Read Roman Urdu Geo gintī 31 Bible Online

gintī 31 - Roman Urdu Geo bible

gintī 31

¹rab ne mūsā se kahā,

²“midiyāniyoṅ se isrāīliyoṅ kā badlā le. is ke bād tū kūch karke apne bāpdādā se jā milegā.”

³chunāṅche mūsā ne isrāīliyoṅ se kahā, “hathiyāroṅ se apne kuchh ādmiyoṅ ko les karo tāki wuh midiyān se jang karke rab kā badlā leṅ.

⁴har qabīle ke 1,000 mard jang laṛne ke lie bhejo.”

⁵chunāṅche har qabīle ke 1,000 musallah mard yānī kul 12,000 ādmī chune gae.

⁶tab mūsā ne unheṅ jang laṛne ke lie bhej diyā. us ne ilīazar imām ke beṭe fīnhās ko bhī un ke sāth bhejā jis ke pās maqdis kī kuchh chīzeṅ aur elān karne ke bigul the.

⁷unhoṅ ne rab ke hukm ke mutābiq midiyāniyoṅ se jang kī aur tamām ādmiyoṅ ko maut ke ghāṭ utār diyā.

⁸in meṅ midiyāniyoṅ ke pāṅch bādshāh iwī, raqam, sūr, hūr aur rabā the. bal'ām bin baor ko bhī jān se mār diyā gayā.

⁹isrāīliyoṅ ne midiyānī auratoṅ aur bachchoṅ ko giriftār karke un ke tamām gāy-bail, bheṛ-bakriyāṅ aur māl lūṭ liyā.

¹⁰unhoṅ ne un kī tamām ābādiyoṅ ko ḳhaimāgāhoṅ samet jalā kar rākh kar diyā.

¹¹phir wuh tamām lūṭā huā māl qaidiyoṅ aur jānwaroṅ samet mūsā, ilīazar imām aur isrāīl kī pūrī jamā'at ke pās le āe jo ḳhaimāgāh meṅ intizār kar rahe the. abhī tak wuh moāb ke maidānī ilāqe meṅ daryā-e-yardan ke mashriqī kināre par yarīhū ke sāmne ṭhahre hue the.

¹³mūsā, ilīazar aur jamā'at ke tamām sardār un kā istiqbāl karne ke lie ḳhaimāgāh se nikle.

¹⁴unheṅ dekh kar mūsā ko hazār hazār aur sau sau afrād par muqarrar afsarān par ġhussā āyā.

¹⁵us ne kahā, “āp ne tamām auratoṅ ko kyūṅ bachāe rakhā?

¹⁶un hī ne bal'ām ke mashware par faġhūr meṅ isrāīliyoṅ ko rab se dūr kar diyā thā. un hī ke sabab se rab kī wabā us ke logoṅ meṅ phail gaī.

¹⁷chunāṅche ab tamām laṛkoṅ ko jān se mār do. un tamām auratoṅ ko bhī maut ke ghāṭ utārnā jo kuṅwāriyāṅ nahīṅ haiṅ.

¹⁸lekin tamām kuṅwāriyoṅ ko bachāe rakhnā.

¹⁹jis ne bhī kisī ko mār diyā yā kisī lāsh ko chhuā hai wuh sāt din tak ḳhaimāgāh ke bāhar rahe. tīsre aur sātweṅ din apne āp ko apne qaidiyoṅ samet gunāh se pāk-sāf karnā.

²⁰har libās aur har chīz ko pāk-sāf karnā jo chamṛe, bakriyoṅ ke bāloṅ yā lakaṛī kī ho.”

²¹phir ilīazar imām ne jang se wāpas āne wāle mardoṅ se kahā, “jo sharīat rab ne mūsā ko dī us ke mutābiq

²²jo bhī chīz jal nahīṅ jātī use āg meṅ se guzār denā tāki pāk-sāf ho jāe. us meṅ sonā, chāṅdī, pītal, lohā, ṭīn aur sīsā shāmil hai. phir us par nāpākī dūr karne kā pānī chhiṛaknā. bāqī tamām chīzeṅ pānī meṅ se guzār denā tāki wuh pāk-sāf ho jāeṅ.

²⁴sātweṅ din apne libās ko dhonā to tum pāk-sāf ho kar ḳhaimāgāh meṅ dāḳhil ho sakte ho.”

