Read Roman Urdu Geo yūnus 2 Bible Online

yūnus 2 - Roman Urdu Geo bible

yūnus 2

¹machhlī ke peṭ meṅ yūnus ne rab apne ḳhudā se zail kī duā kī,

²“maiṅ ne baṛī musībat meṅ ā kar rab se iltijā kī, aur us ne mujhe jawāb diyā. maiṅ ne pātāl kī gahrāiyoṅ se chīḳh kar faryād kī to tū ne merī sunī.

³tū ne mujhe gahre pānī balki samundar ke bīch meṅ hī phaiṅk diyā. pānī ke zordār bahāo ne mujhe gher liyā, terī tamām lahreṅ aur maujeṅ mujh par se guzar gaīṅ.

⁴tab maiṅ bolā, ‘mujhe tere huzūr se ḳhārij kar diyā gayā hai, lekin maiṅ tere muqaddas ghar kī taraf taktā rahūṅgā.’

⁵pānī mere gale tak pahuṅch gayā, samundar kī gahrāiyoṅ ne mujhe chhupā liyā. mere sar se samundarī paude lipaṭ gae.

⁶pānī meṅ utarte utarte maiṅ pahāṛoṅ kī bunyādoṅ tak pahuṅch gayā. maiṅ zamīn meṅ dhaṅs kar ek aise mulk meṅ ā gayā jis ke darwāze hameshā ke lie mere pīchhe band ho gae. lekin ai rab, mere ḳhudā, tū hī merī jān ko gaṛhe se nikāl lāyā!

⁷jab merī jān nikalne lagī to tū, ai rab mujhe yād āyā, aur merī duā tere muqaddas ghar meṅ tere huzūr pahuṅchī.

⁸jo butoṅ kī pūjā karte haiṅ unhoṅ ne allāh se wafādār rahne kā wādā toṛ diyā hai.

⁹lekin maiṅ shukrguzārī ke gīt gāte hue tujhe qurbānī pesh karūṅga. jo mannat maiṅ ne mānī use pūrā karūṅga. rab hī najāt detā hai.”

¹⁰tab rab ne machhlī ko hukm diyā ki wuh yūnus ko ḳhushkī par ugal de.