Read Roman Urdu Geo dānyāl 4 Bible Online

dānyāl 4 - Roman Urdu Geo bible

dānyāl 4

¹nabūkadnazzar duniyā kī tamām qaumoṅ, ummatoṅ aur zabānoṅ ke afrād ko zail kā paiġhām bhejtā hai, sab kī salāmatī ho!

²maiṅ ne sab ko un ilāhī nishānāt aur mojizāt se āgāh karne kā faislā kiyā hai jo allāh t'ālā ne mere lie kie haiṅ.

³us ke nishān kitne azīm, us ke mojizāt kitne zabardast haiṅ! us kī bādshāhī abadī hai, us kī saltanat nasl-dar-nasl qāim rahtī hai.

⁴maiṅ, nabūkadnazzar ḳhushī aur sukūn se apne mahal meṅ rahtā thā.

⁵lekin ek din maiṅ ek ḳhwāb dekh kar bahut ghabrā gayā. maiṅ palang par leṭā huā thā ki itnī haulnāk bāteṅ aur royāeṅ mere sāmne se guzarīṅ ki maiṅ ḍar gayā.

⁶tab maiṅ ne hukm diyā ki bābal ke tamām dānishmand mere pās āeṅ tāki mere lie ḳhwāb kī tābīr kareṅ.

⁷qismat kā hāl batāne wāle, jādūgar, najūmī aur ġhaibdān pahuṅche to maiṅ ne unheṅ apnā ḳhwāb bayān kiyā, lekin wuh us kī tābīr karne meṅ nākām rahe.

⁸āḳhirkār dānyāl mere huzūr āyā jis kā nām beltashazzar rakhā gayā hai (mere dewatā kā nām bel hai). dānyāl meṅ muqaddas dewatāoṅ kī rūh hai. use bhī maiṅ ne apnā ḳhwāb sunāyā.

⁹maiṅ bolā, “ai beltashazzar, tum jādūgaroṅ ke sardār ho, aur maiṅ jāntā hūṅ ki muqaddas dewatāoṅ kī rūh tum meṅ hai. koī bhī bhed tumhāre lie itnā mushkil nahīṅ hai ki tum use khol na sako. ab merā ḳhwāb sun kar us kī tābīr karo!

¹⁰palang par leṭe hue maiṅ ne royā meṅ dekhā ki duniyā ke bīch meṅ nihāyat lambā sā daraḳht lagā hai.

¹¹yih daraḳht itnā ūṅchā aur tanāwar hotā gayā ki āḳhirkār us kī choṭī āsmān tak pahuṅch gaī aur wuh duniyā kī intihā tak nazar āyā.

¹²us ke patte ḳhūbsūrat the, aur wuh bahut phal lātā thā. us ke sāy meṅ janglī jānwar panāh lete, us kī shāḳhoṅ meṅ parinde baserā karte the. har insān-o-haiwān ko us se ḳhurāk miltī thī.

¹³maiṅ abhī daraḳht ko dekh rahā thā ki ek muqaddas farishtā āsmān se utar āyā.

¹⁴us ne baṛe zor se āwāz dī, ‘daraḳht ko kāṭ ḍālo! us kī shāḳheṅ toṛ do, us ke patte jhāṛ do, us kā phal bikher do! jānwar us ke sāy meṅ se nikal kar bhāg jāeṅ, parinde us kī shāḳhoṅ se uṛ jāeṅ.

¹⁵lekin us kā muḍh jaṛoṅ samet zamīn meṅ rahne do. use lohe aur pītal kī zanjīroṅ meṅ jakaṛ kar khule maidān kī ghās meṅ chhoṛ do. wahāṅ use āsmān kī os tar kare, aur jānwaroṅ ke sāth zamīn kī ghās hī us ko nasīb ho.

¹⁶sāt sāl tak us kā insānī dil jānwar ke dil meṅ badal jāe.

¹⁷kyūṅki muqaddas farishtoṅ ne fatwā diyā hai ki aisā hī ho tāki insān jān le ki allāh t'ālā kā iḳhtiyār insānī saltanatoṅ par hai. wuh apnī hī marzī se logoṅ ko un par muqarrar kartā hai, ḳhwāh wuh kitne zalīl kyūṅ na hoṅ.’

¹⁸maiṅ, nabūkadnazzar ne ḳhwāb meṅ yih kuchh dekhā. ai beltashazzar, ab mujhe is kī tābīr pesh karo. merī saltanat ke tamām dānishmand is meṅ nākām rahe haiṅ. lekin tum yih kar pāoge, kyūṅki tum meṅ muqaddas dewatāoṅ kī rūh hai.”

¹⁹tab beltashazzar yānī dānyāl ke roṅgṭe khaṛe ho gae. aur jo ḳhayālāt ubhar āe un se us par kāfī der tak saḳht dahshat tārī rahī. āḳhirkār bādshāh bolā, “ai beltashazzar, ḳhwāb aur us kā matlab tujhe itnā dahshatzadā na kare.” beltashazzar ne jawāb diyā, “mere āqā, kāsh ḳhwāb kī bāteṅ āp ke dushmanoṅ aur muḳhālifoṅ ko pesh āeṅ!

²⁰āp ne ek daraḳht dekhā jo itnā ūṅchā aur tanāwar ho gayā ki us kī choṭī āsmān tak pahuṅchī aur wuh pūrī duniyā ko nazar āyā.

²¹us ke patte ḳhūbsūrat the, aur wuh bahut sā phal lātā thā. us ke sāy meṅ janglī jānwar panāh lete, us kī shāḳhoṅ meṅ parinde baserā karte the. har insān-o-haiwān ko us se ḳhurāk miltī thī.

