Read Roman Urdu Geo gintī 14 Bible Online

gintī 14 - Roman Urdu Geo bible

gintī 14

¹us rāt tamām log chīḳheṅ mār mār kar rote rahe.

²sab mūsā aur hārūn ke ḳhilāf buṛbuṛāne lage. pūrī jamā'at ne un se kahā, “kāsh ham misr yā is registān meṅ mar gae hote!

³rab hameṅ kyūṅ us mulk meṅ le jā rahā hai? kyā is lie ki dushman hameṅ talwār se qatl kare aur hamāre bāl-bachchoṅ ko lūṭ le? kyā behtar nahīṅ hogā ki ham misr wāpas jāeṅ?”

⁴unhoṅ ne ek dūsre se kahā, “āo, ham rāhnumā chun kar misr wāpas chale jāeṅ.”

⁵tab mūsā aur hārūn pūrī jamā'at ke sāmne muṅh ke bal gire.

⁶lekin yashūa bin nūn aur kālib bin yafunnā bāqī das jāsūsoṅ se farq the. pareshānī ke ālam meṅ unhoṅ ne apne kapṛe phāṛ kar

⁷pūrī jamā'at se kahā, “jis mulk meṅ se ham guzare aur jis kī taftīsh ham ne kī wuh nihāyat hī achchhā hai.

⁸agar rab ham se ḳhush hai to wuh zarūr hameṅ us mulk meṅ le jāegā jis meṅ dūdh aur shahd kī kasrat hai. wuh hameṅ zarūr yih mulk degā.

⁹rab se baġhāwat mat karnā. us mulk ke rahne wāloṅ se na ḍareṅ. ham unheṅ haṛap kar jāeṅge. un kī panāh un se jātī rahī hai jabki rab hamāre sāth hai. chunāṅche un se mat ḍareṅ.”

¹⁰yih sun kar pūrī jamā'at unheṅ sangsār karne ke lie tayyār huī. lekin achānak rab kā jalāl mulāqāt ke ḳhaime par zāhir huā, aur tamām isrāīliyoṅ ne use dekhā.

¹¹rab ne mūsā se kahā, “yih log mujhe kab tak haqīr jāneṅge? wuh kab tak mujh par īmān rakhne se inkār kareṅge agarche maiṅ ne un ke darmiyān itne mojize kie haiṅ?

¹²maiṅ unheṅ wabā se mār ḍālūṅgā aur unheṅ rū-e-zamīn par se miṭā dūṅgā. un kī jagah maiṅ tujh se ek qaum banāūṅgā jo un se baṛī aur tāqatwar hogī.”

¹³lekin mūsā ne rab se kahā, “phir misrī yih sun leṅge! kyūṅki tū ne apnī qudrat se in logoṅ ko misr se nikāl kar yahāṅ tak pahuṅchāyā hai.

¹⁴misrī yih bāt kan'ān ke bāshindoṅ ko batāeṅge. yih log pahle se sun chuke haiṅ ki rab is qaum ke sāth hai, ki tujhe rū-ba-rū dekhā jātā hai, ki terā bādal un ke ūpar ṭhahrā rahtā hai, aur ki tū din ke waqt bādal ke satūn meṅ aur rāt ko āg ke satūn meṅ in ke āge āge chaltā hai.

¹⁵agar tū ek dam is pūrī qaum ko tabāh kar ḍāle to bāqī qaumeṅ yih sun kar kaheṅgī,

¹⁶‘rab in logoṅ ko us mulk meṅ le jāne ke qābil nahīṅ thā jis kā wādā us ne un se qasam khā kar kiyā thā. isī lie us ne unheṅ registān meṅ halāk kar diyā.’

¹⁷ai rab, ab apnī qudrat yūṅ zāhir kar jis tarah tū ne farmāyā hai. kyūṅki tū ne kahā,

¹⁸‘rab tahammul aur shafqat se bharpūr hai. wuh gunāh aur nāfarmānī muāf kartā hai, lekin har ek ko us kī munāsib sazā bhī detā hai. jab wālidain gunāh kareṅ to un kī aulād ko bhī tīsrī aur chauthī pusht tak sazā ke natāij bhugatne paṛeṅge.’

¹⁹in logoṅ kā qusūr apnī azīm shafqat ke mutābiq muāf kar. unheṅ us tarah muāf kar jis tarah tū unheṅ misr se nikalte waqt ab tak muāf kartā rahā hai.”

²⁰rab ne jawāb diyā, “tere kahne par maiṅ ne unheṅ muāf kar diyā hai.

²¹is ke bāwujūd merī hayāt kī qasam aur mere jalāl kī qasam jo pūrī duniyā ko māmūr kartā hai,

²²in logoṅ meṅ se koī bhī us mulk meṅ dāḳhil nahīṅ hogā. unhoṅ ne merā jalāl aur mere mojize dekhe haiṅ jo maiṅ ne misr aur registān meṅ kar dikhāe haiṅ. to bhī unhoṅ ne das dafā mujhe āzmāyā aur merī na sunī.

