Read Roman Urdu Geo gintī 35 Bible Online

gintī 35 - Roman Urdu Geo bible

gintī 35

¹isrāīlī ab tak moāb ke maidānī ilāqe meṅ daryā-e-yardan ke mashriqī kināre par yarīhū ke sāmne the. wahāṅ rab ne mūsā se kahā,

²“isrāīliyoṅ ko batā de ki wuh lāwiyoṅ ko apnī milī huī zamīnoṅ meṅ se rahne ke lie shahr deṅ. unheṅ shahroṅ ke irdgird maweshī charāne kī zamīn bhī mile.

³phir lāwiyoṅ ke pās rahne ke lie shahr aur apne jānwar charāne ke lie zamīn hogī.

⁴charāne ke lie zamīn shahr ke irdgird hogī, aur chāroṅ taraf kā fāsilā fasīloṅ se 1,500 fuṭ ho.

⁵charāne kī yih zamīn murabbā shakl kī hogī jis ke har pahlū kā fāsilā 3,000 fuṭ ho. shahr is murabbā shakl ke bīch meṅ ho. yih raqbā shahr ke bāshindoṅ ke lie ho tāki wuh apne maweshī charā sakeṅ.

⁶lāwiyoṅ ko kul 48 shahr denā. in meṅ se chhih panāh ke shahr muqarrar karnā. un meṅ aise log panāh le sakeṅge jin ke hāthoṅ ġhairirādī taur par koī halāk huā ho.

⁸har qabīlā lāwiyoṅ ko apne ilāqe ke raqbe ke mutābiq shahr de. jis qabīle kā ilāqā baṛā hai use lāwiyoṅ ko zyādā shahr dene haiṅ jabki jis qabīle kā ilāqā chhoṭā hai wuh lāwiyoṅ ko kam shahr de.”

⁹phir rab ne mūsā se kahā,

¹⁰“isrāīliyoṅ ko batānā ki daryā-e-yardan ko pār karne ke bād

¹¹kuchh panāh ke shahr muqarrar karnā. un meṅ wuh shaḳhs panāh le sakegā jis ke hāthoṅ ġhairirādī taur par koī halāk huā ho.

¹²wahāṅ wuh intiqām lene wāle se panāh le sakegā aur jamā'at kī adālat ke sāmne khaṛe hone se pahle mārā nahīṅ jā sakegā.

¹³is ke lie chhih shahr chun lo.

¹⁴tīn daryā-e-yardan ke mashriq meṅ aur tīn mulk-e-kan'ān meṅ hoṅ.

¹⁵yih chhih shahr har kisī ko panāh deṅge, chāhe wuh isrāīlī, pardesī yā un ke darmiyān rahne wālā ġhairshahrī ho. jis se bhī ġhairirādī taur par koī halāk huā ho wuh wahāṅ panāh le saktā hai.

¹⁶agar kisī ne kisī ko jān-būjh kar lohe, patthar yā lakaṛī kī kisī chīz se mār ḍālā ho wuh qātil hai aur use sazā-e-maut denī hai.

¹⁹maqtūl kā sab se qarībī rishtedār use talāsh karke mār de.

²⁰kyūṅki jo nafrat yā dushmanī ke bāis jān-būjh kar kisī ko yūṅ dhakkā de, us par koī chīz phaiṅk de yā use mukkā māre ki wuh mar jāe wuh qātil hai aur use sazā-e-maut denī hai.

²²lekin wuh qātil nahīṅ hai jis se dushmanī ke bāis nahīṅ balki ittifāq se aur ġhairirādī taur par koī halāk huā ho, chāhe us ne use dhakkā diyā, koī chīz us par phaiṅk dī

²³yā koī patthar us par girne diyā.

²⁴agar aisā huā to lāzim hai ki jamā'at in hidāyāt ke mutābiq us ke aur intiqām lene wāle ke darmiyān faislā kare.

²⁵agar mulzim bequsūr hai to jamā'at us kī hifāzat karke use panāh ke us shahr meṅ wāpas le jāe jis meṅ us ne panāh lī hai. wahāṅ wuh muqaddas tel se masah kie gae imām-e-āzam kī maut tak rahe.

²⁶lekin agar yih shaḳhs is se pahle panāh ke shahr se nikle to wuh mahfūz nahīṅ hogā.

²⁷agar us kā intiqām lene wāle se sāmnā ho jāe to intiqām lene wāle ko use mār ḍālne kī ijāzat hogī. agar wuh aisā kare to bequsūr rahegā.

²⁸panāh lene wālā imām-e-āzam kī wafāt tak panāh ke shahr meṅ rahe. is ke bād hī wuh apne ghar wāpas jā saktā hai.

²⁹yih usūl dāimī haiṅ. jahāṅ bhī tum rahte ho tumheṅ hameshā in par amal karnā hai.

³⁰jis par qatl kā ilzām lagāyā gayā ho use sirf is sūrat meṅ sazā-e-maut dī jā saktī hai ki kam az kam do gawāh hoṅ. ek gawāh kāfī nahīṅ hai.

³¹qātil ko zarūr sazā-e-maut denā. ḳhwāh wuh is se bachne ke lie koī bhī muāwazā de use āzād na chhoṛnā balki sazā-e-maut denā.

³²us shaḳhs se bhī paise qabūl na karnā jis se ġhairirādī taur par koī halāk huā ho aur jo is sabab se panāh ke shahr meṅ rah rahā hai. use ijāzat nahīṅ ki wuh paise de kar panāh kā shahr chhoṛe aur apne ghar wāpas chalā jāe. lāzim hai ki wuh is ke lie imām-e-āzam kī wafāt kā intizār kare.

³³jis mulk meṅ tum rahte ho us kī muqaddas hālat ko nāpāk na karnā. jab kisī ko us meṅ qatl kiyā jāe to wuh nāpāk ho jātā hai. jab is tarah ḳhūn bahtā hai to mulk kī muqaddas hālat sirf us shaḳhs ke ḳhūn bahne se bahāl ho jātī hai jis ne yih ḳhūn bahāyā hai. yānī mulk kā sirf qātil kī maut se hī kaffārā diyā jā saktā hai.

³⁴us mulk ko nāpāk na karnā jis meṅ tum ābād ho aur jis meṅ maiṅ sukūnat kartā hūṅ. kyūṅki maiṅ rab hūṅ jo isrāīliyoṅ ke darmiyān sukūnat kartā hūṅ.”