Read Roman Urdu Geo dānyāl 3 Bible Online

dānyāl 3 - Roman Urdu Geo bible

dānyāl 3

¹ek din nabūkadnazzar ne sone kā mujassamā banwāyā. us kī ūṅchāī 90 fuṭ aur chauṛāī 9 fuṭ thī. us ne hukm diyā ki but ko sūbā bābal ke maidān banām dūrā meṅ khaṛā kiyā jāe.

²phir us ne tamām sūbedāroṅ, gawarnaroṅ, muntazimoṅ, mushīroṅ, ḳhazānchiyoṅ, jajoṅ, majisṭreṭoṅ, aur sūboṅ ke dīgar tamām baṛe baṛe sarkārī mulāzimoṅ ko paiġhām bhejā ki mujassame kī maḳhsūsiyat ke lie ā kar jamā ho jāo.

³chunāṅche sab but kī maḳhsūsiyat ke lie jamā ho gae. jab sab us ke sāmne khaṛe the

⁴to shāhī naqīb ne buland āwāz se elān kiyā, “ai muḳhtalif qaumoṅ, ummatoṅ aur zabānoṅ ke logo, suno! bādshāh farmātā hai,

⁵‘jūṅ hī narsingā, shahnāī, santūr, sarod, ūd, bīn aur dīgar tamām sāz bajeṅge to lāzim hai ki sab aundhe muṅh ho kar bādshāh ke khaṛe kie gae sone ke but ko sijdā kareṅ.

⁶jo bhī sijdā na kare use fauran bhaṛaktī bhaṭṭī meṅ phaiṅkā jāegā’.”

⁷chunāṅche jūṅ hī sāz bajne lage to muḳhtalif qaumoṅ, ummatoṅ aur zabānoṅ ke tamām log muṅh ke bal ho kar nabūkadnazzar ke khaṛe kie gae but ko sijdā karne lage.

⁸us waqt kuchh najūmī bādshāh ke pās ā kar yahūdiyoṅ par ilzām lagāne lage.

⁹wuh bole, “bādshāh salāmat abad tak jīte raheṅ!

¹⁰ai bādshāh, āp ne farmāyā, ‘jūṅ hī narsingā, shahnāī, santūr, sarod, ūd, bīn aur dīgar tamām sāz bajeṅge to lāzim hai ki sab aundhe muṅh ho kar bādshāh ke khaṛe kie gae is sone ke but ko sijdā kareṅ.

¹¹jo bhī sijdā na kare use bhaṛaktī bhaṭṭī meṅ phaiṅkā jāegā’

¹²lekin kuchh yahūdī ādmī haiṅ jo āp kī parwā hī nahīṅ karte, hālāṅki āp ne unheṅ sūbā bābal kī intizāmiyā par muqarrar kiyā thā. yih ādmī banām sadrak, mīsak aur abadnajū na āp ke dewatāoṅ kī pūjā karte, na sone ke us but kī parastish karte haiṅ jo āp ne khaṛā kiyā hai.”

¹³yih sun kar nabūkadnazzar āpe se bāhar ho gayā. us ne sīdhā sadrak, mīsak aur abadnajū ko bulāyā. jab pahuṅche

¹⁴to bolā, “ai sadrak, mīsak aur abadnajū, kyā yih sahīh hai ki na tum mere dewatāoṅ kī pūjā karte, na mere khaṛe kie gae mujassame kī parastish karte ho?

¹⁵maiṅ tumheṅ ek āḳhirī mauqā detā hūṅ. sāz dubārā bajeṅge to tumheṅ muṅh ke bal ho kar mere banwāe hue mujassame ko sijdā karnā hai. agar tum aisā na karo to tumheṅ sīdhā bhaṛaktī bhaṭṭī meṅ phaiṅkā jāegā. tab kaun sā ḳhudā tumheṅ mere hāth se bachā sakegā?”

¹⁶sadrak, mīsak aur abadnajū ne jawāb diyā, “ai nabūkadnazzar, is muāmale meṅ hameṅ apnā difā karne kī zarūrat nahīṅ hai.

