Read Roman Urdu Geo gintī 16 Bible Online

gintī 16 - Roman Urdu Geo bible

gintī 16

¹ek din qorah bin izhār mūsā ke ḳhilāf uṭhā. wuh lāwī ke qabīle kā qihātī thā. us ke sāth rūbin ke qabīle ke tīn ādmī the, iliyāb ke beṭe dātan aur abīrām aur on bin palat. un ke sāth 250 aur ādmī bhī the jo jamā'at ke sardār aur asar-o-rasūḳh wāle the, aur jo kaunsal ke lie chune gae the.

³wuh mil kar mūsā aur hārūn ke pās ā kar kahne lage, “āp ham se ziyādatī kar rahe haiṅ. pūrī jamā'at maḳhsūs-o-muqaddas hai, aur rab us ke darmiyān hai. to phir āp apne āp ko kyūṅ rab kī jamā'at se baṛh kar samajhte haiṅ?”

⁴yih sun kar mūsā muṅh ke bal girā.

⁵phir us ne qorah aur us ke tamām sāthiyoṅ se kahā, “kal subh rab zāhir karegā ki kaun us kā bandā aur kaun maḳhsūs-o-muqaddas hai. usī ko wuh apne pās āne degā.

⁶ai qorah, kal apne tamām sāthiyoṅ ke sāth baḳhūrdān le kar

⁷rab ke sāmne un meṅ angāre aur baḳhūr ḍālo. jis ādmī ko rab chunegā wuh maḳhsūs-o-muqaddas hogā. ab tum lāwī ḳhud ziyādatī kar rahe ho.”

⁸mūsā ne qorah se bāt jārī rakhī, “ai lāwī kī aulād, suno!

⁹kyā tumhārī nazar meṅ yih koī chhoṭī bāt hai ki rab tumheṅ isrāīlī jamā'at ke bāqī logoṅ se alag karke apne qarīb le āyā tāki tum rab ke maqdis meṅ aur jamā'at ke sāmne khaṛe ho kar un kī ḳhidmat karo?

¹⁰wuh tujhe aur tere sāthī lāwiyoṅ ko apne qarīb lāyā hai. lekin ab tum imām kā uhdā bhī apnānā chāhte ho.

¹¹apne sāthiyoṅ se mil kar tū ne hārūn kī nahīṅ balki rab kī muḳhālafat kī hai. kyūṅki hārūn kaun hai ki tum us ke ḳhilāf buṛbuṛāo?”

¹²phir mūsā ne iliyāb ke beṭoṅ dātan aur abīrām ko bulāyā. lekin unhoṅ ne kahā, “ham nahīṅ āeṅge.

¹³āp hameṅ ek aise mulk se nikāl lāe haiṅ jahāṅ dūdh aur shahd kī kasrat hai tāki ham registān meṅ halāk ho jāeṅ. kyā yih kāfī nahīṅ hai? kyā ab āp ham par hukūmat bhī karnā chāhte haiṅ?

¹⁴na āp ne hameṅ aise mulk meṅ pahuṅchāyā jis meṅ dūdh aur shahd kī kasrat hai, na hameṅ khetoṅ aur angūr ke bāġhoṅ ke wāris banāyā hai. kyā āp in ādmiyoṅ kī āṅkheṅ nikāl ḍāleṅge? nahīṅ, ham hargiz nahīṅ āeṅge.”

¹⁵tab mūsā nihāyat ġhusse huā. us ne rab se kahā, “un kī qurbānī ko qabūl na kar. maiṅ ne ek gadhā tak un se nahīṅ liyā, na maiṅ ne un meṅ se kisī se burā sulūk kiyā hai.”

¹⁶qorah se us ne kahā, “kal tum aur tumhāre sāthī rab ke sāmne hāzir ho jāo. hārūn bhī āegā.

¹⁷har ek apnā baḳhūrdān le kar use rab ko pesh kare.”

¹⁸chunāṅche har ādmī ne apnā baḳhūrdān le kar us meṅ angāre aur baḳhūr ḍāl diyā. phir sab mūsā aur hārūn ke sāth mulāqāt ke ḳhaime ke darwāze par khaṛe hue.

¹⁹qorah ne pūrī jamā'at ko darwāze par mūsā aur hārūn ke muqābale meṅ jamā kiyā thā. achānak pūrī jamā'at par rab kā jalāl zāhir huā.

²⁰rab ne mūsā aur hārūn se kahā,

²¹“is jamā'at se alag ho jāo tāki maiṅ ise fauran halāk kar dūṅ.”

²²mūsā aur hārūn muṅh ke bal gire aur bol uṭhe, “ai allāh, tū tamām jānoṅ kā ḳhudā hai. kyā terā ġhazab ek hī ādmī ke gunāh ke sabab se pūrī jamā'at par ān paṛegā?”

²³tab rab ne mūsā se kahā,

²⁴“jamā'at ko batā de ki qorah, dātan aur abīrām ke ḍeroṅ se dūr ho jāo.”

²⁵mūsā uṭh kar dātan aur abīrām ke pās gayā, aur isrāīl ke buzurg us ke pīchhe chale.

²⁶us ne jamā'at ko āgāh kiyā, “in sharīroṅ ke ḳhaimoṅ se dūr ho jāo! jo kuchh bhī un ke pās hai use na chhuo, warnā tum bhī un ke sāth tabāh ho jāoge jab wuh apne gunāhoṅ ke bāis halāk hoṅge.”

