Read Roman Urdu Geo abadiyāh 1 Bible Online

abadiyāh 1 - Roman Urdu Geo bible

abadiyāh 1

¹zail meṅ wuh royā qalamband hai jo abadiyāh ne dekhī. us meṅ wuh kuchh bayān kiyā gayā hai jo rab qādir-e-mutlaq ne adom ke bāre meṅ farmāyā. ham ne rab kī taraf se paiġhām sunā hai, ek qāsid ko aqwām ke pās bhejā gayā hai jo unheṅ hukm de, “uṭho! āo, ham adom se laṛne ke lie tayyār ho jāeṅ.”

²rab adom se farmātā hai, “maiṅ tujhe qaumoṅ meṅ chhoṭā banā dūṅgā, aur tujhe bahut haqīr jānā jāegā.

³tere dil ke ġhurūr ne tujhe fareb diyā hai. chūṅki tū chaṭānoṅ kī darāṛoṅ meṅ aur bulandiyoṅ par rahtā hai is lie tū dil meṅ sochtā hai, ‘kaun mujhe yahāṅ se utār degā’?”

⁴lekin rab farmātā hai, “ḳhwāh tū apnā ghoṅslā uqāb kī tarah bulandī par kyūṅ na banāe balki use sitāroṅ ke darmiyān lagā le, to bhī maiṅ tujhe wahāṅ se utār kar ḳhāk meṅ milā dūṅgā.

⁵agar ḍākū rāt ke waqt tujhe lūṭ lete to wuh sirf utnā hī chhīn lete jitnā uṭhā kar le jā sakte haiṅ. agar tū angūr kā bāġh hotā aur mazdūr fasal chunane ke lie āte to thoṛā bahut un ke pīchhe rah jātā. lekin terā anjām is se kahīṅ zyādā burā hogā.

⁶dushman esau [1] ke kone kone kā khoj lagā lagā kar us ke tamām poshīdā ḳhazāne lūṭ legā.

⁷tere tamām ittihādī tujhe mulk kī sarhad tak bhagā deṅge, tere dost tujhe fareb de kar tujh par ġhālib āeṅge. balki terī roṭī khāne wāle hī tere lie phandā lagāeṅge, aur tujhe patā nahīṅ chalegā.”

⁸rab farmātā hai, “us din maiṅ adom ke dānishmandoṅ ko tabāh kar dūṅgā. tab esau ke pahāṛī ilāqe meṅ samajh aur aql kā nām-o-nishān nahīṅ rahegā.

⁹ai temān, tere sūrme bhī saḳht dahshat khāeṅge, kyūṅki us waqt esau ke pahāṛī ilāqe meṅ qatl-o-ġhārat ām hogī, koī nahīṅ bachegā.

¹⁰tū ne apne bhāī yāqūb [2] par zulm-o-tashaddud kiyā, is lie terī ḳhūb ruswāī ho jāegī, tujhe yūṅ miṭāyā jāegā ki āindā terā nām-o-nishān tak nahīṅ rahegā.

¹¹jab ajnabī faujī yarūshalam ke darwāzoṅ meṅ ghus āe to tū fāsile par khaṛā ho kar un jaisā thā. jab unhoṅ ne tamām māl-o-daulat chhīn liyā, jab unhoṅ ne qur'ā ḍāl kar āpas meṅ yarūshalam ko bāṅṭ liyā to tū ne un kā hī rawayyā apnā liyā.

¹²tujhe tere bhāī kī badqismatī par ḳhushī nahīṅ manānī chāhie thī. munāsib nahīṅ thā ki tū yahūdāh ke bāshindoṅ kī tabāhī par shādiyānā bajātā. un kī musībat dekh kar tujhe sheḳhī nahīṅ mārnī chāhie thī.

¹³yih ṭhīk nahīṅ thā ki tū us din tabāhshudā shahr meṅ ghus āyā tāki yarūshalam kī musībat se lutf uṭhāe aur un kā bachā-khuchā māl lūṭ le.

¹⁴kitnī burī bāt thī ki tū shahr se nikalne wāle rāstoṅ par tāk meṅ baiṭh gayā tāki wahāṅ se bhāgne wāloṅ ko tabāh kare aur bache huoṅ ko dushman ke hawāle kare.

¹⁵kyūṅki rab kā din tamām aqwām ke lie qarīb ā gayā hai. jo sulūk tū ne dūsroṅ ke sāth kiyā wuhī sulūk tere sāth kiyā jāegā. terā ġhalat kām tere apne hī sar par āegā.

¹⁶pahle tumheṅ mere muqaddas pahāṛ par mere ġhazab kā pyālā pīnā paṛā, lekin ab tamām dīgar aqwām use pītī raheṅgī. balki wuh use pī pī kar ḳhālī kareṅgī, unheṅ us ke āḳhirī qatre bhī chāṭne paṛeṅge. phir un kā nām-o-nishān nahīṅ rahegā, aisā lagegā ki wuh kabhī thīṅ nahīṅ.

¹⁷lekin koh-e-siyyūn par najāt hogī, yarūshalam muqaddas hogā. tab yāqūb kā gharānā [3] dubārā apnī maurūsī zamīn par qabzā karegā,

¹⁸aur isrāīlī qaum [4] bhaṛaktī āg ban kar adom ko bhūse kī tarah bhasm karegī. adom kā ek shaḳhs bhī nahīṅ bachegā. kyūṅki rab ne yih farmāyā hai.

¹⁹tab najab yānī junūb ke bāshinde adom ke pahāṛī ilāqe par qabzā kareṅge, aur maġhrib ke nashebī pahāṛī ilāqe ke bāshinde filistiyoṅ kā ilāqā apnā leṅge. wuh ifrāīm aur sāmariyya ke ilāqoṅ par bhī qabzā kareṅge. jiliād kā ilāqā binyamīn ke qabīle kī milkiyat banegā.

²⁰isrāīl ke jilāwatanoṅ ko kan'āniyoṅ kā mulk shimālī shahr sārpat tak hāsil hogā jabki yarūshalam ke jo bāshinde jilāwatan ho kar sifārād meṅ jā base wuh junūbī ilāqe najab par qabzā kareṅge.

²¹najāt dene wāle koh-e-siyyūn par ā kar adom ke pahāṛī ilāqe par hukūmat kareṅge. tab rab hī bādshāh hogā.!”