Read Roman Urdu Geo hosea 5 Bible Online

hosea 5 - Roman Urdu Geo bible

hosea 5

¹ai imāmo, suno merī bāt! ai isrāīl ke gharāne, tawajjuh de! ai shāhī ḳhāndān, mere paiġhām par ġhaur kar! tum par faislā hai, kyūṅki apnī butparastī se tum ne misfāh meṅ phandā lagā diyā, tabūr pahāṛ par jāl bichhā diyā

²aur shittīm meṅ gaṛhā khudwā liyā hai. ḳhabardār! maiṅ tum sab ko sazā dūṅgā.

³maiṅ to isrāīl ko ḳhūb jāntā hūṅ, wuh mujh se chhupā nahīṅ rah saktā. isrāīl ab ismatfarosh ban gayā hai, wuh nāpāk hai.

⁴un kī burī harkateṅ unheṅ un ke ḳhudā ke pās wāpas āne nahīṅ detīṅ. kyūṅki un ke andar zinākārī kī rūh hai, aur wuh rab ko nahīṅ jānte.

⁵isrāīl kā takabbur us ke ḳhilāf gawāhī detā hai, aur wuh apne qusūr ke bāis gir jāegā. yahūdāh bhī us ke sāth gir jāegā.

⁶tab wuh apnī bheṛ-bakriyoṅ aur gāy-bailoṅ ko le kar rab ko talāsh kareṅge, lekin befāidā. wuh use pā nahīṅ sakeṅge, kyūṅki wuh unheṅ chhoṛ kar chalā gayā hai.

⁷unhoṅ ne rab se bewafā ho kar nājāiz aulād paidā kī hai. ab nayā chāṅd unheṅ un kī maurūsī zamīnoṅ samet haṛap kar legā.

⁸jibiā meṅ narsingā phūṅko, rāmā meṅ turam bajāo! bait-āwan meṅ jang ke nāre buland karo. ai binyamīn, dushman tere pīchhe paṛ gayā hai!

⁹jis din maiṅ sazā dūṅgā us din isrāīl wīrān-o-sunsān ho jāegā. dhyān do ki maiṅ ne isrāīlī qabīloṅ ke bāre meṅ qābil-e-etimād bāteṅ batāī haiṅ.

¹⁰yahūdāh ke rāhnumā un jaise ban gae haiṅ jo nājāiz taur par apnī zamīn kī hudūd baṛhā dete haiṅ. jawāb meṅ maiṅ apnā ġhazab mūslādhār bārish kī tarah un par nāzil karūṅga.

¹¹isrāīl par is lie zulm ho rahā hai aur us kā haq mārā jā rahā hai ki wuh bemānī butoṅ ke pīchhe bhāgne par tulā huā hai.

¹²maiṅ isrāīl ke lie pīp aur yahūdāh ke lie saṛāhaṭ kā bāis banūṅgā.

¹³isrāīl ne apnī bīmārī dekhī aur yahūdāh ne apne nāsūr par ġhaur kiyā. tab isrāīl ne asūr kī taraf rujū kiyā aur asūr ke azīm bādshāh ko paiġhām bhej kar us se madad māṅgī. lekin wuh tumheṅ shifā nahīṅ de saktā, wuh tumhāre nāsūr kā ilāj nahīṅ kar saktā.

¹⁴kyūṅki maiṅ sherbabar kī tarah isrāīl par ṭūṭ paṛūṅgā aur jawān sherbabar kī tarah yahūdāh par jhapaṭ paṛūṅgā. maiṅ unheṅ phāṛ kar apne sāth ghasīṭ le jāūṅgā, aur koī unheṅ nahīṅ bachāegā.

¹⁵phir maiṅ apne ghar wāpas jā kar us waqt tak un se dūr rahūṅgā jab tak wuh apnā qusūr taslīm karke mere chehre ko talāsh na kareṅ. kyūṅki jab wuh musībat meṅ phaṅs jāeṅge tab hī mujhe talāsh kareṅge.”