Read Roman Urdu Geo yūnus 3 Bible Online

yūnus 3 - Roman Urdu Geo bible

yūnus 3

¹rab ek bār phir yūnus se hamkalām huā,

²“baṛe shahr nīnwā jā kar use wuh paiġhām sunā de jo maiṅ tujhe dūṅgā.”

³is martabā yūnus rab kī sun kar nīnwā ke lie rawānā huā. rab ke nazdīk nīnwā aham shahr thā. us meṅ se guzarne ke lie tīn din darkār the.

⁴pahle din yūnus shahr meṅ dāḳhil huā aur chalte chalte logoṅ ko paiġhām sunāne lagā, “ain 40 din ke bād nīnwā tabāh ho jāegā.”

⁵yih sun kar nīnwā ke bāshinde allāh par īmān lāe. unhoṅ ne roze kā elān kiyā, aur chhoṭe se le kar baṛe tak sab ṭāṭ oṛh kar mātam karne lage.

⁶jab yūnus kā paiġhām nīnwā ke bādshāh tak pahuṅchā to us ne taḳht par se utar kar apne shāhī kapṛoṅ ko utār diyā aur ṭāṭ oṛh kar ḳhāk meṅ baiṭh gayā.

⁷us ne shahr meṅ elān kiyā, “bādshāh aur us ke shurafā kā farmān suno! kisī ko bhī khāne yā pīne kī ijāzat nahīṅ. gāy-bail aur bheṛ-bakriyoṅ samet tamām jānwar bhī is meṅ shāmil haiṅ. na unheṅ charne do, na pānī pīne do.

⁸lāzim hai ki sab log jānwaroṅ samet ṭāṭ oṛh leṅ. har ek pūre zor se allāh se iltijā kare, har ek apnī burī rāhoṅ aur apne zulm-o-tashaddud se bāz āe.

⁹kyā mālūm, shāyad allāh pachhtāe. shāyad us kā shadīd ġhazab ṭal jāe aur ham halāk na hoṅ.”

¹⁰jab allāh ne un kā yih rawayyā dekhā, ki wuh wāqaī apnī burī rāhoṅ se bāz āe to wuh pachhtāyā aur un par wuh āfat na lāyā jis kā elān us ne kiyā thā.