Read Roman Urdu Geo gintī 32 Bible Online

gintī 32 - Roman Urdu Geo bible

gintī 32

¹rūbin aur jad ke qabīloṅ ke pās bahut se maweshī the. jab unhoṅ ne dekhā ki yāzer aur jiliād kā ilāqā maweshī pālne ke lie achchhā hai

²to unhoṅ ne mūsā, ilīazar imām aur jamā'at ke rāhnumāoṅ ke pās ā kar kahā,

³“jis ilāqe ko rab ne isrāīl kī jamā'at ke āge āge shikast dī hai wuh maweshī pālne ke lie achchhā hai. atārāt, dībon, yāzer, nimrā, hasbon, ilīālī, sabām, nabū aur baūn jo is meṅ shāmil haiṅ hamāre kām āeṅge, kyūṅki āp ke ḳhādimoṅ ke pās maweshī haiṅ.

⁵agar āp kī nazar-e-karm ham par ho to hameṅ yih ilāqā diyā jāe. yih hamārī milkiyat ban jāe aur hameṅ daryā-e-yardan ko pār karne par majbūr na kiyā jāe.”

⁶mūsā ne jad aur rūbin ke afrād se kahā, “kyā tum yahāṅ pīchhe rah kar apne bhāiyoṅ ko chhoṛnā chāhte ho jab wuh jang laṛne ke lie āge nikleṅge?

⁷us waqt jab isrāīlī daryā-e-yardan ko pār karke us mulk meṅ dāḳhil hone wāle haiṅ jo rab ne unheṅ diyā hai to tum kyūṅ un kī hauslāshiknī kar rahe ho?

⁸tumhāre bāpdādā ne bhī yihī kuchh kiyā jab maiṅ ne unheṅ qādis-barnīa se mulk ke bāre meṅ mālūmāt hāsil karne ke lie bhejā.

⁹iskāl kī wādī meṅ pahuṅch kar mulk kī taftīsh karne ke bād unhoṅ ne isrāīliyoṅ kī hauslāshiknī kī tāki wuh us mulk meṅ dāḳhil na hoṅ jo rab ne unheṅ diyā thā.

¹⁰us din rab ne ġhusse meṅ ā kar qasam khāī,

¹¹‘un ādmiyoṅ meṅ se jo misr se nikal āe haiṅ koī us mulk ko nahīṅ dekhegā jis kā wādā maiṅ ne qasam khā kar ibrāhīm, is'hāq aur yāqūb se kiyā thā. kyūṅki unhoṅ ne pūrī wafādārī se merī pairawī na kī. sirf wuh jin kī umr us waqt 20 sāl se kam hai dāḳhil hoṅge.

¹²buzurgoṅ meṅ se sirf kālib bin yafunnā qanizzī aur yashūa bin nūn mulk meṅ dāḳhil hoṅge, is lie ki unhoṅ ne pūrī wafādārī se merī pairawī kī.’

¹³us waqt rab kā ġhazab un par ān paṛā, aur unheṅ 40 sāl tak registān meṅ māre māre phirnā paṛā, jab tak ki wuh tamām nasl ḳhatm na ho gaī jis ne us ke nazdīk ġhalat kām kiyā thā.

¹⁴ab tum gunāhgāroṅ kī aulād apne bāpdādā kī jagah khaṛe ho kar rab kā isrāīl par ġhussā mazīd baṛhā rahe ho.

¹⁵agar tum us kī pairawī se haṭoge to wuh dubārā in logoṅ ko registān meṅ rahne degā, aur tum in kī halākat kā bāis banoge.”

¹⁶is ke bād rūbin aur jad ke afrād dubārā mūsā ke pās āe aur kahā, “ham yahāṅ filhāl apne maweshī ke lie bāṛe aur apne bāl-bachchoṅ ke lie shahr banānā chāhte haiṅ.

¹⁷is ke bād ham musallah ho kar isrāīliyoṅ ke āge āge chaleṅge aur har ek ko us kī apnī jagah tak pahuṅchāeṅge. itne meṅ hamāre bāl-bachche hamāre shahroṅ kī fasīloṅ ke andar mulk ke muḳhālif bāshindoṅ se mahfūz raheṅge.

¹⁸ham us waqt tak apne gharoṅ ko nahīṅ lauṭeṅge jab tak har isrāīlī ko us kī maurūsī zamīn na mil jāe.

¹⁹dūsre, ham ḳhud un ke sāth daryā-e-yardan ke maġhrib meṅ mīrās meṅ kuchh nahīṅ pāeṅge, kyūṅki hameṅ apnī maurūsī zamīn daryā-e-yardan ke mashriqī kināre par mil chukī hai.”

