Read Roman Urdu Geo gintī 36 Bible Online

gintī 36 - Roman Urdu Geo bible

gintī 36

¹ek din jiliād bin makīr bin manassī bin yūsuf ke kunbe se nikle hue ābāī gharānoṅ ke sarparast mūsā aur un sardāroṅ ke pās āe jo dīgar ābāī gharānoṅ ke sarparast the.

²unhoṅ ne kahā, “rab ne āp ko hukm diyā thā ki āp qur'ā ḍāl kar mulk ko isrāīliyoṅ meṅ taqsīm kareṅ. us waqt us ne yih bhī kahā thā ki hamāre bhāī silāfihād kī beṭiyoṅ ko us kī maurūsī zamīn milnī hai.

³agar wuh isrāīl ke kisī aur qabīle ke mardoṅ se shādī kareṅ to phir yih zamīn jo hamāre qabīle kā maurūsī hissā hai us qabīle kā maurūsī hissā banegī aur ham us se mahrūm ho jāeṅge. phir hamārā qabāilī ilāqā chhoṭā ho jāegā.

⁴aur agar ham yih zamīn wāpas bhī ḳharīdeṅ to bhī wuh agle bahālī ke sāl meṅ dūsre qabīle ko wāpas chalī jāegī jis meṅ in auratoṅ ne shādī kī hai. is tarah wuh hameshā ke lie hamāre hāth se nikal jāegī.”

⁵mūsā ne rab ke hukm par isrāīliyoṅ ko batāyā, “jiliād ke mard haq-ba-jānib haiṅ.

⁶is lie rab kī hidāyat yih hai ki silāfihād kī beṭiyoṅ ko har ādmī se shādī karne kī ijāzat hai, lekin sirf is sūrat meṅ ki wuh un ke apne qabīle kā ho.

⁷is tarah ek qabīle kī maurūsī zamīn kisī dūsre qabīle meṅ muntaqil nahīṅ hogī. lāzim hai ki har qabīle kā pūrā ilāqā usī ke pās rahe.

⁸jo bhī beṭī mīrās meṅ zamīn pātī hai us ke lie lāzim hai ki wuh apne hī qabīle ke kisī mard se shādī kare tāki us kī zamīn qabīle ke pās hī rahe.

⁹ek qabīle kī maurūsī zamīn kisī dūsre qabīle ko muntaqil karne kī ijāzat nahīṅ hai. lāzim hai ki har qabīle kā pūrā maurūsī ilāqā usī ke pās rahe.”

¹⁰silāfihād kī beṭiyoṅ mahlāh, tirzā, hujlāh, milkāh aur nūsāh ne waisā hī kiyā jaisā rab ne mūsā ko batāyā thā. unhoṅ ne apne chachāzād bhāiyoṅ se shādī kī.

¹²chūṅki wuh bhī manassī ke qabīle ke the is lie yih maurūsī zamīn silāfihād ke qabīle ke pās rahī.

¹³rab ne yih ahkām aur hidāyāt isrāīliyoṅ ko mūsā kī mārifat dīṅ jab wuh moāb ke maidānī ilāqe meṅ daryā-e-yardan ke mashriqī kināre par yarīhū ke sāmne ḳhaimāzan the.