Read Roman Urdu Geo hosea 6 Bible Online

hosea 6 - Roman Urdu Geo bible

hosea 6

¹us waqt wuh kaheṅge, “āo, ham rab ke pās wāpas chaleṅ. kyūṅki usī ne hameṅ phāṛā, aur wuhī hameṅ shifā bhī degā. usī ne hamārī piṭāī kī, aur wuhī hamārī marham-paṭṭī bhī karegā.

²do din ke bād wuh hameṅ nae sire se zindā karegā aur tīsre din hameṅ dubārā uṭhā khaṛā karegā tāki ham us ke huzūr zindagī guzāreṅ.

³āo, ham use jān leṅ, ham pūrī jidd-o-jahd ke sāth rab ko jānane ke lie koshāṅ raheṅ. wuh zarūr ham par zāhir hogā. yih utnā yaqīnī hai jitnā sūraj kā rozānā tulū honā yaqīnī hai. jis tarah mausam-e-bahār kī tez bārish zamīn ko serāb kartī hai usī tarah allāh bhī hamāre pās āegā.”

⁴“ai isrāīl, maiṅ tere sāth kyā karūṅ? ai yahūdāh, maiṅ tere sāth kyā karūṅ? tumhārī muhabbat subh kī dhund jaisī ārizī hai. dhūp meṅ os kī tarah wuh jald hī kāfūr ho jātī hai.

⁵isī lie maiṅ ne apne nabiyoṅ kī mārifat tumheṅ paṭaḳh diyā, apne muṅh ke alfāz se tumheṅ mār ḍālā hai. mere insāf kā nūr sūraj kī tarah hī tulū hotā hai.

⁶kyūṅki maiṅ qurbānī nahīṅ balki rahm pasand kartā hūṅ, bhasm hone wālī qurbāniyoṅ kī nisbat mujhe yih pasand hai ki tum allāh ko jān lo.

⁷wuh ādam shahr meṅ ahd toṛ kar mujh se bewafā ho gae.

⁸jiliād shahr mujrimoṅ se bhar gayā hai, har taraf ḳhūn ke dāġh haiṅ.

⁹imāmoṅ ke jaththe ḍākuoṅ kī mānind ban gae haiṅ. kyūṅki wuh sikam ko pahuṅchāne wāle rāste par musāfiroṅ kī tāk lagā kar unheṅ qatl karte haiṅ. hāṅ, wuh sharmnāk harkatoṅ se gurez nahīṅ karte.

¹⁰maiṅ ne isrāīl meṅ aisī bāteṅ dekhī haiṅ jin se roṅgṭe khaṛe ho jāte haiṅ. kyūṅki isrāīl zinā kartā hai, wuh apne āp ko nāpāk kartā hai.

¹¹lekin yahūdāh par bhī adālat kī fasal pakne wālī hai. jab kabhī maiṅ apnī qaum ko bahāl karke