Read Roman Urdu Geo gintī 12 Bible Online

gintī 12 - Roman Urdu Geo bible

gintī 12

¹ek din mariyam aur hārūn mūsā ke ḳhilāf bāteṅ karne lage. wajah yih thī ki us ne kūsh kī ek aurat se shādī kī thī.

²unhoṅ ne pūchhā, “kyā rab sirf mūsā kī mārifat bāt kartā hai? kyā us ne ham se bhī bāt nahīṅ kī?” rab ne un kī yih bāteṅ sunīṅ.

³lekin mūsā nihāyat halīm thā. duniyā meṅ us jaisā halīm koī nahīṅ thā.

⁴achānak rab mūsā, hārūn aur mariyam se muḳhātib huā, “tum tīnoṅ bāhar nikal kar mulāqāt ke ḳhaime ke pās āo.” tīnoṅ wahāṅ pahuṅche.

⁵tab rab bādal ke satūn meṅ utar kar mulāqāt ke ḳhaime ke darwāze par khaṛā huā. us ne hārūn aur mariyam ko bulāyā to donoṅ āe.

⁶us ne kahā, “merī bāt suno. jab tumhāre darmiyān nabī hotā hai to maiṅ apne āp ko royā meṅ us par zāhir kartā hūṅ yā ḳhwāb meṅ us se muḳhātib hotā hūṅ.

⁷lekin mere ḳhādim mūsā kī aur bāt hai. use maiṅ ne apne pūre gharāne par muqarrar kiyā hai.

⁸us se maiṅ rū-ba-rū hamkalām hotā hūṅ. us se maiṅ muammoṅ ke zarī'e nahīṅ balki sāf sāf bāt kartā hūṅ. wuh rab kī sūrat deḳhtā hai. to phir tum mere ḳhādim ke ḳhilāf bāteṅ karne se kyūṅ na ḍare?”

⁹rab kā ġhazab un par ān paṛā, aur wuh chalā gayā.

¹⁰jab bādal kā satūn ḳhaime se dūr huā to mariyam kī jild barf kī mānind safed thī. wuh koṛh kā shikār ho gaī thī. hārūn us kī taraf muṛā to us kī hālat dekhī

¹¹aur mūsā se kahā, “mere āqā, mehrbānī karke hameṅ is gunāh kī sazā na deṅ jo hamārī hamāqat ke bāis sarzad huā hai.

¹²mariyam ko is hālat meṅ na chhoṛeṅ. wuh to aise bachche kī mānind hai jo murdā paidā huā ho, jis ke jism kā ādhā hissā gal chukā ho.”

¹³tab mūsā ne pukār kar rab se kahā, “ai allāh, mehrbānī karke use shifā de.”

¹⁴rab ne jawāb meṅ mūsā se kahā, “agar mariyam kā bāp us ke muṅh par thūktā to kyā wuh pūre hafte tak sharm mahsūs na kartī? use ek hafte ke lie ḳhaimāgāh ke bāhar band rakh. is ke bād use wāpas lāyā jā saktā hai.”

¹⁵chunāṅche mariyam ko ek hafte ke lie ḳhaimāgāh ke bāhar band rakhā gayā. log us waqt tak safar ke lie rawānā na hue jab tak use wāpas na lāyā gayā.

¹⁶jab wuh wāpas āī to isrāīlī hasīrāt se rawānā ho kar fārān ke registān meṅ ḳhaimāzan hue.