Read Roman Urdu Geo gintī 27 Bible Online

gintī 27 - Roman Urdu Geo bible

gintī 27

¹silāfihād kī pāṅch beṭiyāṅ mahlāh, nūsāh, hujlāh, milkāh aur tirzā thīṅ. silāfihād yūsuf ke beṭe manassī ke kunbe kā thā. us kā pūrā nām silāfihād bin hifar bin jiliād bin makīr bin manassī bin yūsuf thā.

²silāfihād kī beṭiyāṅ mulāqāt ke ḳhaime ke darwāze par ā kar mūsā, ilīazar imām aur pūrī jamā'at ke sāmne khaṛī huīṅ. unhoṅ ne kahā,

³“hamārā bāp registān meṅ faut huā. lekin wuh qorah ke un sāthiyoṅ meṅ se nahīṅ thā jo rab ke ḳhilāf muttahid hue the. wuh is sabab se na marā balki apne zātī gunāh ke bāis. jab wuh mar gayā to us kā koī beṭā nahīṅ thā.

⁴kyā yih ṭhīk hai ki hamāre ḳhāndān meṅ beṭā na hone ke bāis hameṅ zamīn na mile aur hamāre bāp kā nām-o-nishān miṭ jāe? hameṅ bhī hamāre bāp ke dīgar rishtedāroṅ ke sāth zamīn deṅ.”

⁵mūsā ne un kā muāmalā rab ke sāmne pesh kiyā

⁶to rab ne us se kahā,

⁷“jo bāt silāfihād kī beṭiyāṅ kar rahī haiṅ wuh durust hai. unheṅ zarūr un ke bāp ke rishtedāroṅ ke sāth zamīn milnī chāhie. unheṅ bāp kā wirsā mil jāe.

⁸isrāīliyoṅ ko bhī batānā ki jab bhī koī ādmī mar jāe jis kā beṭā na ho to us kī beṭī ko us kī mīrās mil jāe.

⁹agar us kī beṭī bhī na ho to us ke bhāiyoṅ ko us kī mīrās mil jāe.

¹⁰agar us ke bhāī bhī na hoṅ to us ke bāp ke bhāiyoṅ ko us kī mīrās mil jāe.

¹¹agar yih bhī na hoṅ to us ke sab se qarībī rishtedār ko us kī mīrās mil jāe. wuh us kī zātī milkiyat hogī. yih usūl isrāīliyoṅ ke lie qānūnī haisiyat rakhtā hai. wuh ise waisā māneṅ jaisā rab ne mūsā ko hukm diyā hai.”

¹²phir rab ne mūsā se kahā, “abārīm ke pahāṛī silsile ke is pahāṛ par chaṛh kar us mulk par nigāh ḍāl jo maiṅ isrāīliyoṅ ko dūṅgā.

¹³use deḳhne ke bād tū bhī apne bhāī hārūn kī tarah kūch karke apne bāpdādā se jā milegā,

¹⁴kyūṅki tum donoṅ ne dasht-e-sīn meṅ mere hukm kī ḳhilāfwarzī kī. us waqt jab pūrī jamā'at ne marībā meṅ mere ḳhilāf gilā-shikwā kiyā to tū ne chaṭān se pānī nikālte waqt logoṅ ke sāmne merī quddūsiyat qāim na rakhī.” (marībā dasht-e-sīn ke qādis meṅ chashmā hai.)

¹⁵mūsā ne rab se kahā,

¹⁶“ai rab, tamām jānoṅ ke ḳhudā, jamā'at par kisī ādmī ko muqarrar kar

¹⁷jo un ke āge āge jang ke lie nikle aur un ke āge āge wāpas ā jāe, jo unheṅ bāhar le jāe aur wāpas le āe. warnā rab kī jamā'at un bheṛoṅ kī mānind hogī jin kā koī charwāhā na ho.”

¹⁸jawāb meṅ rab ne mūsā se kahā, “yashūa bin nūn ko chun le jis meṅ merā rūh hai, aur apnā hāth us par rakh.

¹⁹use ilīazar imām aur pūrī jamā'at ke sāmne khaṛā karke un ke rū-ba-rū hī use rāhnumāī kī zimmādārī de.

²⁰apne iḳhtiyār meṅ se kuchh use de tāki isrāīl kī pūrī jamā'at us kī itā'at kare.

²¹rab kī marzī jānane ke lie wuh ilīazar imām ke sāmne khaṛā hogā to ilīazar rab ke sāmne ūrīm aur tummīm istemāl karke us kī marzī daryāft karegā. usī ke hukm par yashūa aur isrāīl kī pūrī jamā'at ḳhaimāgāh se nikleṅge aur wāpas āeṅge.”

²²mūsā ne aisā hī kiyā. us ne yashūa ko chun kar ilīazar aur pūrī jamā'at ke sāmne khaṛā kiyā.

²³phir us ne us par apne hāth rakh kar use rāhnumāī kī zimmādārī sauṅpī jis tarah rab ne use batāyā thā.