Read Roman Urdu Geo gintī 2 Bible Online

gintī 2 - Roman Urdu Geo bible

gintī 2

¹rab ne mūsā aur hārūn se kahā

²ki isrāīlī apne ḳhaime kuchh fāsile par mulāqāt ke ḳhaime ke irdgird lagāeṅ. har ek apne apne alam aur apne apne ābāī gharāne ke nishān ke sāth ḳhaimāzan ho.

³in hidāyāt ke mutābiq maqdis ke mashriq meṅ yahūdāh kā alam thā jis ke irdgird tīn daste ḳhaimāzan the. pahle, yahūdāh kā qabīlā jis kā kamānḍar nahson bin ammīnadāb thā,

⁴aur jis ke lashkar ke 74,600 faujī the.

⁵dūsre, ishkār kā qabīlā jis kā kamānḍar natanī'el bin zuġhar thā,

⁶aur jis ke lashkar ke 54,400 faujī the.

⁷tīsre, zabūlūn kā qabīlā jis kā kamānḍar iliyāb bin helon thā

⁸aur jis ke lashkar ke 57,400 faujī the.

⁹tīnoṅ qabīloṅ ke faujiyoṅ kī kul tādād 1,86,400 thī. rawānā hote waqt yih āge chalte the.

¹⁰maqdis ke junūb meṅ rūbin kā alam thā jis ke irdgird tīn daste ḳhaimāzan the. pahle, rūbin kā qabīlā jis kā kamānḍar ilīsūr bin shadiyūr thā,

¹¹aur jis ke 46,500 faujī the.

¹²dūsre, shamāūn kā qabīlā jis kā kamānḍar salūmī'el bin sūrīshaddī thā,

¹³aur jis ke 59,300 faujī the.

¹⁴tīsre, jad kā qabīlā jis kā kamānḍar iliyāsaf bin daūel thā,

¹⁵aur jis ke 45,650 faujī the.

¹⁶tīnoṅ qabīloṅ ke faujiyoṅ kī kul tādād 1,51,450 thī. rawānā hote waqt yih mashriqī qabīloṅ ke pīchhe chalte the.

¹⁷in junūbī qabīloṅ ke bād lāwī mulāqāt kā ḳhaimā uṭhā kar qabīloṅ ke ain bīch meṅ chalte the. qabīle us tartīb se rawānā hote the jis tartīb se wuh apne ḳhaime lagāte the. har qabīlā apne alam ke pīchhe chaltā thā.

¹⁸maqdis ke maġhrib meṅ ifrāīm kā alam thā jis ke irdgird tīn daste ḳhaimāzan the. pahle, ifrāīm kā qabīlā jis kā kamānḍar ilīsamā bin ammīhūd thā,

¹⁹aur jis ke 40,500 faujī the.

²⁰dūsre, manassī kā qabīlā jis kā kamānḍar jamlī'el bin fadāhsūr thā,

²¹aur jis ke 32,200 faujī the.

²²tīsre, binyamīn kā qabīlā jis kā kamānḍar abidān bin jidāūnī thā,

²³aur jis ke 35,400 faujī the.

²⁴tīnoṅ qabīloṅ ke faujiyoṅ kī kul tādād 1,08,100 thī. rawānā hote waqt yih junūbī qabīloṅ ke pīchhe chalte the.

²⁵maqdis ke shimāl meṅ dān kā alam thā jis ke irdgird tīn daste ḳhaimāzan the. pahle, dān kā qabīlā jis kā kamānḍar aḳhīazar bin ammīshaddī thā,

²⁶aur jis ke 62,700 faujī the.

²⁷dūsre, āshar kā qabīlā jis kā kamānḍar faj'ī'el bin akrān thā,

²⁸aur jis ke 41,500 faujī the.

²⁹tīsre, naftālī kā qabīlā jis kā kamānḍar aḳhīrā bin enān thā,

³⁰aur jis ke 53,400 faujī the.

³¹tīnoṅ qabīloṅ kī kul tādād 1,57,600 thī. wuh āḳhir meṅ apnā alam uṭhā kar rawānā hote the.

³²pūrī ḳhaimāgāh ke faujiyoṅ kī kul tādād 6,03,550 thī.

³³sirf lāwī is tādād meṅ shāmil nahīṅ the, kyūṅki rab ne mūsā ko hukm diyā thā ki un kī bhartī na kī jāe.

³⁴yūṅ isrāīliyoṅ ne sab kuchh un hidāyāt ke mutābiq kiyā jo rab ne mūsā ko dī thīṅ. un ke mutābiq hī wuh apne jhanḍoṅ ke irdgird apne ḳhaime lagāte the aur un ke mutābiq hī apne kunboṅ aur ābāī gharānoṅ ke sāth rawānā hote the.