Read Roman Urdu Geo hosea 2 Bible Online

hosea 2 - Roman Urdu Geo bible

hosea 2

¹us waqt apne bhāiyoṅ kā nām ammī yānī ‘merī qaum’ aur apnī bahnoṅ kā nām ruhāmā yānī ‘jis par rahm kiyā gayā ho’ rakho.

²apnī māṅ isrāīl par ilzām lagāo, hāṅ us par ilzām lagāo! kyūṅki na wuh merī bīwī hai, na maiṅ us kā shauhar hūṅ. wuh apne chehre se aur apnī chhātiyoṅ ke darmiyān se zinākārī ke nishān dūr kare,

³warnā maiṅ us ke kapṛe utār kar use us nangī hālat meṅ chhoṛūṅgā jis meṅ wuh paidā huī. maiṅ hone dūṅgā ki wuh registān aur jhulastī zamīn meṅ tabdīl ho jāe, ki wuh pyās ke māre mar jāe.

⁴maiṅ us ke bachchoṅ par bhī rahm nahīṅ karūṅga, kyūṅki wuh zinākār bachche haiṅ.

⁵un kī māṅ ne zinā kiyā, unheṅ janm dene wālī ne sharmnāk harkateṅ kī haiṅ. wuh bolī, ‘maiṅ apne āshiqoṅ ke pīchhe bhāg jāūṅgī. āḳhir merī roṭī, pānī, ūn, katān, tel aur pīne kī chīzeṅ wuhī muhayyā karte haiṅ.’

⁶is lie jahāṅ bhī wuh chalnā chāhe wahāṅ maiṅ use kāṅṭedār jhāṛiyoṅ se rok dūṅgā, maiṅ aisī dīwār khaṛī karūṅga ki use rāste kā patā na chale.

⁷wuh apne āshiqoṅ kā pīchhā karte karte thak jāegī aur kabhī un tak pahuṅchegī nahīṅ, wuh un kā khoj lagātī rahegī lekin unheṅ pāegī nahīṅ. phir wuh bolegī, ‘maiṅ apne pahle shauhar ke pās wāpas jāūṅ, kyūṅki us waqt merā hāl āj kī nisbat kahīṅ behtar thā.’

⁸lekin wuh yih bāt jānane ke lie tayyār nahīṅ ki use allāh hī kī taraf se sab kuchh muhayyā huā hai. maiṅ hī ne use wuh anāj, mai, tel aur kasrat kī sonā-chāṅdī de dī jo logoṅ ne bāl dewatā ko pesh kī.

⁹is lie maiṅ apne anāj aur apne angūr ko fasal kī kaṭāī se pahle pahle wāpas lūṅgā. jo ūn aur katān maiṅ use detā rahā tāki us kī barahnagī nazar na āe use maiṅ us se chhīn lūṅgā.

¹⁰us ke āshiqoṅ ke deḳhte deḳhte maiṅ us ke sāre kapṛe utārūṅga, aur koī use mere hāth se nahīṅ bachāegā.

¹¹maiṅ us kī tamām ḳhushiyāṅ band kar dūṅgā. na koī īd, na nae chāṅd kā tahwār, na sabat kā din yā bāqī koī muqarrarā jashn manāyā jāegā.

¹²maiṅ us ke angūr aur anjīr ke bāġhoṅ ko tabāh karūṅga, un chīzoṅ ko jin ke bāre meṅ us ne kahā, ‘yih mujhe āshiqoṅ kī ḳhidmat karne ke iwaz mil gaī haiṅ.’ maiṅ yih bāġh jangal banane dūṅgā, aur janglī jānwar un kā phal khāeṅge.

¹³rab farmātā hai ki maiṅ use un dinoṅ kī sazā dūṅgā jab us ne bāl ke butoṅ ko baḳhūr kī qurbāniyāṅ pesh kīṅ. us waqt wuh apne āp ko bāliyoṅ aur zewarāt se sajā kar apne āshiqoṅ ke pīchhe bhāg gaī. mujhe wuh bhūl gaī.

¹⁴chunāṅche ab maiṅ use manāne kī koshish karūṅga, use registān meṅ le jā kar us se narmī se bāt karūṅga.

¹⁵phir maiṅ use wahāṅ se ho kar us ke angūr ke bāġh wāpas karūṅga aur wādī-e-akūr [2] ko ummīd ke darwāze meṅ badal dūṅgā. us waqt wuh ḳhushī se mere pīchhe ho kar wahāṅ chalegī, bilkul usī tarah jis tarah jawānī meṅ kartī thī jab mere pīchhe ho kar misr se nikal āī.”

¹⁶rab farmātā hai, “us din tū mujhe pukārte waqt ‘ai mere bāl’ [3] nahīṅ kahegī balki ‘ai mere ḳhāwand.’

¹⁷maiṅ bāl dewatāoṅ ke nām tere muṅh se nikāl dūṅgā, aur tū āindā un ke nāmoṅ kā zikr tak nahīṅ karegī.

¹⁸us din maiṅ janglī jānwaroṅ, parindoṅ aur reṅgne wāle jāndāroṅ ke sāth ahd bāndhūṅgā tāki wuh isrāīl ko nuqsān na pahuṅchāeṅ. kamān aur talwār ko toṛ kar maiṅ jang kā ḳhatrā mulk se dūr kar dūṅgā. sab ārām-o-sukūn se zindagī guzāreṅge.

¹⁹maiṅ tere sāth abadī rishtā bāndhūṅgā, aisā rishtā jo rāstī, insāf, fazl aur rahm par mabnī hogā.

²⁰hāṅ, jo rishtā maiṅ tere sāth bāndhūṅgā us kī bunyād wafādārī hogī. tab tū rab ko jān legī.”

²¹rab farmātā hai, “us din maiṅ sunūṅgā. maiṅ āsmān kī sun kar bādal paidā karūṅga, āsmān zamīn kī sun kar bārish barsāegā,

²²zamīn anāj, angūr aur zaitūn kī sun kar unheṅ taqwiyat degī, aur yih chīzeṅ maidān-e-yazrael [4] kī sun kar kasrat se paidā ho jāeṅgī.

²³us waqt maiṅ apnī ḳhātir isrāīl kā bīj mulk meṅ bo dūṅgā. ‘loruhāmā’ [5] par maiṅ rahm karūṅga, aur ‘loammī’ [6] se maiṅ kahūṅgā, ‘tū merī qaum hai.’ jawāb meṅ wuh bolegī, ‘tū merā ḳhudā hai’.”