Read Roman Urdu Geo gintī 1 Bible Online

gintī 1 - Roman Urdu Geo bible

gintī 1

¹isrāīliyoṅ ko misr se nikle hue ek sāl se zyādā arsā guzar gayā thā. ab tak wuh dasht-e-sīnā meṅ the. dūsre sāl ke dūsre mahīne ke pahle din rab mulāqāt ke ḳhaime meṅ mūsā se hamkalām huā. us ne kahā,

²“tū aur hārūn tamām isrāīliyoṅ kī mardumshumārī kunboṅ aur ābāī gharānoṅ ke mutābiq karnā. un tamām mardoṅ kī fahrist banānā

³jo kam az kam bīs sāl ke aur jang laṛne ke qābil hoṅ.

⁴is meṅ har qabīle ke ek ḳhāndān kā sarparast tumhārī madad kare.

⁵yih un ke nām haiṅ: rūbin ke qabīle se ilīsūr bin shadiyūr,

⁶shamāūn ke qabīle se salūmī'el bin sūrīshaddī,

⁷yahūdāh ke qabīle se nahson bin ammīnadāb,

⁸ishkār ke qabīle se natanī'el bin zuġhar,

⁹zabūlūn ke qabīle se iliyāb bin helon,

¹⁰yūsuf ke beṭe ifrāīm ke qabīle se ilīsamā bin ammīhūd, yūsuf ke beṭe manassī ke qabīle se jamlī'el bin fadāhsūr,

¹¹binyamīn ke qabīle se abidān bin jidāūnī,

¹²dān ke qabīle se aḳhīazar bin ammīshaddī,

¹³āshar ke qabīle se faj'ī'el bin akrān,

¹⁴jad ke qabīle se iliyāsaf bin daūel,

¹⁵naftālī ke qabīle se aḳhīrā bin enān.”

¹⁶yihī mard jamā'at se is kām ke lie bulāe gae. wuh apne qabīloṅ ke rāhnumā aur kunboṅ ke sarparast the.

¹⁷in kī madad se mūsā aur hārūn ne

¹⁸usī din pūrī jamā'at ko ikaṭṭhā kiyā. har isrāīlī mard jo kam az kam 20 sāl kā thā rajisṭar meṅ darj kiyā gayā. rajisṭar kī tartīb un ke kunboṅ aur ābāī gharānoṅ ke mutābiq thī.

¹⁹sab kuchh waisā hī kiyā gayā jaisā rab ne hukm diyā thā. mūsā ne sīnā ke registān meṅ logoṅ kī mardumshumārī kī. natījā yih niklā:

²⁰rūbin ke qabīle ke 46,500 mard,

²²shamāūn ke qabīle ke 59,300 mard,

²⁴jad ke qabīle ke 45,650 mard,

²⁶yahūdāh ke qabīle ke 74,600 mard,

²⁸ishkār ke qabīle ke 54,400 mard,

³⁰zabūlūn ke qabīle ke 57,400 mard,

³²yūsuf ke beṭe ifrāīm ke qabīle ke 40,500 mard,

³⁴yūsuf ke beṭe manassī ke qabīle ke 32,200 mard,

³⁶binyamīn ke qabīle ke 35,400 mard,

³⁸dān ke qabīle ke 62,700 mard,

⁴⁰āshar ke qabīle ke 41,500 mard,

⁴²naftālī ke qabīle ke 53,400 mard.

⁴⁴mūsā, hārūn aur qabīloṅ ke bārah rāhnumāoṅ ne in tamām ādmiyoṅ ko ginā.

⁴⁵un kī pūrī tādād 6,03,550 thī.

⁴⁷lekin lāwiyoṅ kī mardumshumārī na huī,

⁴⁸kyūṅki rab ne mūsā se kahā thā,

⁴⁹“isrāīliyoṅ kī mardumshumārī meṅ lāwiyoṅ ko shāmil na karnā.

⁵⁰is ke bajāe unheṅ sharīat kī sukūnatgāh aur us kā sārā sāmān saṅbhālne kī zimmādārī denā. wuh safar karte waqt yih ḳhaimā aur us kā sārā sāmān uṭhā kar le jāeṅ, us kī ḳhidmat ke lie hāzir raheṅ aur rukte waqt use apne ḳhaimoṅ se ghere rakheṅ.

⁵¹rawānā hote waqt wuhī ḳhaime ko sameṭeṅ aur rukte waqt wuhī use lagāeṅ. agar koī aur us ke qarīb āe to use sazā-e-maut dī jāegī.

⁵²bāqī isrāīlī ḳhaimāgāh meṅ apne apne daste ke mutābiq aur apne apne alam ke irdgird apne ḳhaime lagāeṅ.

⁵³lekin lāwī apne ḳhaimoṅ se sharīat kī sukūnatgāh ko gher leṅ tāki merā ġhazab kisī ġhalat shaḳhs ke nazdīk āne se isrāīliyoṅ kī jamā'at par nāzil na ho jāe. yūṅ lāwiyoṅ ko sharīat kī sukūnatgāh ko saṅbhālnā hai.”

⁵⁴isrāīliyoṅ ne waisā hī kiyā jaisā rab ne mūsā ko hukm diyā thā.