Read Roman Urdu Geo hosea 3 Bible Online

hosea 3 - Roman Urdu Geo bible

hosea 3

¹rab mujh se hamkalām huā, “jā, apnī bīwī ko dubārā pyār kar, hālāṅki us kā āshiq hai jis se us ne zinā kiyā hai. use yūṅ pyār kar jis tarah rab isrāīliyoṅ ko pyār kartā hai, hālāṅki un kā ruḳh dīgar mābūdoṅ kī taraf hai aur unheṅ un hī kī angūr kī ṭikkiyāṅ pasand haiṅ.”

²tab maiṅ ne chāṅdī ke 15 sikke aur jau ke 195 kilogrām de kar use wāpas ḳharīd liyā.

³maiṅ ne us se kahā, “ab tujhe baṛe arse tak mere sāth rahnā hai. itne meṅ na zinā kar, na kisī ādmī se sohbat rakh. maiṅ bhī baṛī der tak tujh se hambistar nahīṅ hūṅgā.”

⁴isrāīl kā yihī hāl hogā. baṛī der tak na un kā bādshāh hogā, na rāhnumā, na qurbānī kā intizām, na yādgār patthar, na imām kā bālāposh. un ke pās but tak bhī nahīṅ hoṅge.

⁵is ke bād isrāīlī wāpas ā kar rab apne ḳhudā aur dāūd apne bādshāh ko talāsh kareṅge. āḳhirī dinoṅ meṅ wuh larazte hue rab aur us kī bhalāī kī taraf rujū kareṅge.