Read Roman Urdu Geo gintī 26 Bible Online

gintī 26 - Roman Urdu Geo bible

gintī 26

¹wabā ke bād rab ne mūsā aur hārūn ke beṭe ilīazar se kahā,

²“pūrī isrāīlī jamā'at kī mardumshumārī un ke ābāī gharānoṅ ke mutābiq karnā. un tamām mardoṅ ko ginanā jo 20 sāl yā is se zāid ke haiṅ aur jo jang laṛne ke qābil haiṅ.”

³mūsā aur ilīazar ne isrāīliyoṅ ko batāyā ki rab ne unheṅ kyā hukm diyā hai. chunāṅche unhoṅ ne moāb ke maidānī ilāqe meṅ yarīhū ke sāmne, lekin daryā-e-yardan ke mashriqī kināre par mardumshumārī kī. yih wuh isrāīlī ādmī the jo misr se nikle the.

⁵isrāīl ke pahlauṭhe rūbin ke qabīle ke 43,730 mard the. qabīle ke chār kunbe hanūkī, falluwī, hasronī aur karmī rūbin ke beṭoṅ hanūk, fallū, hasron aur karmī se nikle hue the.

⁸rūbin kā beṭā fallū iliyāb kā bāp thā

⁹jis ke beṭe namūel, dātan aur abīrām the. dātan aur abīrām wuhī log the jinheṅ jamā'at ne chunā thā aur jinhoṅ ne qorah ke guroh samet mūsā aur hārūn se jhagaṛte hue ḳhud rab se jhagaṛā kiyā.

¹⁰us waqt zamīn ne apnā muṅh khol kar unheṅ qorah samet haṛap kar liyā thā. us ke 250 sāthī bhī mar gae the jab āg ne unheṅ bhasm kar diyā. yūṅ wuh sab isrāīl ke lie ibratangez misāl ban gae the.

¹¹lekin qorah kī pūrī nasl miṭāī nahīṅ gaī thī.

¹²shamāūn ke qabīle ke 22,200 mard the. qabīle ke pāṅch kunbe namūelī, yamīnī, yaqīnī, zārhī aur sāūlī shamāūn ke beṭoṅ namūel, yamīn, yakīn, zārah aur sāūl se nikle hue the.

¹⁵jad ke qabīle ke 40,500 mard the. qabīle ke sāt kunbe safonī, hajjī, sūnī, uznī, erī, arūdī aur arelī jad ke beṭoṅ safon, hajjī, sūnī, uznī, erī, arūd aur arelī se nikle hue the.

¹⁹yahūdāh ke qabīle ke 76,500 mard the. yahūdāh ke do beṭe er aur onān misr āne se pahle kan'ān meṅ mar gae the. qabīle ke tīn kunbe selānī, fārsī aur zārhī yahūdāh ke beṭoṅ selā, fāras aur zārah se nikle hue the. fāras ke do beṭoṅ hasron aur hamūl se do kunbe hasronī aur hamūlī nikle hue the.

²³ishkār ke qabīle ke 64,300 mard the. qabīle ke chār kunbe tolaī, fuwwī, yasūbī aur simronī ishkār ke beṭoṅ tolā, fuwwā, yasūb aur simron se nikle hue the.

²⁶zabūlūn ke qabīle ke 60,500 mard the. qabīle ke tīn kunbe sardī, ailonī aur yahlī'elī zabūlūn ke beṭoṅ sard, ailon aur yahlī'el se nikle hue the.

²⁸yūsuf ke do beṭoṅ manassī aur ifrāīm ke alag alag qabīle bane.

²⁹manassī ke qabīle ke 52,700 mard the. qabīle ke āṭh kunbe makīrī, jiliādī, īazrī, ḳhalqī, asrī'elī, sikmī, samīdāī aur hifrī the. makīrī manassī ke beṭe makīr se jabki jiliādī makīr ke beṭe jiliād se nikle hue the. bāqī kunbe jiliād ke chhih beṭoṅ īazar, ḳhalaq, asrī'el, sikam, samīdā aur hifar se nikle hue the. hifar silāfihād kā bāp thā. silāfihād kā koī beṭā nahīṅ balki pāṅch beṭiyāṅ mahlāh, nūsāh, hujlāh, milkāh aur tirzā thīṅ.

