Read Roman Urdu Geo gintī 13 Bible Online

gintī 13 - Roman Urdu Geo bible

gintī 13

¹phir rab ne mūsā se kahā,

²“kuchh ādmī mulk-e-kan'ān kā jāizā lene ke lie bhej de, kyūṅki maiṅ use isrāīliyoṅ ko dene ko hūṅ. har qabīle meṅ se ek rāhnumā ko chun kar bhej de.”

³mūsā ne rab ke kahne par unheṅ dasht-e-fārān se bhejā. sab isrāīlī rāhnumā the.

⁴un ke nām yih haiṅ: rūbin ke qabīle se sammūa bin zakkūr,

⁵shamāūn ke qabīle se sāfat bin horī,

⁶yahūdāh ke qabīle se kālib bin yafunnā,

⁷ishkār ke qabīle se ijāl bin yūsuf,

⁸ifrāīm ke qabīle se hosea bin nūn,

⁹binyamīn ke qabīle se faltī bin rafū,

¹⁰zabūlūn ke qabīle se jaddī'el bin sodī,

¹¹yūsuf ke beṭe manassī ke qabīle se jiddī bin sūsī,

¹²dān ke qabīle se ammī'el bin jamallī,

¹³āshar ke qabīle se satūr bin mīkāel,

¹⁴naftālī ke qabīle se naḳhbī bin wufsī,

¹⁵jad ke qabīle se jiyūel bin mākī.

¹⁶mūsā ne in hī bārah ādmiyoṅ ko mulk kā jāizā lene ke lie bhejā. us ne hosea kā nām yashūa yānī ‘rab najāt hai’ meṅ badal diyā.

¹⁷unheṅ ruḳhsat karne se pahle us ne kahā, “dasht-e-najab se guzar kar pahāṛī ilāqe tak pahuṅcho.

¹⁸mālūm karo ki yih kis tarah kā mulk hai aur us ke bāshinde kaise haiṅ. kyā wuh tāqatwar haiṅ yā kamzor, tādād meṅ kam haiṅ yā zyādā?

¹⁹jis mulk meṅ wuh baste haiṅ kyā wuh achchhā hai ki nahīṅ? wuh kis qism ke shahroṅ meṅ rahte haiṅ? kyā un kī chārdīwāriyāṅ haiṅ ki nahīṅ?

²⁰mulk kī zamīn zarḳhez hai yā banjar? us meṅ daraḳht haiṅ ki nahīṅ? aur jur'at karke mulk kā kuchh phal chun kar le āo.” us waqt pahle angūr pak gae the.

²¹chunāṅche in ādmiyoṅ ne safar karke dasht-e-sīn se rahob tak mulk kā jāizā liyā. rahob labo-hamāt ke qarīb hai.

²²wuh dasht-e-najab se guzar kar habrūn pahuṅche jahāṅ anāq ke beṭe aḳhīmān, sīsī aur talmī rahte the. (habrūn ko misr ke shahr zuan se sāt sāl pahle tāmīr kiyā gayā thā).

²³jab wuh wādī-e-iskāl tak pahuṅche to unhoṅ ne ek ḍālī kāṭ lī jis par angūr kā guchchhā lagā huā thā. do ādmiyoṅ ne yih angūr, kuchh anār aur kuchh anjīr lāṭhī par laṭkāe aur use uṭhā kar chal paṛe.

²⁴us jagah kā nām us guchchhe ke sabab se jo isrāīliyoṅ ne wahāṅ se kāṭ liyā iskāl yānī guchchhā rakhā gayā.

²⁵chālīs din tak mulk kā khoj lagāte lagāte wuh lauṭ āe.

²⁶wuh mūsā, hārūn aur isrāīl kī pūrī jamā'at ke pās āe jo dasht-e-fārān meṅ qādis kī jagah par intizār kar rahe the. wahāṅ unhoṅ ne sab kuchh batāyā jo unhoṅ ne mālūm kiyā thā aur unheṅ wuh phal dikhāe jo le kar āe the.

²⁷unhoṅ ne mūsā ko riporṭ dī, “ham us mulk meṅ gae jahāṅ āp ne hameṅ bhejā thā. wāqaī us mulk meṅ dūdh aur shahd kī kasrat hai. yahāṅ hamāre pās us ke kuchh phal bhī haiṅ.

²⁸lekin us ke bāshinde tāqatwar haiṅ. un ke shahroṅ kī fasīleṅ haiṅ, aur wuh nihāyat baṛe haiṅ. ham ne wahāṅ anāq kī aulād bhī dekhī.

²⁹amālīqī dasht-e-najab meṅ rahte haiṅ jabki hittī, yabūsī aur amorī pahāṛī ilāqe meṅ ābād haiṅ. kan'ānī sāhilī ilāqe aur daryā-e-yardan ke kināre kināre baste haiṅ.”

³⁰kālib ne mūsā ke sāmne jamāshudā logoṅ ko ishārā kiyā ki wuh ḳhāmosh ho jāeṅ. phir us ne kahā, “āeṅ, ham mulk meṅ dāḳhil ho jāeṅ aur us par qabzā kar leṅ, kyūṅki ham yaqīnan yih karne ke qābil haiṅ.”

³¹lekin dūsre ādmiyoṅ ne jo us ke sāth mulk ko deḳhne gae the kahā, “ham un logoṅ par hamlā nahīṅ kar sakte, kyūṅki wuh ham se tāqatwar haiṅ.”

³²unhoṅ ne isrāīliyoṅ ke darmiyān us mulk ke bāre meṅ ġhalat afwāheṅ phailāīṅ jis kī taftīsh unhoṅ ne kī thī. unhoṅ ne kahā, “jis mulk meṅ se ham guzare tāki us kā jāizā leṅ wuh apne bāshindoṅ ko haṛap kar letā hai. jo bhī us meṅ rahtā hai nihāyat darāzqad hai.

³³ham ne wahāṅ deoqāmat afrād bhī dekhe. (anāq ke beṭe deoqāmat ke afrād kī aulād the). un ke sāmne ham apne āp ko ṭiḍḍī jaisā mahsūs kar rahe the, aur ham un kī nazar meṅ aise the bhī.”