Read Roman Urdu Geo gintī 34 Bible Online

gintī 34 - Roman Urdu Geo bible

gintī 34

¹rab ne mūsā se kahā,

²“isrāīliyoṅ ko batānā ki jab tum us mulk meṅ dāḳhil hoge jo maiṅ tumheṅ mīrās meṅ dūṅgā to us kī sarhaddeṅ yih hoṅgī:

³us kī junūbī sarhad dasht-e-sīn meṅ adom kī sarhad ke sāth sāth chalegī. mashriq meṅ wuh bahīrā-e-murdār ke junūbī sāhil se shurū hogī, phir in jaghoṅ se ho kar maġhrib kī taraf guzaregī:

⁴darrā-e-aqrabbīm ke junūb meṅ se, dasht-e-sīn meṅ se, qādis-barnīa ke junūb meṅ se hasar-addār aur azmūn meṅ se.

⁵wahāṅ se wuh muṛ kar misr kī sarhad par wāqe wādī-e-misr ke sāth sāth bahīrā-e-rūm tak pahuṅchegī.

⁶us kī maġhribī sarhad bahīrā-e-rūm kā sāhil hogā.

⁷us kī shimālī sarhad bahīrā-e-rūm se le kar in jaghoṅ se ho kar mashriq kī taraf guzaregī: hor pahāṛ,

⁸labo-hamāt, sidād,

⁹zifrūn aur hasar-enān. hasar-enān shimālī sarhad kā sab se mashriqī maqām hogā.

¹⁰us kī mashriqī sarhad shimāl meṅ hasar-enān se shurū hogī. phir wuh in jaghoṅ se ho kar junūb kī taraf guzaregī: sifām,

¹¹riblā jo ain ke mashriq meṅ hai aur kinnarat yānī galīl kī jhīl ke mashriq meṅ wāqe pahāṛī ilāqā.

¹²is ke bād wuh daryā-e-yardan ke kināre kināre guzartī huī bahīrā-e-murdār tak pahuṅchegī. yih tumhāre mulk kī sarhaddeṅ hoṅgī.”

¹³mūsā ne isrāīliyoṅ se kahā, “yih wuhī mulk hai jise tumheṅ qur'ā ḍāl kar taqsīm karnā hai. rab ne hukm diyā hai ki use bāqī sāṛhe nau qabīloṅ ko denā hai.

¹⁴kyūṅki aṛhāī qabīloṅ ke ḳhāndānoṅ ko un kī mīrās mil chukī hai yānī rūbin aur jad ke pūre qabīle aur manassī ke ādhe qabīle ko.

¹⁵unheṅ yahāṅ, daryā-e-yardan ke mashriq meṅ yarīhū ke sāmne zamīn mil chukī hai.”

¹⁶rab ne mūsā se kahā,

¹⁷“ilīazar imām aur yashūa bin nūn logoṅ ke lie mulk taqsīm kareṅ.

¹⁸har qabīle ke ek ek rāhnumā ko bhī chunanā tāki wuh taqsīm karne meṅ madad kare. jin ko tumheṅ chunanā hai un ke nām yih haiṅ:

¹⁹yahūdāh ke qabīle kā kālib bin yafunnā,

²⁰shamāūn ke qabīle kā samūel bin ammīhūd,

²¹binyamīn ke qabīle kā ilīdād bin kislon,

²²dān ke qabīle kā buqqī bin yuglī,

²³manassī ke qabīle kā hannī'el bin afūd,

²⁴ifrāīm ke qabīle kā qamūel bin siftān,

²⁵zabūlūn ke qabīle kā ilīsafan bin farnāk,

²⁶ishkār ke qabīle kā faltī'el bin azzān,

²⁷āshar ke qabīle kā aḳhīhūd bin shalūmī,

²⁸naftālī ke qabīle kā fidāhel bin ammīhūd.”

²⁹rab ne in hī ādmiyoṅ ko mulk ko isrāīliyoṅ meṅ taqsīm karne kī zimmādārī dī.