²²ai bādshāh, āp hī yih daraḳht haiṅ! āp hī baṛe aur tāqatwar ho gae haiṅ balki āp kī azmat baṛhte baṛhte āsmān se bāteṅ karne lagī, āp kī saltanat duniyā kī intihā tak phail gaī hai.

²³ai bādshāh, is ke bād āp ne ek muqaddas farishte ko dekhā jo āsmān se utar kar bolā, daraḳht ko kāṭ ḍālo! use tabāh karo, lekin us kā muḍh jaṛoṅ samet zamīn meṅ rahne do. use lohe aur pītal kī zanjīroṅ meṅ jakaṛ kar khule maidān kī ghās meṅ chhoṛ do. wahāṅ use āsmān kī os tar kare, aur jānwaroṅ ke sāth zamīn kī ghās hī us ko nasīb ho. sāt sāl yūṅ hī guzar jāeṅ.

²⁴ai bādshāh, is kā matlab yih hai, allāh t'ālā ne mere āqā bādshāh ke bāre meṅ faislā kiyā hai

²⁵ki āp ko insānī sangat se nikāl kar bhagāyā jāegā. tab āp janglī jānwaroṅ ke sāth rah kar bailoṅ kī tarah ghās chareṅge aur āsmān kī os se tar ho jāeṅge. sāt sāl yūṅ hī guzareṅge. phir āḳhirkār āp iqrār kareṅge ki allāh t'ālā kā insānī saltanatoṅ par iḳhtiyār hai, wuh apnī hī marzī se logoṅ ko un par muqarrar kartā hai.

²⁶lekin ḳhwāb meṅ yih bhī kahā gayā ki daraḳht ke muḍh ko jaṛoṅ samet zamīn meṅ chhoṛā jāe. is kā matlab hai ki āp kī saltanat tāham qāim rahegī. jab āp etirāf kareṅge ki tamām iḳhtiyār āsmān ke hāth meṅ hai to āp ko saltanat wāpas milegī.

²⁷ai bādshāh, ab mehrbānī se merā mashwarā qabūl farmāeṅ. insāf karke aur mazlūmoṅ par karm farmā kar apne gunāhoṅ ko dūr kareṅ. shāyad aisā karne se āp kī ḳhushhālī qāim rahe.”

²⁸dānyāl kī har bāt nabūkadnazzar ko pesh āī.

²⁹bārah mahīne ke bād bādshāh bābal meṅ apne shāhī mahal kī chhat par ṭahal rahā thā.

³⁰tab wuh kahne lagā, “lo, yih azīm shahr dekho jo maiṅ ne apnī rihāish ke lie tāmīr kiyā hai! yih sab kuchh maiṅ ne apnī hī zabardast quwwat se banā liyā hai tāki merī shān-o-shaukat mazīd baṛhtī jāe.”

³¹bādshāh yih bāt bol hī rahā thā ki āsmān se āwāz sunāī dī, “ai nabūkadnazzar bādshāh, sun! saltanat tujh se chhīn lī gaī hai.

³²tujhe insānī sangat se nikāl kar bhagāyā jāegā, aur tū janglī jānwaroṅ ke sāth rah kar bail kī tarah ghās charegā. sāt sāl yūṅ hī guzar jāeṅge. phir āḳhirkār tū iqrār karegā ki allāh t'ālā kā insānī saltanatoṅ par iḳhtiyār hai, wuh apnī hī marzī se logoṅ ko un par muqarrar kartā hai.”

³³jūṅ hī āwāz band huī to aisā hī huā. nabūkadnazzar ko insānī sangat se nikāl kar bhagāyā gayā, aur wuh bailoṅ kī tarah ghās charne lagā. us kā jism āsmān kī os se tar hotā rahā. hote hote us ke bāl uqāb ke paroṅ jitne lambe aur us ke nāḳhun parinde ke changul kī mānind hue.

³⁴lekin sāt sāl guzarne ke bād maiṅ, nabūkadnazzar apnī āṅkhoṅ ko āsmān kī taraf uṭhā kar dubārā hosh meṅ āyā. tab maiṅ ne allāh t'ālā kī tamjīd kī, maiṅ ne us kī hamd-o-sanā kī jo hameshā tak zindā hai. us kī hukūmat abadī hai, us kī saltanat nasl-dar-nasl qāim rahtī hai.

³⁵us kī nisbat duniyā ke tamām bāshinde sifar ke barābar haiṅ. wuh āsmānī fauj aur duniyā ke bāshindoṅ ke sāth jo jī chāhe kartā hai. use kuchh karne se koī nahīṅ rok saktā, koī us se jawāb talab karke pūchh nahīṅ saktā, “tū ne kyā kiyā?”

³⁶jūṅ hī maiṅ dubārā hosh meṅ āyā to mujhe pahlī shāhī izzat aur shān-o-shaukat bhī az sar-e-nau hāsil huī. mere mushīr aur shurafā dubārā mere sāmne hāzir hue, aur mujhe dubārā taḳht par biṭhāyā gayā. pahle kī nisbat merī azmat meṅ izāfā huā.

³⁷ab maiṅ, nabūkadnazzar āsmān ke bādshāh kī hamd-o-sanā kartā hūṅ. maiṅ usī ko jalāl detā hūṅ, kyūṅki jo kuchh bhī wuh kare wuh sahīh hai. us kī tamām rāheṅ munsifānā haiṅ. jo maġhrūr ho kar zindagī guzārte haiṅ unheṅ wuh past karne ke qābil hai.