²⁵rab ne mūsā se kahā,

²⁶“tamām qaidiyoṅ aur lūṭe hue jānwaroṅ ko gin. is meṅ ilīazar imām aur qabāilī kunboṅ ke sarparast terī madad kareṅ.

²⁷sārā māl do barābar ke hissoṅ meṅ taqsīm karnā, ek hissā faujiyoṅ ke lie aur dūsrā bāqī jamā'at ke lie ho.

²⁸faujiyoṅ ke hisse ke pāṅch pāṅch sau qaidiyoṅ meṅ se ek ek nikāl kar rab ko denā. isī tarah pāṅch pāṅch sau bailoṅ, gadhoṅ, bheṛoṅ aur bakriyoṅ meṅ se ek ek nikāl kar rab ko denā.

²⁹unheṅ ilīazar imām ko denā tāki wuh unheṅ rab ko uṭhāne wālī qurbānī ke taur par pesh kare.

³⁰bāqī jamā'at ke hisse ke pachās pachās qaidiyoṅ meṅ se ek ek nikāl kar rab ko denā, isī tarah pachās pachās bailoṅ, gadhoṅ, bheṛoṅ aur bakriyoṅ yā dūsre jānwaroṅ meṅ se bhī ek ek nikāl kar rab ko denā. unheṅ un lāwiyoṅ ko denā jo rab ke maqdis ko saṅbhālte haiṅ.”

³¹mūsā aur ilīazar ne aisā hī kiyā.

³²unhoṅ ne 6,75,000 bheṛ-bakriyāṅ, 72,000 gāy-bail aur 61,000 gadhe gine.

³⁵in ke ilāwā 32,000 qaidī kuṅwāriyāṅ bhī thīṅ.

³⁶faujiyoṅ ko tamām chīzoṅ kā ādhā hissā mil gayā yānī 3,37,500 bheṛ-bakriyāṅ, 36,000 gāy-bail, 30,500 gadhe aur 16,000 qaidī kuṅwāriyāṅ. in meṅ se unhoṅ ne 675 bheṛ-bakriyāṅ, 72 gāy-bail, 61 gadhe aur 32 laṛkiyāṅ rab ko dīṅ.

⁴¹mūsā ne rab kā yih hissā ilīazar imām ko uṭhāne wālī qurbānī ke taur par de diyā, jis tarah rab ne hukm diyā thā.

⁴²bāqī jamā'at ko bhī lūṭe hue māl kā ādhā hissā mil gayā. mūsā ne pachās pachās qaidiyoṅ aur jānwaroṅ meṅ se ek ek nikāl kar un lāwiyoṅ ko de diyā jo rab kā maqdis saṅbhālte the. us ne waisā hī kiyā jaisā rab ne hukm diyā thā.

⁴⁸phir wuh afsar mūsā ke pās āe jo lashkar ke hazār hazār aur sau sau ādmiyoṅ par muqarrar the.

⁴⁹unhoṅ ne us se kahā, “āp ke ḳhādimoṅ ne un faujiyoṅ ko gin liyā hai jin par wuh muqarrar haiṅ, aur hameṅ patā chal gayā ki ek bhī kam nahīṅ huā.

⁵⁰is lie ham rab ko sone kā tamām zewar qurbān karnā chāhte haiṅ jo hameṅ fath pāne par milā thā masalan sone ke bāzūband, kangan, muhr lagāne kī angūṭhiyāṅ, bāliyāṅ aur hār. yih sab kuchh ham rab ko pesh karnā chāhte haiṅ tāki rab ke sāmne hamārā kaffārā ho jāe.”

⁵¹mūsā aur ilīazar imām ne sone kī tamām chīzeṅ un se le līṅ.

⁵²jo chīzeṅ unhoṅ ne afsarān ke lūṭe hue māl meṅ se rab ko uṭhāne wālī qurbānī ke taur par pesh kīṅ un kā pūrā wazn taqrīban 190 kilogrām thā.

⁵³sirf afsarān ne aisā kiyā. bāqī faujiyoṅ ne apnā lūṭ kā māl apne lie rakh liyā.

⁵⁴mūsā aur ilīazar afsarān kā yih sonā mulāqāt ke ḳhaime meṅ le āe tāki wuh rab ko us kī qaum kī yād dilātā rahe.