Read Roman Urdu Geo āmūs 8 Bible Online

āmūs 8 - Roman Urdu Geo bible

āmūs 8

¹ek bār phir rab qādir-e-mutlaq ne mujhe royā dikhāī. maiṅ ne pake hue phal se bharī huī ṭokrī dekhī.

²rab ne pūchhā, “ai āmūs, tujhe kyā nazar ātā hai?” maiṅ ne jawāb diyā, “pake hue phal se bharī huī ṭokrī.” tab rab ne mujh se farmāyā, “merī qaum kā anjām pak gayā hai. ab se maiṅ unheṅ sazā die baġhair nahīṅ chhoṛūṅgā.

³rab qādir-e-mutlaq farmātā hai ki us din mahal meṅ gīt sunāī nahīṅ deṅge balki āh-o-zārī. chāroṅ taraf nāsheṅ nazar āeṅgī, kyūṅki dushman unheṅ har jagah phaiṅkegā. ḳhāmosh!”

⁴ai ġharīboṅ ko kuchalne wālo, ai zarūratmandoṅ ko tabāh karne wālo, suno!

⁵tum kahte ho, “nae chāṅd kī īd kab guzar jāegī, sabat kā din kab ḳhatm hai tāki ham anāj ke godām khol kar ġhallā bech sakeṅ? tab ham paimāish ke bartan chhoṭe aur tarāzū ke bāṭ halke banāeṅge, sāth sāth saude kā bhāo baṛhāeṅge. ham faroḳht karte waqt anāj ke sāth us kā bhūsā bhī milāeṅge.” apne nājāiz tarīqoṅ se tum thoṛe paisoṅ meṅ balki ek joṛī jūtoṅ ke iwaz ġharīboṅ ko ḳharīdte ho.

⁷rab ne yāqūb ke faḳhr kī qasam khā kar wādā kiyā hai, “jo kuchh un se sarzad huā hai use maiṅ kabhī nahīṅ bhūlūṅgā.

⁸un hī kī wajah se zamīn laraz uṭhegī aur us ke tamām bāshinde mātam kareṅge. jis tarah misr meṅ daryā-e-nīl barsāt ke mausam meṅ sailābī sūrat iḳhtiyār kar letā hai usī tarah pūrī zamīn uṭhegī. wuh nīl kī tarah josh meṅ āegī, phir dubārā utar jāegī.”

⁹rab qādir-e-mutlaq farmātā hai, “us din maiṅ hone dūṅgā ki sūraj dopahar ke waqt ġhurūb ho jāe. din urūj par hī hogā to zamīn par andherā chhā jāegā.

¹⁰maiṅ tumhāre tahwāroṅ ko mātam meṅ aur tumhāre gītoṅ ko āh-o-bukā meṅ badal dūṅgā. maiṅ sab ko ṭāṭ ke mātamī libās pahnā kar har ek kā sar munḍwāūṅgā. log yūṅ mātam kareṅge jaisā un kā wāhid beṭā kūch kar gayā ho. anjām kā wuh din kitnā talḳh hogā.”

¹¹qādir-e-mutlaq farmātā hai, “aise din āne wāle haiṅ jab maiṅ mulk meṅ kāl bhejūṅgā. lekin log na roṭī aur na pānī se balki allāh kā kalām sunane se mahrūm raheṅge.

¹²log laṛkhaṛāte hue ek samundar se dūsre tak aur shimāl se mashriq tak phireṅge tāki rab kā kalām mil jāe, lekin besūd.

¹³us din ḳhūbsūrat kuṅwāriyāṅ aur jawān mard pyās ke māre behosh ho jāeṅge.

¹⁴jo is waqt sāmariyya ke makrūh but kī qasam khāte aur kahte haiṅ, ‘ai dān, tere dewatā kī hayāt kī qasam’ yā ‘ai bair-sabā, tere dewatā kī qasam!’ wuh us waqt gir jāeṅge aur dubārā kabhī nahīṅ uṭheṅge.”