlaq ne mujh se farmāyā, “tāliyāṅ bajā kar pāoṅ zor se zamīn par mār! sāth sāth yih kah, isrāīlī qaum kī ghinaunī harkatoṅ par afsos! wuh talwār, kāl aur mohlak bīmāriyoṅ kī zad meṅ ā kar halāk ho jāeṅge.

¹²jo dūr hai wuh mohlak wabā se mar jāegā, jo qarīb hai wuh talwār se qatl ho jāegā, aur jo bach jāe wuh bhūke maregā. yūṅ maiṅ apnā ġhazab un par nāzil karūṅga.

¹³wuh jān leṅge ki maiṅ rab hūṅ jab un ke maqtūl un ke butoṅ ke darmiyān, un kī qurbāngāhoṅ ke irdgird, har pahāṛ aur pahāṛ kī choṭī par aur har hare daraḳht aur balūt ke ghane daraḳht ke sāy meṅ nazar āeṅge. jahāṅ bhī wuh apne butoṅ ko ḳhush karne ke lie koshāṅ rahe wahāṅ un kī lāsheṅ pāī jāeṅgī.

¹⁴maiṅ apnā hāth un ke ḳhilāf uṭhā kar mulk ko yahūdāh ke registān se le kar diblā tak tabāh kar dūṅgā. un kī tamām ābādiyāṅ wīrān-o-sunsān ho jāeṅgī. tab wuh jān leṅge ki maiṅ hī rab hūṅ.”