²⁰yih sun kar mūsā ne kahā, “agar tum aisā hī karoge to ṭhīk hai. phir rab ke sāmne jang ke lie tayyār ho jāo

²¹aur sab hathiyār bāndh kar rab ke sāmne daryā-e-yardan ko pār karo. us waqt tak na lauṭo jab tak rab ne apne tamām dushmanoṅ ko apne āge se nikāl na diyā ho.

²²phir jab mulk par rab kā qabzā ho gayā hogā to tum lauṭ sakoge. tab tum ne rab aur apne hamwatan bhāiyoṅ ke lie apne farāiz adā kar die hoṅge, aur yih ilāqā rab ke sāmne tumhārā maurūsī haq hogā.

²³lekin agar tum aisā na karo to phir tum rab hī kā gunāh karoge. yaqīn jāno tumheṅ apne gunāh kī sazā milegī.

²⁴ab apne bāl-bachchoṅ ke lie shahr aur apne maweshiyoṅ ke lie bāṛe banā lo. lekin apne wāde ko zarūr pūrā karnā.”

²⁵jad aur rūbin ke afrād ne mūsā se kahā, “ham āp ke ḳhādim haiṅ, ham apne āqā ke hukm ke mutābiq hī kareṅge.

²⁶hamāre bāl-bachche aur maweshī yihīṅ jiliād ke shahroṅ meṅ raheṅge.

²⁷lekin āp ke ḳhādim musallah ho kar daryā ko pār kareṅge aur rab ke sāmne jang kareṅge. ham sab kuchh waisā hī kareṅge jaisā hamāre āqā ne hameṅ hukm diyā hai.”

²⁸tab mūsā ne ilīazar imām, yashūa bin nūn aur qabāilī kunboṅ ke sarparastoṅ ko hidāyat dī,

²⁹“lāzim hai ki jad aur rūbin ke mard musallah ho kar tumhāre sāth hī rab ke sāmne daryā-e-yardan ko pār kareṅ aur mulk par qabzā kareṅ. agar wuh aisā kareṅ to unheṅ mīrās meṅ jiliād kā ilāqā do.

³⁰lekin agar wuh aisā na kareṅ to phir unheṅ mulk-e-kan'ān hī meṅ tumhāre sāth maurūsī zamīn mile.”

³¹jad aur rūbin ke afrād ne isrār kiyā, “āp ke ḳhādim sab kuchh kareṅge jo rab ne kahā hai.

³²ham musallah ho kar rab ke sāmne daryā-e-yardan ko pār kareṅge aur kan'ān ke mulk meṅ dāḳhil hoṅge, agarche hamārī maurūsī zamīn yardan ke mashriqī kināre par hogī.”

³³tab mūsā ne jad, rūbin aur manassī ke ādhe qabīle ko yih ilāqā diyā. us meṅ wuh pūrā mulk shāmil thā jis par pahle amoriyoṅ kā bādshāh sīhon aur basan kā bādshāh oj hukūmat karte the. in shikastḳhurdā mamālik ke dehātoṅ samet tamām shahr un ke hawāle kie gae.

³⁴jad ke qabīle ne dībon, atārāt, aroīr,

³⁵atarāt-shofān, yāzer, yugbahā,

³⁶bait-nimrā aur bait-hārān ke shahroṅ ko dubārā tāmīr kiyā. unhoṅ ne un kī fasīleṅ banāīṅ aur apne maweshiyoṅ ke lie bāṛe bhī.

³⁷rūbin ke qabīle ne hasbon, ilīālī, qiryatāim,

³⁸nabū, bāl-maūn aur sibmāh dubārā tāmīr kie. nabū aur bāl-maūn ke nām badal gae. kyūṅki unhoṅ ne un shahroṅ ko nae nām die jo unhoṅ ne dubārā tāmīr kie.

³⁹manassī ke beṭe makīr kī aulād ne jiliād jā kar us par qabzā kar liyā aur us ke tamām amorī bāshindoṅ ko nikāl diyā.

⁴⁰chunāṅche mūsā ne makīriyoṅ ko jiliād kī sarzamīn de dī, aur wuh wahāṅ ābād hue.

⁴¹manassī ke ek ādmī banām yāīr ne us ilāqe meṅ kuchh bastiyoṅ par qabzā karke unheṅ hawwot-yāīr yānī ‘yāīr kī bastiyāṅ’ kā nām diyā.

⁴²isī tarah us qabīle ke ek aur ādmī banām nūbah ne jā kar qanāt aur us ke dehātoṅ par qabzā kar liyā. us ne shahr kā nām nūbah rakhā.