¹⁷jis ḳhudā kī ḳhidmat ham karte haiṅ wuh hameṅ bachā saktā hai, ḳhwāh hameṅ bhaṛaktī bhaṭṭī meṅ kyūṅ na phaiṅkā jāe. ai bādshāh, wuh hameṅ zarūr āp ke hāth se bachāegā.

¹⁸lekin agar wuh hameṅ na bhī bachāe to bhī āp ko mālūm ho ki na ham āp ke dewatāoṅ kī pūjā kareṅge, na āp ke khaṛe kie gae sone ke mujassame kī parastish kareṅge.”

¹⁹yih sun kar nabūkadnazzar āg-bagūlā ho gayā. sadrak, mīsak aur abadnajū ke sāmne us kā chehrā bigaṛ gayā aur us ne hukm diyā ki bhaṭṭī ko māmūl kī nisbat sāt gunā zyādā garm kiyā jāe.

²⁰phir us ne kahā ki behtarīn faujiyoṅ meṅ se chand ek sadrak, mīsak aur abadnajū ko bāndh kar bhaṛaktī bhaṭṭī meṅ phaiṅk deṅ.

²¹tīnoṅ ko bāndh kar bhaṛaktī bhaṭṭī meṅ phaiṅkā gayā. un ke choġhe, pājāme aur ṭopiyāṅ utārī na gaīṅ.

²²chūṅki bādshāh ne bhaṭṭī ko garm karne par ḳhās zor diyā thā is lie āg itnī tez huī ki jo faujī sadrak, mīsak aur abadnajū ko le kar bhaṭṭī ke muṅh tak chaṛh gae wuh fauran nazar-e-ātish ho gae.

²³un ke qaidī bandhī huī hālat meṅ sholāzan āg meṅ gir gae.

²⁴achānak nabūkadnazzar bādshāh chaunk uṭhā. us ne uchhal kar apne mushīroṅ se pūchhā, “ham ne to tīn ādmiyoṅ ko bāndh kar bhaṭṭī meṅ phaiṅkwāyā ki nahīṅ?” unhoṅ ne jawāb diyā, “jī, ai bādshāh.”

²⁵wuh bolā, “to phir yih kyā hai? mujhe chār ādmī āg meṅ idhar udhar phirte hue nazar ā rahe haiṅ. na wuh bandhe hue haiṅ, na unheṅ nuqsān pahuṅch rahā hai. chauthā ādmī dewatāoṅ kā beṭā sā lag rahā hai.”

²⁶nabūkadnazzar jaltī huī bhaṭṭī ke muṅh ke qarīb gayā aur pukārā, “ai sadrak, mīsak aur abadnajū, ai allāh t'ālā ke bando, nikal āo! idhar āo.” tab sadrak, mīsak aur abadnajū āg se nikal āe.

²⁷sūbedār, gawarnar, muntazim aur shāhī mushīr un ke gird jamā hue to dekhā ki āg ne un ke jismoṅ ko nuqsān nahīṅ pahuṅchāyā. bāloṅ meṅ se ek bhī jhulas nahīṅ gayā thā, na un ke libās āg se muta'assir hue the. āg aur dhueṅ kī bū tak nahīṅ thī.

²⁸tab nabūkadnazzar bolā, “sadrak, mīsak aur abadnajū ke ḳhudā kī tamjīd ho jis ne apne farishte ko bhej kar apne bandoṅ ko bachāyā. unhoṅ ne us par bharosā rakh kar bādshāh ke hukm kī nāfarmānī kī. apne ḳhudā ke siwā kisī aur kī ḳhidmat yā parastish karne se pahle wuh apnī jān ko dene ke lie tayyār the.

²⁹chunāṅche merā hukm suno! sadrak, mīsak aur abadnajū ke ḳhudā ke ḳhilāf kufr baknā tamām qaumoṅ, ummatoṅ aur zabānoṅ ke afrād ke lie saḳht manā hai. jo bhī aisā kare use ṭukṛe ṭukṛe kar diyā jāegā aur us ke ghar ko kachre kā ḍher banāyā jāegā. kyūṅki koī bhī dewatā is tarah nahīṅ bachā saktā.”

³⁰phir bādshāh ne tīnoṅ ādmiyoṅ ko sūbā bābal meṅ sarfarāz kiyā.