Read Roman Urdu Geo dānyāl 2 Bible Online

dānyāl 2 - Roman Urdu Geo bible

dānyāl 2

¹apnī hukūmat ke dūsre sāl meṅ nabūkadnazzar ne ḳhwāb dekhā. ḳhwāb itnā haulnāk thā ki wuh ghabrā kar jāg uṭhā.

²us ne hukm diyā ki tamām qismat kā hāl batāne wāle, jādūgar, afsūṅgar aur najūmī mere pās ā kar ḳhwāb kā matlab batāeṅ. jab wuh hāzir hue

³to bādshāh bolā, “maiṅ ne ek ḳhwāb dekhā hai jo mujhe bahut pareshān kar rahā hai. ab maiṅ us kā matlab jānanā chāhtā hūṅ.”

⁴nujūmiyoṅ ne arāmī zabān meṅ jawāb diyā, “bādshāh salāmat apne ḳhādimoṅ ke sāmne yih ḳhwāb bayān kareṅ to ham us kī tābīr kareṅge.”

⁵lekin bādshāh bolā, “nahīṅ, tum hī mujhe wuh kuchh batāo aur us kī tābīr karo jo maiṅ ne ḳhwāb meṅ dekhā. agar tum yih na kar sako to maiṅ hukm dūṅgā ki tumheṅ ṭukṛe ṭukṛe kar diyā jāe aur tumhāre ghar kachre ke ḍher ho jāeṅ. yih merā musammam irādā hai.

⁶lekin agar tum mujhe wuh kuchh batā kar us kī tābīr karo jo maiṅ ne ḳhwāb meṅ dekhā to maiṅ tumheṅ achchhe tohfe aur in'ām dūṅgā, nīz tumhārī ḳhās izzat karūṅga. ab shurū karo! mujhe wuh kuchh batāo aur us kī tābīr karo jo maiṅ ne ḳhwāb meṅ dekhā.”

⁷ek bār phir unhoṅ ne minnat kī, “bādshāh apne ḳhādimoṅ ke sāmne apnā ḳhwāb batāeṅ to ham zarūr us kī tābīr kareṅge.”

⁸bādshāh ne jawāb diyā, “mujhe sāf patā hai ki tum kyā kar rahe ho! tum sirf ṭāl-maṭol kar rahe ho, kyūṅki tum samajh gae ho ki merā irādā pakkā hai.

⁹agar tum mujhe ḳhwāb na batāo to tum sab ko ek hī sazā dī jāegī. kyūṅki tum sab jhūṭ aur ġhalat bāteṅ pesh karne par muttafiq ho gae ho, yih ummīd rakhte hue ki hālāt kisī waqt badal jāeṅge. mujhe ḳhwāb batāo to mujhe patā chal jāegā ki tum mujhe us kī sahīh tābīr pesh kar sakte ho.”

¹⁰nujūmiyoṅ ne etirāz kiyā, “duniyā meṅ koī bhī insān wuh kuchh nahīṅ kar pātā jo bādshāh māṅgte haiṅ. yih kabhī huā bhī nahīṅ ki kisī bādshāh ne aisī bāt kisī qismat kā hāl batāne wāle, jādūgar yā najūmī se talab kī, ḳhwāh bādshāh kitnā azīm kyūṅ na thā.

¹¹jis chīz kā taqāzā bādshāh karte haiṅ wuh had se zyādā mushkil hai. sirf dewatā hī yih bāt bādshāh par zāhir kar sakte haiṅ, lekin wuh to insān ke darmiyān rahte nahīṅ.”

¹²yih sun kar bādshāh āg-bagūlā ho gayā. baṛe ġhusse meṅ us ne hukm diyā ki bābal ke tamām dānishmandoṅ ko sazā-e-maut dī jāe.

¹³farmān sādir huā ki dānishmandoṅ ko mār ḍālnā hai. chunāṅche dānyāl aur us ke dostoṅ ko bhī talāsh kiyā gayā tāki unheṅ sazā-e-maut deṅ.

¹⁴shāhī muhāfizoṅ kā afsar banām aryūk abhī dānishmandoṅ ko mār ḍālne ke lie rawānā huā ki dānyāl baṛī hikmat aur mauqāshanāsī se us se muḳhātib huā.

¹⁵us ne afsar se pūchhā, “bādshāh ne itnā saḳht farmān kyūṅ jārī kiyā?” aryūk ne dānyāl ko sārā muāmalā bayān kiyā.

¹⁶dānyāl fauran bādshāh ke pās gayā aur us se darḳhwāst kī, “zarā mujhe kuchh muhlat dījie tāki maiṅ bādshāh ke ḳhwāb kī tābīr kar sakūṅ.”

¹⁷phir wuh apne ghar wāpas gayā aur apne dostoṅ hananiyāh, mīsāel aur azariyāh ko tamām sūrat-e-hāl sunāī.

