Read Roman Urdu Geo gintī 23 Bible Online

gintī 23 - Roman Urdu Geo bible

gintī 23

¹bal'ām ne kahā, “yahāṅ mere lie sāt qurbāngāheṅ banāeṅ. sāth sāth mere lie sāt bail aur sāt menḍhe tayyār kar rakheṅ.”

²balaq ne aisā hī kiyā, aur donoṅ ne mil kar har qurbāngāh par ek bail aur ek menḍhā chaṛhāyā.

³phir bal'ām ne balaq se kahā, “yahāṅ apnī qurbānī ke pās khaṛe raheṅ. maiṅ kuchh fāsile par jātā hūṅ, shāyad rab mujh se milne āe. jo kuchh wuh mujh par zāhir kare maiṅ āp ko batā dūṅgā.” yih kah kar wuh ek ūṅche maqām par chalā gayā jo hariyālī se bilkul mahrūm thā.

⁴wahāṅ allāh bal'ām se milā. bal'ām ne kahā, “maiṅ ne sāt qurbāngāheṅ tayyār karke har qurbāngāh par ek bail aur ek menḍhā qurbān kiyā hai.”

⁵tab rab ne use balaq ke lie paiġhām diyā aur kahā, “balaq ke pās wāpas jā aur use yih paiġhām sunā.”

⁶bal'ām balaq ke pās wāpas āyā jo ab tak moābī sardāroṅ ke sāth apnī qurbānī ke pās khaṛā thā.

⁷bal'ām bol uṭhā, “balaq mujhe arām se yahāṅ lāyā hai, moābī bādshāh ne mujhe mashriqī pahāṛoṅ se bulā kar kahā, ‘āo, yāqūb par mere lie lānat bhejo. āo, isrāīl ko badduā do.’

⁸maiṅ kis tarah un par lānat bhejūṅ jin par allāh ne lānat nahīṅ bhejī? maiṅ kis tarah unheṅ badduā dūṅ jinheṅ rab ne badduā nahīṅ dī?

⁹maiṅ unheṅ chaṭānoṅ kī choṭī se deḳhtā hūṅ, pahāṛiyoṅ se un kā mushāhadā kartā hūṅ. wāqaī yih ek aisī qaum hai jo dūsroṅ se alag rahtī hai. yih apne āp ko dūsrī qaumoṅ se mumtāz samajhtī hai.

¹⁰kaun yāqūb kī aulād ko gin saktā hai jo gard kī mānind beshumār hai. kaun isrāīliyoṅ kā chauthā hissā bhī gin saktā hai? rab kare ki maiṅ rāstbāzoṅ kī maut marūṅ, ki merā anjām un ke anjām jaisā achchhā ho.”

¹¹balaq ne bal'ām se kahā, “āp ne mere sāth kyā kiyā hai? maiṅ āp ko apne dushmanoṅ par lānat bhejne ke lie lāyā aur āp ne unheṅ achchhī-ḳhāsī barkat dī hai.”

¹²bal'ām ne jawāb diyā, “kyā lāzim nahīṅ ki maiṅ wuhī kuchh bolūṅ jo rab ne batāne ko kahā hai?”

¹³phir balaq ne us se kahā, “āeṅ, ham ek aur jagah jāeṅ jahāṅ se āp isrāīlī qaum ko dekh sakeṅge, go un kī ḳhaimāgāh kā sirf kinārā hī nazar āegā. āp sab ko nahīṅ dekh sakeṅge. wahīṅ se un par mere lie lānat bhejeṅ.”

¹⁴yih kah kar wuh us ke sāth pisgā kī choṭī par chaṛh kar pahredāroṅ ke maidān tak pahuṅch gayā. wahāṅ bhī us ne sāt qurbāngāheṅ banā kar har ek par ek bail aur ek menḍhā qurbān kiyā.

¹⁵bal'ām ne balaq se kahā, “yahāṅ apnī qurbāngāh ke pās khaṛe raheṅ. maiṅ kuchh fāsile par jā kar rab se milūṅgā.”

¹⁶rab bal'ām se milā. us ne use balaq ke lie paiġhām diyā aur kahā, “balaq ke pās wāpas jā aur use yih paiġhām sunā de.”

¹⁷wuh wāpas chalā gayā. balaq ab tak apne sardāroṅ ke sāth apnī qurbānī ke pās khaṛā thā. us ne us se pūchhā, “rab ne kyā kahā?”

¹⁸bal'ām ne kahā, “ai balaq, uṭho aur suno. ai safor ke beṭe, merī bāt par ġhaur karo.

¹⁹allāh ādmī nahīṅ jo jhūṭ boltā hai. wuh insān nahīṅ jo koī faislā karke bād meṅ pachhtāe. kyā wuh kabhī apnī bāt par amal nahīṅ kartā? kyā wuh kabhī apnī bāt pūrī nahīṅ kartā?

²⁰mujhe barkat dene ko kahā gayā hai. us ne barkat dī hai aur maiṅ yih barkat rok nahīṅ saktā.

²¹yāqūb ke gharāne meṅ ḳharābī nazar nahīṅ ātī, isrāīl meṅ dukh dikhāī nahīṅ detā. rab us kā ḳhudā us ke sāth hai, aur qaum bādshāh kī ḳhushī meṅ nāre lagātī hai.

²²allāh unheṅ misr se nikāl lāyā, aur unheṅ janglī bail kī tāqat hāsil hai.

²³yāqūb ke gharāne ke ḳhilāf jādūgarī nākām hai, isrāīl ke ḳhilāf ġhaibdānī befāidā hai. ab yāqūb ke gharāne se kahā jāegā, ‘allāh ne kaisā kām kiyā hai!’

²⁴isrāīlī qaum shernī kī tarah uṭhtī aur sherbabar kī tarah khaṛī ho jātī hai. jab tak wuh apnā shikār na khā le wuh ārām nahīṅ kartā, jab tak wuh māre hue logoṅ kā ḳhūn na pī le wuh nahīṅ leṭtā.”

²⁵yih sun kar balaq ne kahā, “agar āp un par lānat bhejne se inkār kareṅ, kam az kam unheṅ barkat to na deṅ.”

²⁶bal'ām ne jawāb diyā, “kyā maiṅ ne āp ko nahīṅ batāyā thā ki jo kuchh bhī rab kahegā maiṅ wuhī karūṅga?”

²⁷tab balaq ne bal'ām se kahā, “āeṅ, maiṅ āp ko ek aur jagah le jāūṅ. shāyad allāh rāzī ho jāe ki āp mere lie wahāṅ se un par lānat bhejeṅ.”

²⁸wuh us ke sāth faġhūr pahāṛ par chaṛh gayā. us kī choṭī se yardan kī wādī kā junūbī hissā yashīmon dikhāī diyā.

²⁹bal'ām ne us se kahā, “mere lie yahāṅ sāt qurbāngāheṅ banā kar sāt bail aur sāt menḍhe tayyār kar rakheṅ.”

³⁰balaq ne aisā hī kiyā. us ne har ek qurbāngāh par ek bail aur ek menḍhā qurbān kiyā.