²³un meṅ se ek bhī us mulk ko nahīṅ dekhegā jis kā wādā maiṅ ne qasam khā kar un ke bāpdādā se kiyā thā. jis ne bhī mujhe haqīr jānā hai wuh kabhī use nahīṅ dekhegā.

²⁴sirf merā ḳhādim kālib muḳhtalif hai. us kī rūh farq hai. wuh pūre dil se merī pairawī kartā hai, is lie maiṅ use us mulk meṅ le jāūṅgā jis meṅ us ne safar kiyā hai. us kī aulād mulk mīrās meṅ pāegī.

²⁵lekin filhāl amālīqī aur kan'ānī us kī wādiyoṅ meṅ ābād raheṅge. chunāṅche kal muṛ kar wāpas chalo. registān meṅ bahr-e-qulzum kī taraf rawānā ho jāo.”

²⁶rab ne mūsā aur hārūn se kahā,

²⁷“yih sharīr jamā'at kab tak mere ḳhilāf buṛbuṛātī rahegī? un ke gile-shikwe mujh tak pahuṅch gae haiṅ.

²⁸is lie unheṅ batāo, ‘rab farmātā hai ki merī hayāt kī qasam, maiṅ tumhāre sāth wuhī kuchh karūṅga jo tum ne mere sāmne kahā hai.

²⁹tum is registān meṅ mar kar yihīṅ paṛe rahoge, har ek jo 20 sāl yā is se zāid kā hai, jo mardumshumārī meṅ ginā gayā aur jo mere ḳhilāf buṛbuṛāyā.

³⁰go maiṅ ne hāth uṭhā kar qasam khāī thī ki maiṅ tujhe us meṅ basāūṅgā tum meṅ se koī bhī us mulk meṅ dāḳhil nahīṅ hogā. sirf kālib bin yafunnā aur yashūa bin nūn dāḳhil hoṅge.

³¹tum ne kahā thā ki dushman hamāre bachchoṅ ko lūṭ leṅge. lekin un hī ko maiṅ us mulk meṅ le jāūṅgā jise tum ne radd kiyā hai.

³²lekin tum ḳhud dāḳhil nahīṅ hoge. tumhārī lāsheṅ is registān meṅ paṛī raheṅgī.

³³tumhāre bachche 40 sāl tak yahāṅ registān meṅ gallābān hoṅge. unheṅ tumhārī bewafāī ke sabab se us waqt tak taqlīf uṭhānī paṛegī jab tak tum meṅ se āḳhirī shaḳhs mar na gayā ho.

³⁴tum ne chālīs din ke daurān us mulk kā jāizā liyā. ab tumheṅ chālīs sāl tak apne gunāhoṅ kā natījā bhugatnā paṛegā. tab tumheṅ patā chalegā ki is kā kyā matlab hai ki maiṅ tumhārī muḳhālafat kartā hūṅ.

³⁵maiṅ, rab ne yih bāt farmāī hai. maiṅ yaqīnan yih sab kuchh us sārī sharīr jamā'at ke sāth karūṅga jis ne mil kar merī muḳhālafat kī hai. isī registān meṅ wuh ḳhatm ho jāeṅge, yihīṅ mar jāeṅge’.”

³⁶jin ādmiyoṅ ko mūsā ne mulk kā jāizā lene ke lie bhejā thā, rab ne unheṅ fauran mohlak wabā se mār ḍālā, kyūṅki un ke ġhalat afwāheṅ phailāne se pūrī jamā'at buṛbuṛāne lagī thī.

³⁸sirf yashūa bin nūn aur kālib bin yafunnā zindā rahe.

³⁹jab mūsā ne rab kī yih bāteṅ isrāīliyoṅ ko batāīṅ to wuh ḳhūb mātam karne lage.

⁴⁰aglī subhsawere wuh uṭhe aur yih kahte hue ūṅche pahāṛī ilāqe ke lie rawānā hue ki ham se ġhaltī huī hai, lekin ab ham hāzir haiṅ aur us jagah kī taraf jā rahe haiṅ jis kā zikr rab ne kiyā hai.

⁴¹lekin mūsā ne kahā, “tum kyūṅ rab kī ḳhilāfwarzī kar rahe ho? tum kāmyāb nahīṅ hoge.

⁴²wahāṅ na jāo, kyūṅki rab tumhāre sāth nahīṅ hai. tum dushmanoṅ ke hāthoṅ shikast khāoge,

⁴³kyūṅki wahāṅ amālīqī aur kan'ānī tumhārā sāmnā kareṅge. chūṅki tum ne apnā muṅh rab se pher liyā hai is lie wuh tumhāre sāth nahīṅ hogā, aur dushman tumheṅ talwār se mār ḍālegā.”

⁴⁴to bhī wuh apne ġhurūr meṅ jur'at karke ūṅche pahāṛī ilāqe kī taraf baṛhe, hālāṅki na mūsā aur na ahd ke sandūq hī ne ḳhaimāgāh ko chhoṛā.

⁴⁵phir us pahāṛī ilāqe meṅ rahne wāle amālīqī aur kan'ānī un par ān paṛe aur unheṅ mārte mārte hurmā tak titar-bitar kar diyā.