Read Roman Urdu Geo gintī 10 Bible Online

gintī 10 - Roman Urdu Geo bible

gintī 10

¹rab ne mūsā se kahā,

²“chāṅdī ke do bigul ghaṛ kar banwā le. unheṅ jamā'at ko jamā karne aur qabīloṅ ko rawānā karne ke lie istemāl kar.

³jab donoṅ ko der tak bajāyā jāe to pūrī jamā'at mulāqāt ke ḳhaime ke darwāze par ā kar tere sāmne jamā ho jāe.

⁴lekin agar ek hī bajāyā jāe to sirf kunboṅ ke buzurg tere sāmne jamā ho jāeṅ.

⁵agar un kī āwāz sirf thoṛī der ke lie sunāī de to maqdis ke mashriq meṅ maujūd qabīle rawānā ho jāeṅ.

⁶phir jab un kī āwāz dūsrī bār thoṛī der ke lie sunāī de to maqdis ke junūb meṅ maujūd qabīle rawānā ho jāeṅ. jab un kī āwāz thoṛī der ke lie sunāī de to yih rawānā hone kā elān hogā.

⁷is ke muqābale meṅ jab un kī āwāz der tak sunāī de to yih is bāt kā elān hogā ki jamā'at jamā ho jāe.

⁸bigul bajāne kī zimmādārī hārūn ke beṭoṅ yānī imāmoṅ ko dī jāe. yih tumhāre aur āne wālī nasloṅ ke lie dāimī usūl ho.

⁹un kī āwāz us waqt bhī thoṛī der ke lie sunā do jab tum apne mulk meṅ kisī zālim dushman se jang laṛne ke lie nikloge. tab rab tumhārā ḳhudā tumheṅ yād karke dushman se bachāegā.

¹⁰isī tarah un kī āwāz maqdis meṅ ḳhushī ke mauqoṅ par sunāī de yānī muqarrarā īdoṅ aur nae chāṅd kī īdoṅ par. in mauqoṅ par wuh bhasm hone wālī qurbāniyāṅ aur salāmatī kī qurbāniyāṅ chaṛhāte waqt bajāe jāeṅ. phir tumhārā ḳhudā tumheṅ yād karegā. maiṅ rab tumhārā ḳhudā hūṅ.”

¹¹isrāīliyoṅ ko misr se nikle ek sāl se zāid arsā ho chukā thā. dūsre sāl ke bīsweṅ din bādal mulāqāt ke ḳhaime par se uṭhā.

¹²phir isrāīlī muqarrarā tartīb ke mutābiq dasht-e-sīnā se rawānā hue. chalte chalte bādal fārān ke registān meṅ utar āyā.

¹³us waqt wuh pahlī dafā us tartīb se rawānā hue jo rab ne mūsā kī mārifat muqarrar kī thī.

¹⁴pahle yahūdāh ke qabīle ke tīn daste apne alam ke taht chal paṛe. tīnoṅ kā kamānḍar nahson bin ammīnadāb thā.

¹⁵sāth chalne wāle qabīle ishkār kā kamānḍar natanī'el bin zuġhar thā.

¹⁶zabūlūn kā qabīlā bhī sāth chalā jis kā kamānḍar iliyāb bin helon thā.

¹⁷is ke bād mulāqāt kā ḳhaimā utārā gayā. jairsonī aur mirārī use uṭhā kar chal die.

¹⁸in lāwiyoṅ ke bād rūbin ke qabīle ke tīn daste apne alam ke taht chalne lage. tīnoṅ kā kamānḍar ilīsūr bin shadiyūr thā.

¹⁹sāth chalne wāle qabīle shamāūn kā kamānḍar salūmī'el bin sūrīshaddī thā.

²⁰jad kā qabīlā bhī sāth chalā jis kā kamānḍar iliyāsaf bin daūel thā.

²¹phir lāwiyoṅ meṅ se qihātī maqdis kā sāmān uṭhā kar rawānā hue. lāzim thā ki un ke aglī manzil par pahuṅchne tak mulāqāt kā ḳhaimā lagā diyā gayā ho.

²²is ke bād ifrāīm ke qabīle ke tīn daste apne alam ke taht chal die. un kā kamānḍar ilīsamā bin ammīhūd thā.

²³ifrāīm ke sāth chalne wāle qabīle manassī kā kamānḍar jamlī'el bin fadāhsūr thā.

²⁴binyamīn kā qabīlā bhī sāth chalā jis kā kamānḍar abidān bin jidāūnī thā.

²⁵āḳhir meṅ dān ke tīn daste aqbī muhāfiz ke taur par apne alam ke taht rawānā hue. un kā kamānḍar aḳhīazar bin ammīshaddī thā.

²⁶dān ke sāth chalne wāle qabīle āshar kā kamānḍar faj'ī'el bin akrān thā.

²⁷naftālī kā qabīlā bhī sāth chalā jis kā kamānḍar aḳhīrā bin enān thā.

²⁸isrāīlī isī tartīb se rawānā hue.

²⁹mūsā ne apne midiyānī susar raūel yānī yitro ke beṭe hobāb se kahā, “ham us jagah ke lie rawānā ho rahe haiṅ jis kā wādā rab ne ham se kiyā hai. hamāre sāth chaleṅ! ham āp par ehsān kareṅge, kyūṅki rab ne isrāīl par ehsān karne kā wādā kiyā hai.”

³⁰lekin hobāb ne jawāb diyā, “maiṅ sāth nahīṅ jāūṅgā balki apne mulk aur rishtedāroṅ ke pās wāpas chalā jāūṅgā.”

³¹mūsā ne kahā, “mehrbānī karke hameṅ na chhoṛeṅ. kyūṅki āp hī jānte haiṅ ki ham registān meṅ kahāṅ kahāṅ apne ḍere ḍāl sakte haiṅ. āp registān meṅ hameṅ rāstā dikhā sakte haiṅ.

³²agar āp hamāre sāth jāeṅ to ham āp ko us ehsān meṅ sharīk kareṅge jo rab ham par karegā.”

³³chunāṅche unhoṅ ne rab ke pahāṛ se rawānā ho kar tīn din safar kiyā. is daurān rab kā ahd kā sandūq un ke āge āge chalā tāki un ke lie ārām karne kī jagah mālūm kare.

³⁴jab kabhī wuh rawānā hote to rab kā bādal din ke waqt un ke ūpar rahtā.

³⁵sandūq ke rawānā hote waqt mūsā kahtā, “ai rab, uṭh. tere dushman titar-bitar ho jāeṅ. tujh se nafrat karne wāle tere sāmne se farār ho jāeṅ.”

³⁶aur jab bhī wuh ruk jātā to mūsā kahtā, “ai rab, isrāīl ke hazāroṅ ḳhāndānoṅ ke pās wāpas ā.”