Read Roman Urdu Geo hosea 14 Bible Online

hosea 14 - Roman Urdu Geo bible

hosea 14

¹ai isrāīl, taubā karke rab apne ḳhudā ke pās wāpas ā! kyūṅki terā qusūr tere zawāl kā sabab ban gayā hai.

²apne gunāhoṅ kā iqrār karte hue rab ke pās wāpas āo. us se kaho, “hamāre tamām gunāhoṅ ko muāf karke hameṅ mehrbānī se qabūl farmā tāki ham apne hoṅṭoṅ se terī tārīf karke tujhe munāsib qurbānī adā kar sakeṅ.

³asūr hameṅ na bachāe. āindā na ham ghoṛoṅ par sawār ho jāeṅge, na kaheṅge ki hamāre hāthoṅ kī chīzeṅ hamārā ḳhudā haiṅ. kyūṅki tū hī yatīm par rahm kartā hai.”

⁴tab rab farmāegā, “maiṅ un kī bewafāī ke asarāt ḳhatm karke unheṅ shifā dūṅgā, hāṅ maiṅ unheṅ khule dil se pyār karūṅga, kyūṅki merā un par ġhazab ṭhanḍā ho gayā hai.

⁵isrāīl ke lie maiṅ shabnam kī mānind hūṅgā. tab wuh sosan kī mānind phūl nikālegā, lubnān ke deodār ke daraḳht kī tarah jaṛ pakaṛegā,

⁶us kī koṅpleṅ phūṭ nikleṅgī, aur shāḳheṅ ban kar phailtī jāeṅgī. us kī shān zaitūn ke daraḳht kī mānind hogī, us kī ḳhushbū lubnān ke deodār ke daraḳht kī ḳhushbū kī tarah phail jāegī.

⁷log dubārā us ke sāy meṅ jā baseṅge. wahāṅ wuh anāj kī tarah phaleṅ phūleṅge, angūr ke se phūl nikāleṅge. dūsre un kī yūṅ tārīf kareṅge jis tarah lubnān kī umdā mai kī.

⁸tab isrāīl kahegā, ‘merā butoṅ se kyā wāstā?’ maiṅ hī terī sun kar terī dekh-bhāl karūṅga. maiṅ jūnīpar kā sāyādār daraḳht hūṅ, aur tū mujh se hī phal pāegā.”

⁹kaun dānishmand hai? wuh samajh le. kaun sāhib-e-fahm hai? wuh matlab jān le. kyūṅki rab kī rāheṅ durust haiṅ. rāstbāz un par chalte raheṅge, lekin sarkash un par chalte waqt ṭhokar khā kar gir jāeṅge.