¹⁸wuh bolā, “āsmān ke ḳhudā se iltijā kareṅ ki wuh mujh par rahm kare. minnat kareṅ ki wuh mere lie bhed khole tāki ham dīgar dānishmandoṅ ke sāth halāk na ho jāeṅ.”

¹⁹rāt ke waqt dānyāl ne royā dekhī jis meṅ us ke lie bhed kholā gayā. tab us ne āsmān ke ḳhudā kī hamd-o-sanā kī,

²⁰“allāh ke nām kī tamjīd azal se abad tak ho. wuhī hikmat aur quwwat kā mālik hai.

²¹wuhī auqāt aur zamāne badalne detā hai. wuhī bādshāhoṅ ko taḳht par biṭhā detā aur unheṅ taḳht par se utār detā hai. wuhī dānishmandoṅ ko dānāī aur samajhdāroṅ ko samajh atā kartā hai.

²²wuhī gahrī aur poshīdā bāteṅ zāhir kartā hai. jo kuchh andhere meṅ chhupā rahtā hai us kā ilm wuh rakhtā hai, kyūṅki wuh raushnī se ghirā rahtā hai.

²³ai mere bāpdādā ke ḳhudā, maiṅ terī hamd-o-sanā kartā hūṅ! tū ne mujhe hikmat aur tāqat atā kī hai. jo bāt ham ne tujh se māṅgī wuh tū ne ham par zāhir kī, kyūṅki tū ne ham par bādshāh kā ḳhwāb zāhir kiyā hai.”

²⁴phir dānyāl aryūk ke pās gayā jise bādshāh ne bābal ke dānishmandoṅ ko sazā-e-maut dene kī zimmādārī dī thī. us ne us se darḳhwāst kī, “bābal ke dānishmandoṅ ko maut ke ghāṭ na utāreṅ, kyūṅki maiṅ bādshāh ke ḳhwāb kī tābīr kar saktā hūṅ. mujhe bādshāh ke huzūr pahuṅchā deṅ to maiṅ unheṅ sab kuchh batā dūṅgā.”

²⁵yih sun kar aryūk bhāg kar dānyāl ko bādshāh ke huzūr le gayā. wuh bolā, “mujhe yahūdāh ke jilāwatanoṅ meṅ se ek ādmī mil gayā jo bādshāh ko ḳhwāb kā matlab batā saktā hai.”

²⁶tab nabūkadnazzar ne dānyāl se jo beltashazzar kahlātā thā pūchhā, “kyā tum mujhe wuh kuchh batā sakte ho jo maiṅ ne ḳhwāb meṅ dekhā? kyā tum us kī tābīr kar sakte ho?”

²⁷dānyāl ne jawāb diyā, “jo bhed bādshāh jānanā chāhte haiṅ use kholne kī kunjī kisī bhī dānishmand, jādūgar, qismat kā hāl batāne wāle yā ġhaibdān ke pās nahīṅ hotī.

²⁸lekin āsmān par ek ḳhudā hai jo bhedoṅ kā matlab insān par zāhir kar detā hai. usī ne nabūkadnazzar bādshāh ko dikhāyā ki āne wāle dinoṅ meṅ kyā kuchh pesh āegā. sote waqt āp ne ḳhwāb meṅ royā dekhī.

²⁹ai bādshāh, jab āp palang par leṭe hue the to āp ke zahan meṅ āne wāle dinoṅ ke bāre meṅ ḳhayālāt ubhar āe. tab bhedoṅ ko kholne wāle ḳhudā ne āp par zāhir kiyā ki āne wāle dinoṅ meṅ kyā kuchh pesh āegā.

³⁰is bhed kā matlab mujh par zāhir huā hai, lekin is lie nahīṅ ki mujhe dīgar tamām dānishmandoṅ se zyādā hikmat hāsil hai balki is lie ki āp ko bhed kā matlab mālūm ho jāe aur āp samajh sakeṅ ki āp ke zahan meṅ kyā kuchh ubhar āyā hai.

³¹ai bādshāh, royā meṅ āp ne apne sāmne ek baṛā aur lambā-taṛangā mujassamā dekhā jo tezī se chamak rahā thā. shakl-o-sūrat aisī thī ki insān ke roṅgṭe khaṛe ho jāte the.

³²sar ḳhālis sone kā thā jabki sīnā aur bāzū chāṅdī ke, peṭ aur rān pītal kī

³³aur pinḍliyāṅ lohe kī thīṅ. us ke pāoṅ kā ādhā hissā lohā aur ādhā hissā pakī huī miṭṭī thā.

³⁴āp is manzar par ġhaur hī kar rahe the ki achānak kisī pahāṛī ḍhalān se patthar kā baṛā ṭukṛā alag huā. yih baġhair kisī insānī hāth ke huā. patthar ne dhaṛām se mujassame ke lohe aur miṭṭī ke pāoṅ par gir kar donoṅ ko chūr chūr kar diyā.

