Read Roman Urdu Geo gintī 17 Bible Online

gintī 17 - Roman Urdu Geo bible

gintī 17

¹rab ne mūsā se kahā,

²“isrāīliyoṅ se bāt karke un se 12 lāṭhiyāṅ mangwā le, har qabīle ke sardār se ek lāṭhī. har lāṭhī par us ke mālik kā nām likhnā.

³lāwī kī lāṭhī par hārūn kā nām likhnā, kyūṅki har qabīle ke sardār ke lie ek lāṭhī hogī.

⁴phir un ko mulāqāt ke ḳhaime meṅ ahd ke sandūq ke sāmne rakh jahāṅ merī tum se mulāqāt hotī hai.

⁵jis ādmī ko maiṅ ne chun liyā hai us kī lāṭhī se koṅpleṅ phūṭ nikleṅgī. is tarah maiṅ tumhāre ḳhilāf isrāīliyoṅ kī buṛbuṛāhaṭ ḳhatm kar dūṅgā.”

⁶chunāṅche mūsā ne isrāīliyoṅ se bāt kī, aur qabīloṅ ke har sardār ne use apnī lāṭhī dī. in 12 lāṭhiyoṅ meṅ hārūn kī lāṭhī bhī shāmil thī.

⁷mūsā ne unheṅ mulāqāt ke ḳhaime meṅ ahd ke sandūq ke sāmne rakhā.

⁸agle din jab wuh mulāqāt ke ḳhaime meṅ dāḳhil huā to us ne dekhā ki lāwī ke qabīle ke sardār hārūn kī lāṭhī se na sirf koṅpleṅ phūṭ niklī haiṅ balki phūl aur pake hue bādām bhī lage haiṅ.

⁹mūsā tamām lāṭhiyāṅ rab ke sāmne se bāhar lā kar isrāīliyoṅ ke pās le āyā, aur unhoṅ ne un kā muāinā kiyā. phir har ek ne apnī apnī lāṭhī wāpas le lī.

¹⁰rab ne mūsā se kahā, “hārūn kī lāṭhī ahd ke sandūq ke sāmne rakh de. yih bāġhī isrāīliyoṅ ko yād dilāegī ki wuh apnā buṛbuṛānā band kareṅ, warnā halāk ho jāeṅge.”

¹¹mūsā ne aisā hī kiyā.

¹²lekin isrāīliyoṅ ne mūsā se kahā, “hāy, ham mar jāeṅge. hāy, ham halāk ho jāeṅge, ham sab halāk ho jāeṅge.

¹³jo bhī rab ke maqdis ke qarīb āe wuh mar jāegā. kyā ham sab hī halāk ho jāeṅge?”