Read Roman Urdu Geo gintī 20 Bible Online

gintī 20 - Roman Urdu Geo bible

gintī 20

¹pahle mahīne meṅ isrāīl kī pūrī jamā'at dasht-e-sīn meṅ pahuṅch kar qādis meṅ rahne lagī. wahāṅ mariyam ne wafāt pāī aur wahīṅ use dafnāyā gayā.

²qādis meṅ pānī dastyāb nahīṅ thā, is lie log mūsā aur hārūn ke muqābale meṅ jamā hue.

³wuh mūsā se yih kah kar jhagaṛne lage, “kāsh ham apne bhāiyoṅ ke sāth rab ke sāmne mar gae hote!

⁴āp rab kī jamā'at ko kyūṅ is registān meṅ le āe? kyā is lie ki ham yahāṅ apne maweshiyoṅ samet mar jāeṅ?

⁵āp hameṅ misr se nikāl kar us nāḳhushgawār jagah par kyūṅ le āe haiṅ? yahāṅ na to anāj, na anjīr, angūr yā anār dastyāb haiṅ. pānī bhī nahīṅ hai!”

⁶mūsā aur hārūn logoṅ ko chhoṛ kar mulāqāt ke ḳhaime ke darwāze par gae aur muṅh ke bal gire. tab rab kā jalāl un par zāhir huā.

⁷rab ne mūsā se kahā,

⁸“ahd ke sandūq ke sāmne paṛī lāṭhī pakaṛ kar hārūn ke sāth jamā'at ko ikaṭṭhā kar. un ke sāmne chaṭān se bāt karo to wuh apnā pānī degī. yūṅ tū chaṭān meṅ se jamā'at ke lie pānī nikāl kar unheṅ un ke maweshiyoṅ samet pānī pilāegā.”

⁹mūsā ne aisā hī kiyā. us ne ahd ke sandūq ke sāmne paṛī lāṭhī uṭhāī

¹⁰aur hārūn ke sāth jamā'at ko chaṭān ke sāmne ikaṭṭhā kiyā. mūsā ne un se kahā, “ai baġhāwat karne wālo, suno! kyā ham is chaṭān meṅ se tumhāre lie pānī nikāleṅ?”

¹¹us ne lāṭhī ko uṭhā kar chaṭān ko do martabā mārā to bahut sā pānī phūṭ niklā. jamā'at aur un ke maweshiyoṅ ne ḳhūb pānī piyā.

¹²lekin rab ne mūsā aur hārūn se kahā, “tumhārā mujh par itnā īmān nahīṅ thā ki merī quddūsiyat ko isrāīliyoṅ ke sāmne qāim rakhte. is lie tum us jamā'at ko us mulk meṅ nahīṅ le jāoge jo maiṅ unheṅ dūṅgā.”

¹³yih wāqiā marībā yānī ‘jhagaṛnā’ ke pānī par huā. wahāṅ isrāīliyoṅ ne rab se jhagaṛā kiyā, aur wahāṅ us ne un par zāhir kiyā ki wuh quddūs hai.

¹⁴qādis se mūsā ne adom ke bādshāh ko ittilā bhejī, “āp ke bhāī isrāīl kī taraf se ek guzārish hai. āp ko un tamām musībatoṅ ke bāre meṅ ilm hai jo ham par ān paṛī haiṅ.

¹⁵hamāre bāpdādā misr gae the aur wahāṅ ham bahut arse tak rahe. misriyoṅ ne hamāre bāpdādā aur ham se burā sulūk kiyā.

¹⁶lekin jab ham ne chillā kar rab se minnat kī to us ne hamārī sunī aur farishtā bhej kar hameṅ misr se nikāl lāyā. ab ham yahāṅ qādis shahr meṅ haiṅ jo āp kī sarhad par hai.

¹⁷mehrbānī karke hameṅ apne mulk meṅ se guzarne deṅ. ham kisī khet yā angūr ke bāġh meṅ nahīṅ jāeṅge, na kisī kueṅ kā pānī pieṅge. ham shāhrāh par hī raheṅge. āp ke mulk meṅ se guzarte hue ham us se na dāīṅ aur na bāīṅ taraf haṭeṅge.”

¹⁸lekin adomiyoṅ ne jawāb diyā, “yahāṅ se na guzarnā, warnā ham nikal kar āp se laṛeṅge.”

¹⁹isrāīl ne dubārā ḳhabar bhejī, “ham shāhrāh par rahte hue guzareṅge. agar hameṅ yā hamāre jānwaroṅ ko pānī kī zarūrat huī to paise de kar ḳharīd leṅge. ham paidal hī guzarnā chāhte haiṅ, aur kuchh nahīṅ chāhte.”

²⁰lekin adomiyoṅ ne dubārā inkār kiyā. sāth hī unhoṅ ne un ke sāth laṛne ke lie ek baṛī aur tāqatwar fauj bhejī.

²¹chūṅki adom ne unheṅ guzarne kī ijāzat na dī is lie isrāīlī muṛ kar dūsre rāste se chale gae.

²²isrāīl kī pūrī jamā'at qādis se rawānā ho kar hor pahāṛ ke pās pahuṅchī.

²³yih pahāṛ adom kī sarhad par wāqe thā. wahāṅ rab ne mūsā aur hārūn se kahā,

²⁴“hārūn ab kūch karke apne bāpdādā se jā milegā. wuh us mulk meṅ dāḳhil nahīṅ hogā jo maiṅ isrāīliyoṅ ko dūṅgā, kyūṅki tum donoṅ ne marībā ke pānī par mere hukm kī ḳhilāfwarzī kī.

²⁵hārūn aur us ke beṭe ilīazar ko le kar hor pahāṛ par chaṛh jā.

²⁶hārūn ke kapṛe utār kar us ke beṭe ilīazar ko pahnā denā. phir hārūn kūch karke apne bāpdādā se jā milegā.”

²⁷mūsā ne aisā hī kiyā jaisā rab ne kahā. tīnoṅ pūrī jamā'at ke deḳhte deḳhte hor pahāṛ par chaṛh gae.

²⁸mūsā ne hārūn ke kapṛe utarwā kar us ke beṭe ilīazar ko pahnā die. phir hārūn wahāṅ pahāṛ kī choṭī par faut huā, aur mūsā aur ilīazar nīche utar gae.

²⁹jab pūrī jamā'at ko mālūm huā ki hārūn intiqāl kar gayā hai to sab ne 30 din tak us ke lie mātam kiyā.