²⁷tab bāqī log qorah, dātan aur abīrām ke ḍeroṅ se dūr ho gae. dātan aur abīrām apne bāl-bachchoṅ samet apne ḳhaimoṅ se nikal kar bāhar khaṛe the.

²⁸mūsā ne kahā, “ab tumheṅ patā chalegā ki rab ne mujhe yih sab kuchh karne ke lie bhejā hai. maiṅ apnī nahīṅ balki us kī marzī pūrī kar rahā hūṅ.

²⁹agar yih log dūsroṅ kī tarah tabaī maut mareṅ to phir rab ne mujhe nahīṅ bhejā.

³⁰lekin agar rab aisā kām kare jo pahle kabhī nahīṅ huā aur zamīn apnā muṅh khol kar unheṅ aur un kā pūrā māl haṛap kar le aur unheṅ jīte jī dafnā de to is kā matlab hogā ki in ādmiyoṅ ne rab ko haqīr jānā hai.”

³¹yih bāt kahte hī un ke nīche kī zamīn phaṭ gaī.

³²us ne apnā muṅh khol kar unheṅ, un ke ḳhāndānoṅ ko, qorah ke tamām logoṅ ko aur un kā sārā sāmān haṛap kar liyā.

³³wuh apnī pūrī milkiyat samet jīte jī dafn ho gae. zamīn un ke ūpar wāpas ā gaī. yūṅ unheṅ jamā'at se nikālā gayā aur wuh halāk ho gae.

³⁴un kī chīḳheṅ sun kar un ke irdgird khaṛe tamām isrāīlī bhāg uṭhe, kyūṅki unhoṅ ne sochā, “aisā na ho ki zamīn hameṅ bhī nigal le.”

³⁵usī lamhe rab kī taraf se āg utar āī aur un 250 ādmiyoṅ ko bhasm kar diyā jo baḳhūr pesh kar rahe the.

³⁶rab ne mūsā se kahā,

³⁷“hārūn imām ke beṭe ilīazar ko ittilā de ki wuh baḳhūrdānoṅ ko rākh meṅ se nikāl kar rakhe. un ke angāre wuh dūr phaiṅke. baḳhūrdānoṅ ko rakhne kā sabab yih hai ki ab wuh maḳhsūs-o-muqaddas haiṅ.

³⁸log un ādmiyoṅ ke yih baḳhūrdān le leṅ jo apne gunāh ke bāis jāṅ-ba-haq ho gae. wuh unheṅ kūṭ kar un se chādareṅ banāeṅ aur unheṅ jalne wālī qurbāniyoṅ kī qurbāngāh par chaṛhāeṅ. kyūṅki wuh rab ko pesh kie gae haiṅ, is lie wuh maḳhsūs-o-muqaddas haiṅ. yūṅ wuh isrāīliyoṅ ke lie ek nishān raheṅge.”

³⁹chunāṅche ilīazar imām ne pītal ke yih baḳhūrdān jamā kie jo bhasm kie hue ādmiyoṅ ne rab ko pesh kie the. phir logoṅ ne unheṅ kūṭ kar un se chādareṅ banāīṅ aur unheṅ qurbāngāh par chaṛhā diyā.

⁴⁰hārūn ne sab kuchh waisā hī kiyā jaisā rab ne mūsā kī mārifat batāyā thā. maqsad yih thā ki baḳhūrdān isrāīliyoṅ ko yād dilāte raheṅ ki sirf hārūn kī aulād hī ko rab ke sāmne ā kar baḳhūr jalāne kī ijāzat hai. agar koī aur aisā kare to us kā hāl qorah aur us ke sāthiyoṅ kā sā hogā.

⁴¹agle din isrāīl kī pūrī jamā'at mūsā aur hārūn ke ḳhilāf buṛbuṛāne lagī. unhoṅ ne kahā, “āp ne rab kī qaum ko mār ḍālā hai.”

⁴²lekin jab wuh mūsā aur hārūn ke muqābale meṅ jamā hue aur mulāqāt ke ḳhaime kā ruḳh kiyā to achānak us par bādal chhā gayā aur rab kā jalāl zāhir huā.

⁴³phir mūsā aur hārūn mulāqāt ke ḳhaime ke sāmne āe,

⁴⁴aur rab ne mūsā se kahā,

⁴⁵“is jamā'at se nikal jāo tāki maiṅ ise fauran halāk kar dūṅ.” yih sun kar donoṅ muṅh ke bal gire.

⁴⁶mūsā ne hārūn se kahā, “apnā baḳhūrdān le kar us meṅ qurbāngāh ke angāre aur baḳhūr ḍāleṅ. phir bhāg kar jamā'at ke pās chale jāeṅ tāki un kā kaffārā deṅ. jaldī kareṅ, kyūṅki rab kā ġhazab un par ṭūṭ paṛā hai. wabā phailne lagī hai.”

⁴⁷hārūn ne aisā hī kiyā. wuh dauṛ kar jamā'at ke bīch meṅ gayā. logoṅ meṅ wabā shurū ho chukī thī, lekin hārūn ne rab ko baḳhūr pesh karke un kā kaffārā diyā.

⁴⁸wuh zindoṅ aur murdoṅ ke bīch meṅ khaṛā huā to wabā ruk gaī.

⁴⁹to bhī 14,700 afrād wabā se mar gae. is meṅ wuh shāmil nahīṅ haiṅ jo qorah ke sabab se mar gae the.

⁵⁰jab wabā ruk gaī to hārūn mūsā ke pās wāpas āyā jo ab tak mulāqāt ke ḳhaime ke darwāze par khaṛā thā.