Read Roman Urdu Geo āmūs 5 Bible Online

āmūs 5 - Roman Urdu Geo bible

āmūs 5

¹ai isrāīlī qaum, merī bāt suno, tumhāre bāre meṅ mere nohā par dhyān do!

²“kuṅwārī isrāīl gir gaī hai aur āindā kabhī nahīṅ uṭhegī. use us kī apnī zamīn par paṭaḳh diyā gayā hai, aur koī use dubārā khaṛā nahīṅ karegā.”

³rab qādir-e-mutlaq farmātā hai, “isrāīl ke jis shahr se 1,000 mard laṛne ke lie nikleṅge us ke sirf 100 afrād wāpas āeṅge. aur jis shahr se 100 nikleṅge, us ke sirf 10 mard wāpas āeṅge.”

⁴kyūṅki rab isrāīlī qaum se farmātā hai, “mujhe talāsh karo to tum jīte rahoge.

⁵na bait-el ke tālib ho, na jiljāl ke pās jāo, aur na bair-sabā ke lie rawānā ho jāo! kyūṅki jiljāl ke bāshinde yaqīnan jilāwatan ho jāeṅge, aur bait-el nest-o-nābūd ho jāegā.”

⁶rab ko talāsh karo to tum jīte rahoge. warnā wuh āg kī tarah yūsuf ke gharāne meṅ se guzar kar bait-el ko bhasm karegā, aur use koī nahīṅ bujhā sakegā.

⁷un par afsos jo insāf ko ulaṭ kar zahr meṅ badal dete, jo rāstī ko zamīn par paṭaḳh dete haiṅ!

⁸allāh sāt saheliyoṅ ke jhumke aur jauze kā ḳhāliq hai. andhere ko wuh subh kī raushnī meṅ aur din ko rāt meṅ badal detā hai. jo samundar ke pānī ko bulā kar rū-e-zamīn par unḍel detā hai us kā nām rab hai!

⁹achānak hī wuh zor-āwaroṅ par āfat lātā hai, aur us ke kahne par qilāband shahr tabāh ho jātā hai.

¹⁰tum us se nafrat karte ho jo adālat meṅ insāf kare, tumheṅ us se ghin ātī hai jo sach bole.

¹¹tum ġharīboṅ ko kuchal kar un ke anāj par had se zyādā ṭaiks lagāte ho. is lie go tum ne tarāshe hue pattharoṅ se shāndār ghar banāe haiṅ to bhī un meṅ nahīṅ rahoge, go tum ne angūr ke phalte phūlte bāġh lagāe haiṅ to bhī un kī mai se mahzūz nahīṅ hoge.

¹²maiṅ to tumhāre muta'addid jarāim aur sangīn gunāhoṅ se ḳhūb wāqif hūṅ. tum rāstbāzoṅ par zulm karte aur rishwat le kar ġharīboṅ ko adālat meṅ insāf se mahrūm rakhte ho.

¹³is lie samajhdār shaḳhs is waqt ḳhāmosh rahtā hai, waqt itnā hī burā hai.

¹⁴burāī ko talāsh na karo balki achchhāī ko, tab hī jīte rahoge. tab hī tumhārā dāwā durust hogā ki rab jo lashkaroṅ kā ḳhudā hai hamāre sāth hai.

¹⁵burāī se nafrat karo aur jo kuchh achchhā hai use pyār karo. adālatoṅ meṅ insāf qāim rakho, shāyad rab jo lashkaroṅ kā ḳhudā hai yūsuf ke bache-khuche hisse par rahm kare.

¹⁶chunāṅche rab jo lashkaroṅ kā ḳhudā aur hamārā āqā hai farmātā hai, “tamām chaukoṅ meṅ āh-o-bukā hogī, tamām galiyoṅ meṅ log ‘hāy, hāy’ kareṅge. khetībāṛī karne wāloṅ ko bhī bulāyā jāegā tāki peshāwarānā taur par sog manāne wāloṅ ke sāth giryā-o-zārī kareṅ.

¹⁷angūr ke tamām bāġhoṅ meṅ wāwailā machegā, kyūṅki maiṅ ḳhud tumhāre darmiyān se guzarūṅga.” yih rab kā farmān hai.

¹⁸un par afsos jo kahte haiṅ, “kāsh rab kā din ā jāe!” tumhāre lie rab ke din kā kyā fāidā hogā? wuh to tumhāre lie raushnī kā nahīṅ balki tārīkī kā bāis hogā.

¹⁹tab tum us ādmī kī mānind hoge jo sherbabar se bhāg kar rīchh se ṭakrā jātā hai. jab ghar meṅ panāh le kar hāth se dīwār kā sahārā letā hai to sāṅp use ḍas letā hai.

²⁰hāṅ, rab kā din tumhāre lie raushnī kā nahīṅ balki tārīkī kā bāis hogā. aisā andherā hogā ki ummīd kī kiran tak nazar nahīṅ āegī.

²¹rab farmātā hai, “mujhe tumhāre mazhabī tahwāroṅ se nafrat hai, maiṅ unheṅ haqīr jāntā hūṅ. tumhāre ijtimāoṅ se mujhe ghin ātī hai.

²²jo bhasm hone wālī aur ġhallā kī qurbāniyāṅ tum mujhe pesh karte ho unheṅ maiṅ pasand nahīṅ kartā, jo moṭe-tāze bail tum mujhe salāmatī kī qurbānī ke taur par chaṛhāte ho un par maiṅ nazar bhī nahīṅ ḍālnā chāhtā.

²³dafā karo apne gītoṅ kā shor! maiṅ tumhāre sitāroṅ kī mausīqī sunanā nahīṅ chāhtā.

²⁴in chīzoṅ kī bajāe insāf kā chashmā phūṭ nikle aur rāstī kī kabhī band na hone wālī nahar bah nikle.

²⁵ai isrāīl ke gharāne, jab tum registān meṅ ghūmte phirte the to kyā tum ne un 40 sāloṅ ke daurān kabhī mujhe zabah aur ġhallā kī qurbāniyāṅ pesh kīṅ?

²⁶nahīṅ, us waqt bhī tum apne bādshāh sakkūt dewatā aur apne sitāre kīwān dewatā ko uṭhāe phirte the, go tum ne apne hāthoṅ se yih but apne lie banā lie the.

²⁷is lie rab jis kā nām lashkaroṅ kā ḳhudā hai farmātā hai ki maiṅ tumheṅ jilāwatan karke damishq ke pār basā dūṅgā.”