Read Roman Urdu Geo gintī 25 Bible Online

gintī 25 - Roman Urdu Geo bible

gintī 25

¹jab isrāīlī shittīm meṅ rah rahe the to isrāīlī mard moābī auratoṅ se zinākārī karne lage.

²yih aisā huā ki moābī aurateṅ apne dewatāoṅ ko qurbāniyāṅ pesh karte waqt isrāīliyoṅ ko sharīk hone kī dāwat dene lagīṅ. isrāīlī dāwat qabūl karke qurbāniyoṅ se khāne aur dewatāoṅ ko sijdā karne lage.

³is tarīqe se isrāīlī moābī dewatā banām bāl-faġhūr kī pūjā karne lage, aur rab kā ġhazab un par ān paṛā.

⁴us ne mūsā se kahā, “is qaum ke tamām rāhnumāoṅ ko sazā-e-maut de kar sūraj kī raushnī meṅ rab ke sāmne laṭkā, warnā rab kā isrāīliyoṅ par se ġhazab nahīṅ ṭalegā.”

⁵chunāṅche mūsā ne isrāīl ke qāziyoṅ se kahā, “lāzim hai ki tum meṅ se har ek apne un ādmiyoṅ ko jān se mār de jo bāl-faġhūr dewatā kī pūjā meṅ sharīk hue haiṅ.”

⁶mūsā aur isrāīl kī pūrī jamā'at mulāqāt ke ḳhaime ke darwāze par jamā ho kar rone lage. ittifāq se usī waqt ek ādmī wahāṅ se guzarā jo ek midiyānī aurat ko apne ghar le jā rahā thā.

⁷yih dekh kar hārūn kā potā fīnhās bin ilīazar jamā'at se niklā aur nezā pakaṛ kar

⁸us isrāīlī ke pīchhe chal paṛā. wuh aurat samet apne ḳhaime meṅ dāḳhil huā to fīnhās ne un ke pīchhe pīchhe jā kar nezā itne zor se mārā ki wuh donoṅ meṅ se guzar gayā. us waqt wabā phailne lagī thī, lekin fīnhās ke is amal se wuh ruk gaī.

⁹to bhī 24,000 afrād mar chuke the.

¹⁰rab ne mūsā se kahā,

¹¹“hārūn ke pote fīnhās bin ilīazar ne isrāīliyoṅ par merā ġhussā ṭhanḍā kar diyā hai. merī ġhairat apnā kar wuh isrāīl meṅ dīgar mābūdoṅ kī pūjā ko bardāsht na kar sakā. is lie merī ġhairat ne isrāīliyoṅ ko nest-o-nābūd nahīṅ kiyā.

¹²lihāzā use batā denā ki maiṅ us ke sāth salāmatī kā ahd qāim kartā hūṅ.

¹³is ahd ke taht use aur us kī aulād ko abad tak imām kā uhdā hāsil rahegā, kyūṅki apne ḳhudā kī ḳhātir ġhairat khā kar us ne isrāīliyoṅ kā kaffārā diyā.”

¹⁴jis ādmī ko midiyānī aurat ke sāth mār diyā gayā us kā nām zimrī bin salū thā, aur wuh shamāūn ke qabīle ke ek ābāī gharāne kā sarparast thā.

¹⁵midiyānī aurat kā nām kazbī thā, aur wuh sūr kī beṭī thī jo midiyāniyoṅ ke ek ābāī gharāne kā sarparast thā.

¹⁶rab ne mūsā se kahā,

¹⁷“midiyāniyoṅ ko dushman qarār de kar unheṅ mār ḍālnā.

¹⁸kyūṅki unhoṅ ne apnī chālākiyoṅ se tumhāre sāth dushman kā sā sulūk kiyā, unhoṅ ne tumheṅ bāl-faġhūr kī pūjā karne par uksāyā aur tumheṅ apnī bahan midiyānī sardār kī beṭī kazbī ke zarī'e jise wabā phailte waqt mār diyā gayā bahkāyā.”