³⁵natīje meṅ pūrā mujassamā pāsh pāsh ho gayā. jitnā bhī lohā, miṭṭī, pītal, chāṅdī aur sonā thā wuh us bhūse kī mānind ban gayā jo gāhte waqt bāqī rah jātā hai. hawā ne sab kuchh yūṅ uṛā diyā ki in chīzoṅ kā nām-o-nishān tak na rahā. lekin jis patthar ne mujassame ko girā diyā wuh zabardast pahāṛ ban kar itnā baṛh gayā ki pūrī duniyā us se bhar gaī.

³⁶yihī bādshāh kā ḳhwāb thā. ab ham bādshāh ko ḳhwāb kā matlab batāte haiṅ.

³⁷ai bādshāh, āp shahanshāh haiṅ. āsmān ke ḳhudā ne āp ko saltanat, quwwat, tāqat aur izzat se nawāzā hai.

³⁸us ne insān ko janglī jānwaroṅ aur parindoṅ samet āp hī ke hawāle kar diyā hai. jahāṅ bhī wuh baste haiṅ us ne āp ko hī un par muqarrar kiyā hai. āp hī mazkūrā sone kā sar haiṅ.

³⁹āp ke bād ek aur saltanat qāim ho jāegī, lekin us kī tāqat āp kī saltanat se kam hogī. phir pītal kī ek tīsrī saltanat wujūd meṅ āegī jo pūrī duniyā par hukūmat karegī.

⁴⁰āḳhir meṅ ek chauthī saltanat āegī jo lohe jaisī tāqatwar hogī. jis tarah lohā sab kuchh toṛ kar pāsh pāsh kar detā hai usī tarah wuh dīgar sab ko toṛ kar pāsh pāsh karegī.

⁴¹āp ne dekhā ki mujassame ke pāoṅ aur ungliyoṅ meṅ kuchh lohā aur kuchh pakī huī miṭṭī thī. is kā matlab hai, is saltanat ke do alag hisse hoṅge. lekin jis tarah ḳhwāb meṅ miṭṭī ke sāth lohā milāyā gayā thā usī tarah chauthī saltanat meṅ lohe kī kuchh na kuchh tāqat hogī.

⁴²ḳhwāb meṅ pāoṅ kī ungliyoṅ meṅ kuchh lohā bhī thā aur kuchh miṭṭī bhī. is kā matlab hai, chauthī saltanat kā ek hissā tāqatwar aur dūsrā nāzuk hogā.

⁴³lohe aur miṭṭī kī milāwaṭ kā matlab hai ki go log āpas meṅ shādī karne se ek dūsre ke sāth muttahid hone kī koshish kareṅge to bhī wuh ek dūsre se paiwast nahīṅ raheṅge, bilkul usī tarah jis tarah lohā miṭṭī ke sāth paiwast nahīṅ rah saktā.

⁴⁴jab yih bādshāh hukūmat kareṅge, un hī dinoṅ meṅ āsmān kā ḳhudā ek bādshāhī qāim karegā jo na kabhī tabāh hogī, na kisī dūsrī qaum ke hāth meṅ āegī. yih bādshāhī in dīgar tamām saltanatoṅ ko pāsh pāsh karke ḳhatm karegī, lekin ḳhud abad tak qāim rahegī.

⁴⁵yihī ḳhwāb meṅ us patthar kā matlab hai jis ne baġhair kisī insānī hāth ke pahāṛī ḍhalān se alag ho kar mujassame ke lohe, pītal, miṭṭī, chāṅdī aur sone ko pāsh pāsh kar diyā. is tarīqe se azīm ḳhudā ne bādshāh par zāhir kiyā hai ki mustaqbil meṅ kyā kuchh pesh āegā. yih ḳhwāb qābil-e-etimād aur us kī tābīr sahīh hai.”

⁴⁶yih sun kar nabūkadnazzar bādshāh ne aundhe muṅh ho kar dānyāl ko sijdā kiyā aur hukm diyā ki dānyāl ko ġhallā aur baḳhūr kī qurbāniyāṅ pesh kī jāeṅ.

⁴⁷dānyāl se us ne kahā, “yaqīnan, tumhārā ḳhudā ḳhudāoṅ kā ḳhudā aur bādshāhoṅ kā mālik hai. wuh wāqaī bhedoṅ ko kholtā hai, warnā tum yih bhed mere lie khol na pāte.”

⁴⁸nabūkadnazzar ne dānyāl ko baṛā uhdā aur muta'addid beshqīmat tohfe die. us ne use pūre sūbā bābal kā gawarnar banā diyā. sāth sāth dānyāl bābal ke tamām dānishmandoṅ par muqarrar huā.

⁴⁹us kī guzārish par bādshāh ne sadrak, mīsak aur abadnajū ko sūbā bābal kī intizāmiyā par muqarrar kiyā. dānyāl ḳhud shāhī darbār meṅ hāzir rahtā thā.