Read Roman Urdu Geo gintī 4 Bible Online

gintī 4 - Roman Urdu Geo bible

gintī 4

¹rab ne mūsā aur hārūn se kahā,

²“lāwī ke qabīle meṅ se qihātiyoṅ kī mardumshumārī un ke kunboṅ aur ābāī gharānoṅ ke mutābiq karnā.

³un tamām mardoṅ ko rajisṭar meṅ darj karnā jo 30 se le kar 50 sāl ke haiṅ aur mulāqāt ke ḳhaime meṅ ḳhidmat karne ke lie ā sakte haiṅ.

⁴qihātiyoṅ kī ḳhidmat muqaddastarīn kamre kī dekh-bhāl hai.

⁵jab ḳhaime ko safar ke lie sameṭnā hai to hārūn aur us ke beṭe dāḳhil ho kar muqaddastarīn kamre kā pardā utāreṅ aur use sharīat ke sandūq par ḍāl deṅ.

⁶is par wuh taḳhas kī khāloṅ kā ġhilāf aur āḳhir meṅ pūrī tarah nīle rang kā kapṛā bichhāeṅ. is ke bād wuh sandūq ko uṭhāne kī lakaṛiyāṅ lagāeṅ.

⁷wuh us mez par bhī nīle rang kā kapṛā bichhāeṅ jis par rab ko roṭī pesh kī jātī hai. us par thāl, pyāle, mai kī nazareṅ pesh karne ke bartan aur martabān rakhe jāeṅ. jo roṭī hameshā mez par hotī hai wuh bhī us par rahe.

⁸hārūn aur us ke beṭe in tamām chīzoṅ par qirmizī rang kā kapṛā bichhā kar āḳhir meṅ un ke ūpar taḳhas kī khāloṅ kā ġhilāf ḍāleṅ. is ke bād wuh mez ko uṭhāne kī lakaṛiyāṅ lagāeṅ.

⁹wuh shamādān aur us ke sāmān par yānī us ke charaġh, battī katarne kī qainchiyoṅ, jalte koele ke chhoṭe bartanoṅ aur tel ke bartanoṅ par nīle rang kā kapṛā rakheṅ.

¹⁰yih sab kuchh wuh taḳhas kī khāloṅ ke ġhilāf meṅ lapeṭeṅ aur use uṭhā kar le jāne ke lie ek chaukhaṭe par rakheṅ.

¹¹wuh baḳhūr jalāne kī sone kī qurbāngāh par bhī nīle rang kā kapṛā bichhā kar us par taḳhas kī khāloṅ kā ġhilāf ḍāleṅ aur phir use uṭhāne kī lakaṛiyāṅ lagāeṅ.

¹²wuh sārā sāmān jo muqaddas kamre meṅ istemāl hotā hai le kar nīle rang ke kapṛe meṅ lapeṭeṅ, us par taḳhas kī khāloṅ kā ġhilāf ḍāleṅ aur use uṭhā kar le jāne ke lie ek chaukhaṭe par rakheṅ.

¹³phir wuh jānwaroṅ ko jalāne kī qurbāngāh ko rākh se sāf karke us par arġhawānī rang kā kapṛā bichhāeṅ.

¹⁴us par wuh qurbāngāh kī ḳhidmat ke lie sārā zarūrī sāmān rakheṅ yānī chhiṛkāo ke kaṭore, jalte hue koele ke bartan, belche aur kāṅṭe. is sāmān par wuh taḳhas kī khāloṅ kā ġhilāf ḍāl kar qurbāngāh ko uṭhāne kī lakaṛiyāṅ lagāeṅ.

¹⁵safar ke lie rawānā hote waqt yih sab kuchh uṭhā kar le jānā qihātiyoṅ kī zimmādārī hai. lekin lāzim hai ki pahle hārūn aur us ke beṭe yih tamām muqaddas chīzeṅ ḍhāṅpeṅ. qihātī in meṅ se koī bhī chīz na chhueṅ warnā mar jāeṅge.

¹⁶hārūn imām kā beṭā ilīazar pūre muqaddas ḳhaime aur us ke sāmān kā inchārj ho. is meṅ charāġhoṅ kā tel, baḳhūr, ġhallā kī rozānā nazar aur masah kā tel bhī shāmil hai.”

¹⁷rab ne mūsā aur hārūn se kahā,

¹⁸“ḳhabardār raho ki qihāt ke kunbe lāwī ke qabīle meṅ se miṭne na pāeṅ.

¹⁹chunāṅche jab wuh muqaddastarīn chīzoṅ ke pās āeṅ to hārūn aur us ke beṭe har ek ko us sāmān ke pās le jāeṅ jo use uṭhā kar le jānā hai tāki wuh na mareṅ balki jīte raheṅ.

