Read Roman Urdu Geo gintī 30 Bible Online

gintī 30 - Roman Urdu Geo bible

gintī 30

¹phir mūsā ne qabīloṅ ke sardāroṅ se kahā, “rab farmātā hai,

²agar koī ādmī rab ko kuchh dene kī mannat māne yā kisī chīz se parhez karne kī qasam khāe to wuh apnī bāt par qāim rah kar use pūrā kare.

³agar koī jawān aurat jo ab tak apne bāp ke ghar meṅ rahtī hai rab ko kuchh dene kī mannat māne yā kisī chīz se parhez karne kī qasam khāe

⁴to lāzim hai ki wuh apnī mannat yā qasam kī har bāt pūrī kare. shart yih hai ki us kā bāp us ke bāre meṅ sun kar etirāz na kare.

⁵lekin agar us kā bāp yih sun kar use aisā karne se manā kare to us kī mannat yā qasam mansūḳh hai, aur wuh use pūrā karne se barī hai. rab use muāf karegā, kyūṅki us ke bāp ne use manā kiyā hai.

⁶ho saktā hai ki kisī ġhairshādīshudā aurat ne mannat mānī yā kisī chīz se parhez karne kī qasam khāī, chāhe us ne dānistā taur par yā besoche-samjhe aisā kiyā. is ke bād us aurat ne shādī kar lī.

⁷shādīshudā hālat meṅ bhī lāzim hai ki wuh apnī mannat yā qasam kī har bāt pūrī kare. shart yih hai ki us kā shauhar is ke bāre meṅ sun kar etirāz na kare.

⁸lekin agar us kā shauhar yih sun kar use aisā karne se manā kare to us kī mannat yā qasam mansūḳh hai, aur wuh use pūrā karne se barī hai. rab use muāf karegā.

⁹agar kisī bewā yā talāqshudā aurat ne mannat mānī yā kisī chīz se parhez karne kī qasam khāī to lāzim hai ki wuh apnī har bāt pūrī kare.

¹⁰agar kisī shādīshudā aurat ne mannat mānī yā kisī chīz se parhez karne kī qasam khāī

¹¹to lāzim hai ki wuh apnī har bāt pūrī kare. shart yih hai ki us kā shauhar us ke bāre meṅ sun kar etirāz na kare.

¹²lekin agar us kā shauhar use aisā karne se manā kare to us kī mannat yā qasam mansūḳh hai. wuh use pūrā karne se barī hai. rab use muāf karegā, kyūṅki us ke shauhar ne use manā kiyā hai.

¹³chāhe bīwī ne kuchh dene kī mannat mānī ho yā kisī chīz se parhez karne kī qasam khāī ho, us ke shauhar ko us kī tasdīq yā use mansūḳh karne kā iḳhtiyār hai.

¹⁴agar us ne apnī bīwī kī mannat yā qasam ke bāre meṅ sun liyā aur agle din tak etirāz na kiyā to lāzim hai ki us kī bīwī apnī har bāt pūrī kare. shauhar ne agle din tak etirāz na karne se apnī bīwī kī bāt kī tasdīq kī hai.

¹⁵agar wuh is ke bād yih mannat yā qasam mansūḳh kare to use is qusūr ke natāij bhugatne paṛeṅge.”

¹⁶rab ne mūsā ko yih hidāyāt dīṅ. yih aisī auratoṅ kī mannatoṅ yā qasmoṅ ke usūl haiṅ jo ġhairshādīshudā hālat meṅ apne bāp ke ghar meṅ rahtī haiṅ yā jo shādīshudā haiṅ.