Read Roman Urdu Geo hosea 9 Bible Online

hosea 9 - Roman Urdu Geo bible

hosea 9

¹ai isrāīl, ḳhushī na manā, dīgar aqwām kī tarah shādiyānā mat bajā. kyūṅki tū zinā karte karte apne ḳhudā se dūr hotā jā rahā hai. jahāṅ bhī log gandum gāhte haiṅ wahāṅ tū jā kar apnī ismatfaroshī ke paise jamā kartā hai, yihī kuchh tujhe pyārā hai.

²is lie āindā gandum gāhne aur angūr kā ras nikālne kī jagheṅ unheṅ ḳhurāk muhayyā nahīṅ kareṅgī, aur angūr kī fasal unheṅ ras muhayyā nahīṅ karegī.

³isrāīlī rab ke mulk meṅ nahīṅ raheṅge balki unheṅ misr wāpas jānā paṛegā, unheṅ asūr meṅ nāpāk chīzeṅ khānī paṛeṅgī.

⁴wahāṅ wuh rab ko na mai kī aur na zabah kī qurbāniyāṅ pesh kar sakeṅge. un kī roṭī mātam karne wāloṅ kī roṭī jaisī hogī yānī jo bhī use khāe wuh nāpāk ho jāegā. hāṅ, un kā khānā sirf un kī apnī bhūk miṭāne ke lie hogā, aur wuh rab ke ghar meṅ nahīṅ āegā.

⁵us waqt tum īdoṅ par kyā karoge? rab ke tahwāroṅ ko tum kaise manāoge?

⁶jo tabāhshudā mulk se nikleṅge unheṅ misr ikaṭṭhā karegā, unheṅ memfis dafnāegā. ḳhudrau paude un kī qīmtī chāṅdī par qabzā kareṅge, kāṅṭedār jhāṛiyāṅ un ke gharoṅ par chhā jāeṅgī.

⁷sazā ke din ā gae haiṅ, hisāb-kitāb ke din pahuṅch gae haiṅ. isrāīl yih bāt jān le. tum kahte ho, “yih nabī ahmaq hai, rūh kā yih bandā pāgal hai.” kyūṅki jitnā sangīn tumhārā gunāh hai utne hī zor se tum merī muḳhālafat karte ho.

⁸nabī mere ḳhudā kī taraf se isrāīl kā pahredār banāyā gayā hai. lekin jahāṅ bhī wuh jāe wahāṅ use phaṅsāne ke phande lagāe gae haiṅ, balki use us ke ḳhudā ke ghar meṅ bhī satāyā jātā hai.

⁹un se nihāyat hī ḳharāb kām sarzad huā hai, aisā sharīr kām jaisā jibiā ke bāshindoṅ se huā thā. allāh un kā qusūr yād karke un ke gunāhoṅ kī munāsib sazā degā.

¹⁰rab farmātā hai, “jab merā isrāīl se pahlā wāstā paṛā to registān meṅ angūr jaisā lag rahā thā. tumhāre bāpdādā anjīr ke daraḳht par lage pahle pakne wāle phal jaise nazar āe. lekin bāl-faġhūr ke pās pahuṅchte hī unhoṅ ne apne āp ko us sharmnāk but ke lie maḳhsūs kar liyā. tab wuh apne āshiq jaise makrūh ho gae.

¹¹ab isrāīl kī shān-o-shaukat parinde kī tarah uṛ kar ġhāib ho jāegī. āindā na koī ummīd se hogī, na bachchā janegī.

¹²agar wuh apne bachchoṅ ko parwān chaṛhnī tak pāleṅ bhī to bhī maiṅ unheṅ beaulād kar dūṅgā. ek bhī nahīṅ rahegā. un par afsos jab maiṅ un se dūr ho jāūṅgā.

¹³pahle jab maiṅ ne isrāīl par nazar ḍālī to wuh sūr kī mānind shāndār thā, use shādāb jagah par paude kī tarah lagāyā gayā thā. lekin ab use apnī aulād ko bāhar lā kar qātil ke hawāle karnā paṛegā.”

¹⁴ai rab, unheṅ de! kyā de? hone de ki un ke bachche peṭ meṅ zāe ho jāeṅ, ki aurateṅ dūdh na pilā sakeṅ.

¹⁵rab farmātā hai, “jab un kī tamām bedīnī jiljāl meṅ zāhir huī to maiṅ ne un se nafrat kī. un kī burī harkatoṅ kī wajah se maiṅ unheṅ apne ghar se nikāl dūṅgā. āindā maiṅ unheṅ pyār nahīṅ karūṅga. un ke tamām rāhnumā sarkash haiṅ.

¹⁶isrāīl ko mārā gayā, logoṅ kī jaṛ sūkh gaī hai, aur wuh phal nahīṅ lā sakte. un ke bachche paidā ho bhī jāeṅ to maiṅ un kī qīmtī aulād ko mār ḍālūṅgā.”

¹⁷merā ḳhudā unheṅ radd karegā, is lie ki unhoṅ ne us kī nahīṅ sunī. chunāṅche unheṅ dīgar aqwām meṅ māre māre phirnā paṛegā.