³⁵ifrāīm ke qabīle ke 32,500 mard the. qabīle ke chār kunbe sūtalhī, bakrī, tahnī aur īrānī the. pahle tīn kunbe ifrāīm ke beṭoṅ sūtalah, bakar aur tahan se jabki īrānī sūtalah ke beṭe īrān se nikle hue the.

³⁸binyamīn ke qabīle ke 45,600 mard the. qabīle ke sāt kunbe bālāī, ashbelī, aḳhīrāmī, sūfāmī, hūfāmī, ardī aur nāmānī the. pahle pāṅch kunbe binyamīn ke beṭoṅ bālā, ashbel, aḳhīrām, sūfām aur hūfām se jabki ardī aur nāmānī bālā ke beṭoṅ se nikle hue the.

⁴²dān ke qabīle ke 64,400 mard the. sab dān ke beṭe sūhām se nikle hue the, is lie sūhāmī kahlāte the.

⁴⁴āshar ke qabīle ke 53,400 mard the. qabīle ke pāṅch kunbe yimnī, iswī, barī'ī, hibarī aur malkī'elī the. pahle tīn kunbe āshar ke beṭoṅ yimnā, iswī aur barīā se jabki bāqī barīā ke beṭoṅ hibar aur malkī'el se nikle hue the. āshar kī ek beṭī banām sirah bhī thī.

⁴⁸naftālī ke qabīle ke 45,400 mard the. qabīle ke chār kunbe yahsī'elī, jūnī, yisrī aur sillīmī naftālī ke beṭoṅ yahsī'el, jūnī, yisar aur sillīm se nikle hue the.

⁵¹isrāīlī mardoṅ kī kul tādād 6,01,730 thī.

⁵²rab ne mūsā se kahā,

⁵³“jab mulk-e-kan'ān ko taqsīm kiyā jāegā to zamīn in kī tādād ke mutābiq denā hai.

⁵⁴baṛe qabīloṅ ko chhoṭe kī nisbat zyādā zamīn dī jāe. har qabīle kā ilāqā us kī tādād se mutābiqat rakhe.

⁵⁵qur'ā ḍālne se faislā kiyā jāe ki har qabīle ko kahāṅ zamīn milegī. lekin har qabīle ke ilāqe kā raqbā is par mabnī ho ki qabīle ke kitne afrād haiṅ.”

⁵⁷lāwī ke qabīle ke tīn kunbe jairsonī, qihātī aur mirārī lāwī ke beṭoṅ jairson, qihāt aur mirārī se nikle hue the.

⁵⁸is ke ilāwā libnī, hibrūnī, mahlī, mūshī aur korhī bhī lāwī ke kunbe the. qihāt amrām kā bāp thā.

⁵⁹amrām ne lāwī aurat yūkabid se shādī kī jo misr meṅ paidā huī thī. un ke do beṭe hārūn aur mūsā aur ek beṭī mariyam paidā hue.

⁶⁰hārūn ke beṭe nadab, abīhū, ilīazar aur itamar the.

⁶¹lekin nadab aur abīhū rab ko baḳhūr kī nājāiz qurbānī pesh karne ke bāis mar gae.

⁶²lāwiyoṅ ke mardoṅ kī kul tādād 23,000 thī. in meṅ wuh sab shāmil the jo ek māh yā is se zāid ke the. unheṅ dūsre isrāīliyoṅ se alag ginā gayā, kyūṅki unheṅ isrāīl meṅ mīrās meṅ zamīn nahīṅ milnī thī.

⁶³yūṅ mūsā aur ilīazar ne moāb ke maidānī ilāqe meṅ yarīhū ke sāmne lekin daryā-e-yardan ke mashriqī kināre par isrāīliyoṅ kī mardumshumārī kī.

⁶⁴logoṅ ko ginte ginte unheṅ mālūm huā ki jo log dasht-e-sīn meṅ mūsā aur hārūn kī pahlī mardumshumārī meṅ gine gae the wuh sab mar chuke haiṅ.

⁶⁵rab ne kahā thā ki wuh sab ke sab registān meṅ mar jāeṅge, aur aisā hī huā thā. sirf kālib bin yafunnā aur yashūa bin nūn zindā rahe.