²⁰qihātī ek lamhe ke lie bhī muqaddas chīzeṅ deḳhne ke lie andar na jāeṅ, warnā wuh mar jāeṅge.”

²¹phir rab ne mūsā se kahā,

²²“jairson kī aulād kī mardumshumārī bhī un ke ābāī gharānoṅ aur kunboṅ ke mutābiq karnā.

²³un tamām mardoṅ ko rajisṭar meṅ darj karnā jo 30 se le kar 50 sāl ke haiṅ aur mulāqāt ke ḳhaime meṅ ḳhidmat ke lie ā sakte haiṅ.

²⁴wuh yih chīzeṅ uṭhā kar le jāne ke zimmādār haiṅ:

²⁵mulāqāt kā ḳhaimā, us kī chhat, chhat par rakhī huī taḳhas kī khāl kī poshish, ḳhaime ke darwāze kā pardā,

²⁶ḳhaime aur qurbāngāh kī chārdīwārī ke parde, chārdīwārī ke darwāze kā pardā, us ke rasse aur use lagāne kā bāqī sāmān. wuh un tamām kāmoṅ ke zimmādār haiṅ jo in chīzoṅ se munsalik haiṅ.

²⁷jairsoniyoṅ kī pūrī ḳhidmat hārūn aur us ke beṭoṅ kī hidāyāt ke mutābiq ho. ḳhabardār raho ki wuh sab kuchh ain hidāyāt ke mutābiq uṭhā kar le jāeṅ.

²⁸yih sab mulāqāt ke ḳhaime meṅ jairsoniyoṅ kī zimmādāriyāṅ haiṅ. is kām meṅ hārūn imām kā beṭā itamar un par muqarrar hai.”

²⁹rab ne kahā, “mirārī kī aulād kī mardumshumārī bhī un ke ābāī gharānoṅ aur kunboṅ ke mutābiq karnā.

³⁰un tamām mardoṅ ko rajisṭar meṅ darj karnā jo 30 se le kar 50 sāl ke haiṅ aur mulāqāt ke ḳhaime meṅ ḳhidmat ke lie ā sakte haiṅ.

³¹wuh mulāqāt ke ḳhaime kī yih chīzeṅ uṭhā kar le jāne ke zimmādār haiṅ: dīwār ke taḳhte, shahtīr, khambe aur pāe,

³²phir ḳhaime kī chārdīwārī ke khambe, pāe, meḳheṅ, rasse aur yih chīzeṅ lagāne kā sāmān. har ek ko tafsīl se batānā ki wuh kyā kyā uṭhā kar le jāe.

³³yih sab kuchh mirāriyoṅ kī mulāqāt ke ḳhaime meṅ zimmādāriyoṅ meṅ shāmil hai. is kām meṅ hārūn imām kā beṭā itamar un par muqarrar ho.”

³⁴mūsā, hārūn aur jamā'at ke rāhnumāoṅ ne qihātiyoṅ kī mardumshumārī un ke kunboṅ aur ābāī gharānoṅ ke mutābiq kī.

³⁵unhoṅ ne un tamām mardoṅ ko rajisṭar meṅ darj kiyā jo 30 se le kar 50 sāl ke the aur jo mulāqāt ke ḳhaime meṅ ḳhidmat kar sakte the. un kī kul tādād 2,750 thī. mūsā aur hārūn ne sab kuchh waisā hī kiyā jaisā rab ne mūsā kī mārifat farmāyā thā.

³⁸phir jairsoniyoṅ kī mardumshumārī un ke kunboṅ aur ābāī gharānoṅ ke mutābiq huī. ḳhidmat ke lāiq mardoṅ kī kul tādād 2,630 thī. mūsā aur hārūn ne sab kuchh waisā hī kiyā jaisā rab ne mūsā ke zarī'e farmāyā thā.

⁴²phir mirāriyoṅ kī mardumshumārī un ke kunboṅ aur ābāī gharānoṅ ke mutābiq huī. ḳhidmat ke lāiq mardoṅ kī kul tādād 3,200 thī. mūsā aur hārūn ne sab kuchh waisā hī kiyā jaisā rab ne mūsā ke zarī'e farmāyā thā.

⁴⁶lāwiyoṅ ke un mardoṅ kī kul tādād 8,580 thī jinheṅ mulāqāt ke ḳhaime meṅ ḳhidmat karnā aur safar karte waqt use uṭhā kar le jānā thā.

⁴⁹mūsā ne rab ke hukm ke mutābiq har ek ko us kī apnī apnī zimmādārī sauṅpī aur use batāyā ki use kyā kyā uṭhā kar le jānā hai. yūṅ un kī mardumshumārī rab ke us hukm ke ain mutābiq kī gaī jo us ne mūsā kī mārifat diyā thā.