Read Roman Urdu Geo gintī 24 Bible Online

gintī 24 - Roman Urdu Geo bible

gintī 24

¹ab bal'ām ko us bāt kā pūrā yaqīn ho gayā ki rab ko pasand hai ki maiṅ isrāīliyoṅ ko barkat dūṅ. is lie us ne is martabā pahle kī tarah jādūgarī kā tarīqā istemāl na kiyā balki sīdhā registān kī taraf ruḳh kiyā

²jahāṅ isrāīl apne apne qabīloṅ kī tartīb se ḳhaimāzan thā. yih dekh kar allāh kā rūh us par nāzil huā,

³aur wuh bol uṭhā, “bal'ām bin baor kā paiġhām suno, us ke paiġhām par ġhaur karo jo sāf sāf deḳhtā hai,

⁴us kā paiġhām jo allāh kī bāteṅ sun letā hai, qādir-e-mutlaq kī royā ko dekh letā hai aur zamīn par gir kar poshīdā bāteṅ deḳhtā hai.

⁵ai yāqūb, tere ḳhaime kitne shāndār haiṅ! ai isrāīl, tere ghar kitne achchhe haiṅ!

⁶wuh dūr tak phailī huī wādiyoṅ kī mānind, nahar ke kināre lage bāġhoṅ kī mānind, rab ke lagāe hue ūd ke daraḳhtoṅ kī mānind, pānī ke kināre lage deodār ke daraḳhtoṅ kī mānind haiṅ.

⁷un kī bālṭiyoṅ se pānī chhalaktā rahegā, un ke bīj ko kasrat kā pānī milegā. un kā bādshāh ajāj se zyādā tāqatwar hogā, aur un kī saltanat sarfarāz hogī.

⁸allāh unheṅ misr se nikāl lāyā, aur unheṅ janglī bail kī sī tāqat hāsil hai. wuh muḳhālif qaumoṅ ko haṛap karke un kī haḍḍiyāṅ chūr chūr kar dete haiṅ, wuh apne tīr chalā kar unheṅ mār ḍālte haiṅ.

⁹isrāīl sherbabar yā shernī kī mānind hai. jab wuh dabak kar baiṭh jāe to koī bhī use chheṛne kī jur'at nahīṅ kartā. jo tujhe barkat de use barkat mile, aur jo tujh par lānat bheje us par lānat āe.”

¹⁰yih sun kar balaq āpe se bāhar huā. us ne tālī bajā kar apnī hiqārat kā izhār kiyā aur kahā, “maiṅ ne tujhe is lie bulāyā thā ki tū mere dushmanoṅ par lānat bheje. ab tū ne unheṅ tīnoṅ bār barkat hī dī hai.

¹¹ab dafā ho jā! apne ghar wāpas bhāg jā! maiṅ ne kahā thā ki baṛā in'ām dūṅgā. lekin rab ne tujhe in'ām pāne se rok diyā hai.”

¹²bal'ām ne jawāb diyā, “kyā maiṅ ne un logoṅ ko jinheṅ āp ne mujhe bulāne ke lie bhejā thā nahīṅ batāyā thā

¹³ki agar balaq apne mahal ko chāṅdī aur sone se bhar kar bhī mujhe de de to bhī maiṅ rab kī kisī bāt kī ḳhilāfwarzī nahīṅ kar saktā, ḳhwāh merī nīyat achchhī ho yā burī. maiṅ sirf wuh kuchh kar saktā hūṅ jo allāh farmātā hai.

¹⁴ab maiṅ apne watan wāpas chalā jātā hūṅ. lekin pahle maiṅ āp ko batā detā hūṅ ki āḳhirkār yih qaum āp kī qaum ke sāth kyā kuchh karegī.”

¹⁵wuh bol uṭhā, “bal'ām bin baor kā paiġhām suno, us kā paiġhām jo sāf sāf deḳhtā hai,

¹⁶us kā paiġhām jo allāh kī bāteṅ sun letā aur allāh t'ālā kī marzī ko jāntā hai, jo qādir-e-mutlaq kī royā ko dekh letā aur zamīn par gir kar poshīdā bāteṅ deḳhtā hai.

¹⁷jise maiṅ dekh rahā hūṅ wuh is waqt nahīṅ hai. jo mujhe nazar ā rahā hai wuh qarīb nahīṅ hai. yāqūb ke gharāne se sitārā niklegā, aur isrāīl se asā-e-shāhī uṭhegā jo moāb ke māthoṅ aur set ke tamām beṭoṅ kī khopaṛiyoṅ ko pāsh pāsh karegā.

¹⁸adom us ke qabze meṅ āegā, us kā dushman saīr us kī milkiyat banegā jabki isrāīl kī tāqat baṛhtī jāegī.

¹⁹yāqūb ke gharāne se ek hukmrān niklegā jo shahr ke bache huoṅ ko halāk kar degā.”

²⁰phir bal'ām ne amālīq ko dekhā aur kahā, “amālīq qaumoṅ meṅ awwal thā, lekin āḳhirkār wuh ḳhatm ho jāegā.”

²¹phir us ne qīniyoṅ ko dekhā aur kahā, “terī sukūnatgāh mustahkam hai, terā chaṭān meṅ banā ghoṅslā mazbūt hai.

²²lekin tū tabāh ho jāegā jab asūr tujhe giriftār karegā.”

²³ek aur dafā us ne bāt kī, “hāy, kaun zindā rah saktā hai jab allāh yūṅ karegā?

²⁴kittīm ke sāhil se bahrī jahāz āeṅge jo asūr aur ibar ko zalīl kareṅge, lekin wuh ḳhud bhī halāk ho jāeṅge.”

²⁵phir bal'ām uṭh kar apne ghar wāpas chalā gayā. balaq bhī wahāṅ se chalā gayā.