Read Roman Urdu Geo yoel 1 Bible Online

yoel 1 - Roman Urdu Geo bible

yoel 1

¹zail meṅ rab kā wuh kalām hai jo yoel bin fatūel par nāzil huā.

²ai buzurgo, suno! ai mulk ke tamām bāshindo, tawajjuh do! jo kuchh in dinoṅ meṅ tumheṅ pesh āyā hai kyā wuh pahle kabhī tumheṅ yā tumhāre bāpdādā ko pesh āyā?

³apne bachchoṅ ko is ke bāre meṅ batāo, jo kuchh pesh āyā hai us kī yād nasl-dar-nasl tāzā rahe.

⁴jo kuchh ṭiḍḍī ke lārwe ne chhoṛ diyā use bāliġh ṭiḍḍī khā gaī, jo bāliġh ṭiḍḍī chhoṛ gaī use ṭiḍḍī kā bachchā khā gayā, aur jo ṭiḍḍī kā bachchā chhoṛ gayā use jawān ṭiḍḍī khā gaī.

⁵ai nashe meṅ dhut logo, jāg uṭho aur ro paṛo! ai mai pīne wālo, wāwailā karo! kyūṅki naī mai tumhāre muṅh se chhīn lī gaī hai.

⁶ṭiḍḍiyoṅ kī zabardast aur anginat qaum mere mulk par ṭūṭ paṛī hai. un ke sher ke se dāṅt aur shernī kā sā jabṛā hai.

⁷natīje meṅ mere angūr kī beleṅ tabāh, mere anjīr ke daraḳht zāe ho gae haiṅ. ṭiḍḍiyoṅ ne chhāl ko bhī utār liyā, ab shāḳheṅ safed safed nazar ātī haiṅ.

⁸āh-o-zārī karo, ṭāṭ se mulabbas us kuṅwārī kī tarah giryā karo jis kā mangetar intiqāl kar gayā ho.

⁹rab ke ghar meṅ ġhallā aur mai kī nazareṅ band ho gaī haiṅ. imām jo rab ke ḳhādim haiṅ mātam kar rahe haiṅ.

¹⁰khet tabāh hue, zamīn jhulas gaī hai. anāj ḳhatm, angūr ḳhatm, zaitūn ḳhatm.

¹¹ai kāshtkāro, sharmsār ho jāo! ai angūr ke bāġhbāno, āh-o-bukā karo! kyūṅki khet kī fasal barbād ho gaī hai, gandum aur jau kī fasal ḳhatm hī hai.

¹²angūr kī bel sūkh gaī, anjīr kā daraḳht murjhā gayā hai. anār, khajūr, seb balki phal lāne wāle tamām daraḳht pazhmurdā ho gae haiṅ. insān kī tamām ḳhushī ḳhāk meṅ milāī gaī hai.

¹³ai imāmo, ṭāṭ kā libās oṛh kar mātam karo! ai qurbāngāh ke ḳhādimo, wāwailā karo! ai mere ḳhudā ke ḳhādimo, āo, rāt ko bhī ṭāṭ oṛh kar guzāro! kyūṅki tumhāre ḳhudā kā ghar ġhallā aur mai kī nazaroṅ se mahrūm ho gayā hai.

¹⁴muqaddas roze kā elān karo. logoṅ ko ḳhās ijtimā ke lie bulāo. buzurgoṅ aur mulk ke tamām bāshindoṅ ko rab apne ḳhudā ke ghar meṅ jamā karke buland āwāz se rab se iltijā karo.

¹⁵us din par afsos! kyūṅki rab kā wuh din qarīb hī hai jab qādir-e-mutlaq ham par tabāhī nāzil karegā.

¹⁶kyā aisā nahīṅ huā ki hamāre deḳhte deḳhte ham se ḳhurāk chhīn lī gaī, ki allāh ke ghar meṅ ḳhushī-o-shādmānī band ho gaī hai?

¹⁷ḍheloṅ meṅ chhupe bīj jhulas gae haiṅ, is lie ḳhālī godām ḳhastāhāl aur anāj ko mahfūz rakhne ke makān ṭūṭ phūṭ gae haiṅ. un kī zarūrat nahīṅ rahī, kyūṅki ġhallā sūkh gayā hai.

¹⁸hāy, maweshī kaisī dardnāk āwāz nikāl rahe haiṅ! gāy-bail pareshānī se idhar udhar phir rahe haiṅ, kyūṅki kahīṅ bhī charāgāh nahīṅ miltī. bheṛ-bakriyoṅ ko bhī taqlīf hai.

¹⁹ai rab, maiṅ tujhe pukārtā hūṅ, kyūṅki khule maidān kī charāgāheṅ nazar-e-ātish ho gaī haiṅ, tamām daraḳht bhasm ho gae haiṅ.

²⁰janglī jānwar bhī hāṅpte hāṅpte tere intizār meṅ haiṅ, kyūṅki nadiyāṅ sūkh gaī haiṅ, aur khule maidān kī charāgāheṅ nazar-e-ātish ho gaī haiṅ.