Read Roman Urdu Geo dānyāl 12 Bible Online

dānyāl 12 - Roman Urdu Geo bible

dānyāl 12

¹us waqt farishtoṅ kā azīm sardār mīkāel uṭh khaṛā hogā, wuh jo terī qaum kī shafā'at kartā hai. musībat kā aisā waqt hogā ki qaumoṅ ke paidā hone se le kar us waqt tak nahīṅ huā hogā. lekin sāth sāth terī qaum ko najāt milegī. jis kā bhī nām allāh kī kitāb meṅ darj hai wuh najāt pāegā.

²tab ḳhāk meṅ soe hue muta'addid log jāg uṭheṅge, kuchh abadī zindagī pāne ke lie aur kuchh abadī ruswāī aur ghin kā nishānā banane ke lie.

³jo samajhdār haiṅ wuh āsmān kī āb-o-tāb kī mānind chamkeṅge, aur jo bahutoṅ ko rāst rāh par lāe haiṅ wuh hameshā tak sitāroṅ kī tarah jagmagāeṅge.

⁴lekin tū, ai dānyāl, in bātoṅ ko chhupāe rakh! is kitāb par āḳhirī waqt tak muhr lagā de! bahut log idhar udhar ghūmte phireṅge, aur ilm meṅ izāfā hotā jāegā.”

⁵phir maiṅ, dānyāl ne daryā ke pās do ādmiyoṅ ko dekhā. ek is kināre par khaṛā thā jabki dūsrā dūsre kināre par.

⁶katān se mulabbas ādmī bahte hue pānī ke ūpar thā. kināroṅ par khaṛe ādmiyoṅ meṅ se ek ne us se pūchhā, “in hairatangez bātoṅ kī takmīl tak mazīd kitnī der lagegī?”

⁷katān se mulabbas ādmī ne donoṅ hāth āsmān kī taraf uṭhāe aur abad tak zindā ḳhudā kī qasam khā kar bolā, “pahle ek arsā, phir do arse, phir ādhā arsā guzaregā. pahle muqaddas qaum kī tāqat ko pāsh pāsh karne kā silsilā iḳhtitām par pahuṅchnā hai. is ke bād hī yih tamām bāteṅ takmīl tak pahuṅcheṅgī.”

⁸go maiṅ ne us kī yih bāt sunī, lekin wuh merī samajh meṅ na āī. chunāṅche maiṅ ne pūchhā, “mere āqā, in tamām bātoṅ kā kyā anjām hogā?”

⁹wuh bolā, “ai dānyāl, ab chalā jā! kyūṅki in bātoṅ ko āḳhirī waqt tak chhupāe rakhnā hai. us waqt tak in par muhr lagī rahegī.

¹⁰bahutoṅ ko āzmā kar pāk-sāf aur ḳhālis kiyā jāegā. lekin bedīn bedīn hī raheṅge. koī bhī bedīn yih nahīṅ samjhegā, lekin samajhdāroṅ ko samajh āegī.

¹¹jis waqt se rozānā kī qurbānī kā intizām band kiyā jāegā aur tabāhī ke makrūh but ko maqdis meṅ khaṛā kiyā jāegā us waqt se 1,290 din guzareṅge.

¹²jo sabar karke 1,335 dinoṅ ke iḳhtitām tak qāim rahe wuh mubārak hai!

¹³jahāṅ tak terā tālluq hai, āḳhirī waqt kī taraf baṛhtā chalā jā! tū ārām karegā aur phir dinoṅ ke iḳhtitām par jī uṭh kar apnī mīrās pāegā.”